ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ތަޢާރަފްކުރަން އިންވެސްޓަރުންނަށް ލުއި ދޭނަން- މިނިސްޓަރ ފައިސަލް
ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ތަޢާރަފްކުރަން އިންވެސްޓަރުންނަށް ލުއި ދެއްވާނެ ކަމަށް ފަތުރުވެރިކަމާބެހޭ ވަޒީރު އިބްރާހީމް ފައިސަލް ވިދާޅުވެއްޖެއެވެ.
ރައްޔިތުންގެ މަޖިލިހުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން ފައިސަލް ވިދާޅުވީ ޓޫރިޒަމް ފުޅާދާއިރާއެއްގައި ކުރިއަރަމުން ދަނީ މަދު އަތޮޅެއްގައި ކަމަށެވެ. އެއީ މާލެ އަތޮޅާއި, ރ.އަތޮޅާއި, ބ.އަތޮޅާއި, ވ.އަތޮޅާއި, އަރިއަތޮޅުގައި ކަމަށެވެ. މިސަރުކާރުގެ އަދި މިނިސްޓްރީގެވެސް ވިސްނުމަކީ ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ގެންދެވޭނެ މަގަށް މަސައްކަތް ކުރުން ކަމަށް ވަޒީރު ވިދާޅުވިއެވެ. އެގޮތުން އެސަރަހައްދުތަކަށް އިންވެސްޓްކުރާ ފަރާތްތަކަށް ބޮޑަތި ލުއިތަކެއް ދެއްވާނެ ކަމަށް މިނިސްޓަރ ވިދާޅުވިއެވެ.
" އެގޮތުން އަޅުގަނޑު ގަބޫލުކުރަނީ އެތަންތަނަށް ކޯސްޓްވެސް, ލޭންޑް ރެންޓްވެސް ކުޑަވެގެންދާނެޖޭނެ ކަމަށް. އެކަމުގެ މަޝްވަރާގައި އަދި ޓެކްސް ތެރޭންވެސް އެތަންތަނަށް ލުއިތަކެއް ލިބިގެންދާންޖެހޭނެ ކަމަށް. އެހެންނޫނީ ހަމަ ދިވެހިރާއްޖޭގައި އިންވެސްޓް ކުރެއްވުމަށް ދުނިޔޭގެ އެކި ތަންތަނުން އައިސް އިންވެސްޓް ޕްރޮޕޯސަލް ހުށަހަޅާނީ މާލެ އަތޮޅު, ވ.އަތޮޅު ދެންމެ މިދެންނެވި އަތޮޅުތަކަށް" މިނިސްޓަރ ވިދާޅުވިއެވެ.
އެހެންވިމަ އެތަންތަނުގެ ބަދަލުގައި ދެންހުރި ދުރު ތަންތަނަށް އިންވެސްޓްމަންޓްތައް ގެންދިއުމަށްޓަކައި ޤާނޫނަށް ގެންނަން ޖެހޭ އިސްލާހުތައް ވަރަށް އަވަހަސް ހުށަހަޅުއްވާނެ ކަމަށް ވަޒީރު ވިދާޅުވިއެވެ. އެމަސައްކަތް ބަންޑާރަނައިބުގެ އޮފީހާ ގުޅިގެން ކުރައްވަމުންދާކަމަށްވެސް ވިދާޅުވިއެވެ. އެލުއިތައް ދީގެން މެނުވީ ފަތުރުވެރިކަން ނެތް ހިސާބުތަކަށް ފަތުރުވެރިކަން ގެންދެވޭނެ ކަމަށް ގަބޫލު ނުކުރައްވާކަމަށްވެސް ވަޒީރު ވިދާޅުވިއެވެ.
ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ގެންދިއުމަށް މިސަރުކާރުން ކުރެއްވި ބައެއް މަސައްކަތްތައް ފާހަގަކުރައްވާ ވަޒީރު ވިދާޅުވީ މިސަރުކާރުން ފުރަތަމަ ފަތުރުވެރިކަމަށް ރަށްތައް ހުޅުވާލި ފުރުޞަތުގައި ހދ.ވައިކަރަމުރައިދޫގެ 15 ހެކްޓަރު ފަތުރުވެރިކަމުގެ ތަރައްޤީއަށް ހުޅުވާލެއްވި ކަމަށެވެ. އެރަށް މިހާރު އެވޯޑް ކުރެވިފައިވާކަންވެސް ވަޒީރު ފާހަގަކުރެއްވިއެވެ. އަދި ތ.އަތޮޅުގެ ތިން ރަށެއްވެސް ފަތުރުވެރިކަމުގެ ބޭނުމަށް ހުޅުވާލެއްވި ކަމަށް ވަޒީރު ވިދާޅުވިއެވެ. އޭގެތެރެއިން އެއް ރަށަކަށް ޕްރޮޕޯސަލްއެއް ލިބިފައި ނުވާތީ އެރަށް އުނިކޮށް ބަދަލުގައި އެހެން ރަށްތައް އިތުރުކުރެވިފައިވާ ކަމަށް ވިދާޅުވިއެވެ.
ރިއެކްޝަންސް
