ރިވައިވަލް ސްޕޯރޓްސްގެ ބޮޑު ކާމިޔާބީއަށް ރައީސްގެ މަރުހަބާ
ރާއްޖޭގެ ރިވައިވަލް ސްޕޯރޓްސްއިން ބައިނަލްއަޤްވާމީ ދެ މުބާރާތެއްގައި ބޮޑު ކާމިޔާބީއެއް ހޯދުމާ ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަރުހަބާ ވިދާޅުވެއްޖެއެވެ.
ރިވައިވަލް ސްޕޯރޓްސްއިން ވަނީ ބޮޓްސްވާނާގައި އޮތް މުބާރާތާއި, ޒެމްބިޔާގައި އޮތް މުބާރާތުން ދެ ރަން މެޑެލް ހިމެނޭ ގޮތަށް 8 މެޑަލް ހޯދާފައެވެ. ރަން މެޑަލް ހޯދީ ބޮޓްސްވާނާ މުބާރާތުގެ އަންހެން ސިންގަލްސް އިވެންޓްގައި ފާތިމަތު ނަބާހާ އެވެ. އަންހެން ސިންގަލްސް ފައިނަލްގައި ނަބާހާއާ ދެކޮޅަށް ކުޅުނީ ދައްތަ ނަބީހާ އެވެ. އެހެންކަމުން އެއިވެންޓްގެ ރިހި މެޑަލްވެސް ލިބުނީ ރާއްޖެއަށެވެ.
މީގެއިތުރުން މިކްސްޑަބަލްސްގައި ޒަޔާން ޒަކީ އާއި ފާތިމަތު ނަބާހާ ވަނީ ރިހި މެޑަލް ހޯދާފައެވެ. ފިރިހެން ޑަބަލްސްގައި ޒަޔާން އާއި ނިބާލް އަހުމަދު ލޯ މެޑަލް ހޯދި އެވެ. އަންހެން ޑަބަލްސްގައި ނަބާއާއި ނަބީވެސް ލޯ މެޑަލް ހޯދިއެވެ.
ޒެމްބިޔާ މުބާރާތުގެ އަންހެން ޑަބަލްސްއިން ނަބާހާއާއި ނަބީހާގެ ޕެއަރ ވަނީ ރަން މެޑަލް ހޯދާފައެވެ. ސިންގަލްސްގައި ނަބާ ލޯ މެޑަލްވެސް ހޯދިއެވެ. މިކްސް ޑަބަލސްގައި ޒަޔާންއާއެކު ވެސް ނަބާ ލޯ މެޑަލް ހޯދިއެވެ.
މިކާމިޔާބީތައް ފާހަގަކުރައްވާ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ މިއީ ތާރީޚީ ކާމިޔާބީއެއް ކަމަށެވެ. ބެޑްމިންޓަން ވޯލްޑް ފެޑެރޭޝަންގެ މުބާރާތެއްގައި
އަންހެނުންގެ ސިންގަލްސް ފައިނަލުގައި ވާދަކުރަން، ދިވެހިރާއްޖޭގެ އާމިނަތު ނަބީހާ އާއި، ފާޠިމަތު ނަބާހާ ހޮވުމާއެކު، ޗެންޕިއަންކަމާއި ރަނަރއަޕްކަންވެސް ރާއްޖެއަށް ކަށަވަރުވެއްޖެކަން ފާހަގަކުރައްވާ ރައީސް ވިދާޅުވީ ދިވެހި ކުޅުންތެރީން ދައްކަމުންދާ މޮޅު ކުޅުމަށް ޓަކައި ފަޚުރުވެރިކަމާއެކު ސާބަސް ދެއްވާ ކަމަށެވެ.
"މި ޝަރަފް ރާއްޖެއަށް ހޯދައިދިން ހުނަރުވެރި ދެބެއިންނަށާއި، ދިވެހި މުޅި ޓީމަށް ތަހުނިޔާ ދަންނަވަން." ރައީސް ވިދާޅުވިއެވެ.
ރިއެކްޝަންސް
