މަސްތުވާތަކެތީގެ ބޮޑު ދެ އޮޕަރޭޝަނާއި, ރައީސް ދެއްވި ޔަގީންކަން
ކަސްޓަމްސްއިން ވެސް ވަނީ ކިލޯއަކަށްވުރެ ގިނަ މަސްތުވާތަކެތި އަތުލައިގެންފަ
"ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އަޅުގަނޑުމެން އެއްމެ އިސްކަންދޭ އެއްކަންތައް. ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ޝުކުރު ދަންނަވަން" ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއްޔެ ކުރެއްވި ޓްވީޓްގައި ވިދާޅުވެފައި ވެއެވެ.
އެމަނިކުފާނުގެ ޓްވީޓް ގުޅެނީ އިއްޔެ ރާއްޖޭގެ ސަލާމަތީ ޚިދުމަތްތަކުން އަތުލައިގަން 468.6 ކިލޯގްރާމްގެ މަސްތުވާތަކެއްޗާއެވެ. ކަނޑުމަގުން އަތުލައިގަން އެތަކެތީގެ މަގުމަތީގެ އަގު އެއް ބިލިއަން ދިވެހި ރުފިޔާއަށް އަރައެވެ. މަސްތުވާތަކެތީގެ މައްސަލަ މޫލާފައި އޮތް މިންވަރުގެ ކުޑަކުޑަ މިސާލަކަށް ފުދެއެވެ.
މަސްތުވާތަކެތީގެ މައްސަލައަށް ބޮޑު ހައްލެއް މިދައުރުގެ ތެރޭގައި ގެންނަވާނެކަމަށް ރައީސް ގެންދަވަނީ ތަކުރާރުކޮށް ވިދާޅުވަމުންނެވެ. އަދި ހޯމް މިނިސްޓަރ އަލީ އިހުސާންވެސް ގެންދަވަނީ އެވާހަކަ ތަކުރާތުކުރައްވާ ނަތީޖާ ނެރުއްވަމުންނެވެ.
468.6 ކިލޯގެ މަސްތުވާތަކެތި އަތުލައިގަތީ ރާއްޖެ ސަރަހައްދަށް ވަން ލަންކާގެ މަސްބޯޓަކުންނެވެ. މިއޮޕަރޭޝަން ކުރިއަށް ގެންދިޔައީ އެމްއެންޑީއެފްގެ ކޯސްޓްގާޑާއި ދިވެހި ފުލުހުންގެ ޚިދުމަތް ގުޅިގެންނެވެ. އެބޯޓް ހިފެހެއްޓީ ހދ.މަކުނުދޫ ބޭރުން ރާއްޖޭގެ ކޯސްޓްގާޑުންނެވެ. ދަންވަރު ބޯޓް ހިފަހައްޓާ, ބޯޓް ފާސްކުރީ ހެނދުނު ހދ.ކުޅުދުއްށި ބަނދަރަށް ގެންގޮސް އެބަނދަރުގައެވެ.
ފުރަތަމަ މަރުހަލާގެ ޓެސްޓްތަކުން ދައްކާގޮތުން އެބޯޓްގައި ހުރީ 344 ކިލޯގެ މެތާއި, 124.6 ކިލޯގެ ކޮކެއިންއެވެ. ބޯޓްގައި ތިބީ ލަންކާގެ ފަސް މީހުންނެވެ. އެމީހުންނާ ރާއްޖޭގެ ބަޔަކާ ގުޅުން އޮތްކަމަކަށް ފުލުހުން އަދި ނުބުނެއެވެ. އެމްއެންޑީއެފްއިން ބޯޓް ހިފެހެއްޓީ އިންޓެލިޖެންސް މައުލޫމާތުގެ އަލީގައި ކަމަށް ބުންޏެވެ.
އޭގެފަހުން ކަނޑުމަގުން އެތެރެކުރަން އުޅުނު ތިން މިލިއަން ރުފިޔާގެ މަސްތުވާތަކެތި ކަސްޓަމްސްއިން ވެސް ވަނީ ހިފަހައްޓާފައެވެ. އެތަކެތި އަތުލައިގަތީ މާލެ ކޮމާޝަލް ހާބަރަށް ގެނައި ސީފްރައިޓް ޝިޕްމަންޓަކުންނެވެ. މަސްތުވާތަކެތި ހުރީ މުދަލާއެކުކަމަށް ކަސްޓަމްސްއިން ނެރުނު ބަޔާނުގައި ބުނެފައި ވެއެވެ. އެތަކެތި ޕޮޒިޓިވްވެފައިވަނީ މެތުއެމްފެޓަމިން އަށެވެ. އެއީ 1.518 ކިލޯގްރާމެވެ.
ކަސްޓަމްސްއިން އަތުލައިގަން މަސްތުވާތަކެތި ވަނީ ތަހުގީގަށް ފުލުހުންނާ ހަވާލުކޮށްފައެވެ. މިނޫނަސް މިދައުރުގެ ފުރަތަމަ އަހަރުގެ ތެރޭގައި ގިނަ އަދަދެއްގެ މަސްތުވާތަކެތި ވަނީ އަތުލައިގެންފައެވެ.
ރިއެކްޝަންސް
