ޞަލާޙްގެ ދެ ގޯލްއާއެކު ލިވަޕޫލް 8 ޕޮއިންޓްގެ ލީޑެއްގައި, ޔުނައިޓަޑްގެ މެޗު އެއްވަރު
އިނގިރޭސި ޕްރިމިއަރ ލީގުގައި އާދިއްތަ ދުވަހު ލިވަޕޫލް އާއި ސައުތަމްޕްޓަން ކުޅުނު މެޗު 3-2 ން ލިވަޕޫލް ކާމިޔާބުކޮށްފިއެވެ. މި މޮޅާއެކު ތާވަލްގައި ލިވަޕޫލްގެ ލީޑް ވަނީ 8 ޕޮއިންޓަށް ފުޅާވެފައެވެ. މެންޗެސްޓަރ ޔުނައިޓަޑާއި އިޕްސްވިޗް ޓައުން ބައްދަލުކުރި މެޗު ނިމުނީ 1-1 ން އެއްވަރުވެގެންނެވެ. މެޗު ކުޅެމުން ދިޔަ ވަގުތު ސްޓޮކްލޭ ޕާކުގައި ފަޔަރ އެލާމްގެ އާޑާއެކު ވީއޭއާރު ވަނީ ވަގުތުކޮޅަކަށް ހުއްޓިފައެވެ.
މެޗުގައި ފުރަތަމަ ގޯލް ޖަހާ ލީޑު ނެގީވެސް ލިވަޕޫލްއިންނެވެ. 30 ވަނަ މިނިޓްގައި ލީޑު ނަގައިދިނީ ޑޮމިނިކް ޒޮބޮސްލައީ އެވެ. ފުރަތަމަ ހާފު ނިމުމުގެ ކުރިން ސައުތަންޕްޓަން އަށް 42 ވަނަ މިނިޓްގައި ލިބުނު ޕެނަލްޓީ ނަގައިދިނީ އެޑަމް އާމްސްޓްރޯންގ އެވެ. ކީޕަރުގެ ކެއޮއިންހިމް ކެލަރ ގެ އަތުގައި ޖެހިފައި ނިކުއިން ބޯޅަ އަލުން ގޯލުގެ ތެރެއަށް ފޮނުވާލައިގެން ސައުތަމްޓަން އަށް ނަތީޖާ އެއްވަރުކޮށްދިނީވެސް އާމްސްޓްރޯންގ އެވެ. މެޗުގެ 56 ވަނަ މިނިޓްގައި ސައުތަމްޕްޓަން އިން އިތުރު ގޯލެއްޖަހާ ލިވަޕޫލްގެ މައްޗަށް ކުރި ހޯދިއެވެ. އާމްސްޓްރޯންގް ތަނަވަސްކޮށްދިން ފުރުޞަތުގައި ސައުތަމްޕްޓަން އަށް ލީޑު ފުޅާކޮށްދިނީ މެތިއުސް ފާނަންޑޭޒް އެވެ.
65 ވަނަ މިނިޓްގައި ލިވަޕޫލް އަށް ނަތީޖާ އެއްވަރުކޮށްދިނީ މުޙައްމަދު ސަލާޙްއެވެ. ގޯލް ކީޕަރު ހުރި ޕޮޒިޝަންގެ ފައިދާ ނަގާ ސަލާޙް ގޯލް ކާމިޔާބުކުރީ ރަޔަން ގްރަވެންބަރޗް ތަނަވަސްކޮށްދިން ފުރުޞަތެއްގައެވެ. އޭގެ ހަތް މިނިޓްފަހުން ލިވަޕޫލް މެޗުން މޮޅުވި ގޯލްވެސް ކާމިޔާބު ކޮށްދިނީ ސަލާޙްއެވެ. އެއީ ސައުތަމަޕްޓަންގެ ޑިފެންޑަރު ޔުކީ ސުގަވަރާ ސަލާޙްއަށް ކުރި ފައުލަކާ ގުޅިގެން ލިވަޕޫލްއަށް ލިބުނު ޕެނަލްޓީއެކެވެ.
މި ނަތީޖާއާއެކު ކުރިންވެސް ތާވަލްގެ ފުލުގައި އޮތް ސައުތަމްޕްޓަން އަށް ކުރިއެރުމެއް ނުލިބުނު އިރު މެންޗެސްޓާ ޔުނައިޓަޑް އާއި އިޕްސްވިޗް ޓައުންގެ މެޗުން އިޕްސްވިޗް ޓައުން ވަނީ ޕޮއިންޓެއް ހޯދާފައެވެ.
މެންޗެސްޓަރ ޔުނައިޓަޑްގެ އާ ކޯޗު ރުބެން އަމޯރިމްގެ އިރުޝާދުގެ ދަށުން އެޓީމު ކުޅުނު ފުރަތަމަ މެޗުގައި ޔުނައިޓަޑުން ވަނީ މި ސީޒަންގައި އެންމެ އަވަސް ގޯލް ޖަހާފައެވެ. މެޗު ފެށިގެން އެންމެ 81 ވަނަ ސިކުންތުގައި ޔުނައިޓަޑުން ލީޑު ނެގީ މާކަސް ރަޝްފޯޑްގެ ލަނޑުންނެވެ. ފުރަތަމަ ހާފު ނިމުމުގެ ކުރިން އިޕްސްވިޗް ޓައުންއިން ވަނީ ގޯލެއް ކާމިޔާބުކޮށް ނަތީޖާ އެއްވަރުކޮށްފައެވެ. 43 ވަނަ މިނިޓް ގައި އޮމާރީ ހަޗިންސަން ގޯލް ކާމިޔާބު ކުރި ވެސް ބާންސް ތަނަވަސްކޮށްދިން ފުރުޞަތުގައެވެ.
ރިއެކްޝަންސް
