މިއީ އަހަރެން ލިވަޕޫލްގައި ހޭދަކުރާ ފަހު އަހަރު: ސަލާޙް
ލިވަޕޫލަށް ކުޅެމުން އަންނަ މިޞްރުގެ ފޯވާޑް މުޙައްމަދު ޞަލާޙް މިސީޒަނަށްފަހު ލިވަޕޫލް އިން ނުފެންނާނެކަން ޔަޤީންކޮށްދީފިއެވެ. ޞަލާހްގެ އެއްބަސްވުން އާކުރުމާ ގުޅޭގޮތުން ކްލަބާއެކު އެބަސްވަމަކަށް ނާދެވި ވަނީ މަޑުޖެހިފައެވެ. ހުކުރު ދުވަހު ސަލާޙް ބުނެފައިވަނީ އޭނާ މިހާރު ތައްޔާރުވަމުންދަނީ ކްލަބާއެކު ކުޅޭ ފަހު ސީޒަނަށް ކަމަށެވެ.
ލިވަޕޫލްއާއެކު ސަލާޙް ހަދާފައިވާ އެއްބަސްވުން މި ސީޒަން ނިމޭއިރު ހަމަވާނެއެވެ. އޭނާ އާއެކު ޓީމަށް ކުޅެމުން އަންނަ ޓްރެންޓް އަލެކްސަންޑަރ އާނޯލްޑް އާއި ވާޖިލް ވެންޑައިކްގެ އެއްބަސްވުންވެސް ހޫނު މޫސުމުގައި ހަމަވާނެއެވެ.
2017 ން ފެށިގެން ލިވަޕޫލްއަށް ކުޅެމުން އަންނަ 32 އަހަރުގެ ސަލާޙް މިސީޒަންގައި އެކަނިވެސް ވަނީ ލިވަޕޫލްއަށް 17 ގޯލް ކާމިޔާބުކޮށް 13 ގޯލް ޖެހުމުގައި އެހީތެރިވެފައެވެ. ހަ ޕޮއިންޓްގެ ލީޑެއްގައި މިވަގުތު ލީގު ތާވަލްގެ އެއްވަނައިގައި ރަސްކަން ކުރަމުން ދަނީ ލިވަޕޫލްއެވެ.
ސަލާޙްގެ އެއްބަސްވުން އާކުރުމާ މެދު ގޮތެއް ނިންމުމަށް މަޝްވަރާ ކުރަމުންދާތާ ހައެއްކަމަސް ދުވަސް ވެފައިވަނިކޮށް, ހުކުރު ދުވަހު ސަލާހް ވަނީ އޭނާ އާއެކު ކްލަބުން އެއްބަސްވުމަކަށް އާދެވުމަކީ ދުރު މަގެއްކަމުގައި ބުނެފައެވެ.
"މިހާތަނަށް ހަމަސް ފާއިތުވެ މިދިޔައީ އެއްވެސް ކުރިއެރުމެއް ނުލިބި. ކުރިއެރުމެއް ލިބޭނެ މަގެއްވެސް ފެންނާކަށް ނެތް, ދެން ބަލަމާ ވާގޮތެއް" ސްކައި ސްޕޯޓްއަށް ދިން އިންޓަވިއު އެއްގައި ސަލާޙް ބުންޏެވެ.
ފުޓްބޯޅައިގައި ޙާސިލްކުރަން ބޭނުންވާ ކަންކަމާ ގުޅޭގޮތުން ކުރި ސުވާލުގެ ޖަވާބުގައި އޭނާ ބުނީ ފާއިތުވި ހަތް އަހަރު އެކި އިންޓަވިއު ތަކުގައި އޭނާ ބުނެފައި ވާނީ އޭނާ(އަބަދުވެސް) ބޭނުމީ ޗެމްޕިއަންސް ލީގު ހޯދަން ކަމުގައެވެ. ނަމަވެސް ފުރަތަމަ ފަހަރަށް އޭނާ ލިވަޕޫލް އާއެކު ޕްރިމިއާ ލީގު ކާމިޔާބުކުރަން ބޭނުންވާ ކަމުގައިވެސް ސަލާޙް ވަނީ ބުނެފައެވެ.
ރިއެކްޝަންސް
