ވިއްސާރައިގަ ބޮޑަށް އެހީތެރިކަން ބޭނުންވާ 35 ގެއެއް
މާލެއިން 10،000 ޓަނުގެ ފެން ހިންދައިފި
ވިއްސާރައިގަ މާލެއިން ބޮޑަށް އެހީތެރިކަން ބޭނުންވާ 35 ގެއެއް ފާހަގަކުރެވި، އެހީތެރިވުމާއެކު މީހުނަ ބަދަލުކުރަން ޖެހޭ ގެތަކުން މީހުން ބަދަލުކުރުމުގެ މަސައްކަތް ކުރަމުންދާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
ބޯކޮށް ކުރި ވިއްސާރައިގަ މުޅިމާލެ ވަނީ ފެނު އަޑީގައެވެ. މީހުން ދިރިއުޅޭ ގެތަކަށް ފެންވަދެ ބޮޑަތި ގެއްލުންތައް ދަނީ ވަމުންނެވެ. އެންޑީއެމްއޭ އިން ބުނީ މާލޭގައި ފެންބޮޑުވުމާއި ގުޅިގެން ވެލިބަސްދާ ޖެހުމަށާއި އެކި ގޮތްގޮތުން އެހީތެރިކަން ބޭނުންވެގެން 400 އަށްވުރެ ގިނަ ކޯލް ލިބިފައިވާ ކަމަށެވެ. އަދި ރެޕިޑް އެސެސްމަންޓް ހެދުމަށްފަހު ބޮޑަށް އެހީތެރިކަން ބޭނުންވާ 35 ގެއެއްގެ މީހުންނަށް އެހީ ވުމާއި އެހެންތަންތަނަށް ބަދަލު ކުރަން ޖެހޭ މީހުން ބަދަލު ކުރުމުގެ މަސައްކަތް ދަނީ ކުރިޔަށްދާ ކަމަށް ބުންޏެވެ.
އެމްއެންޑީއެފް އިން ބުނީ މާލޭގެ މަގުތަކުގައި ފެން ބޮޑުވެގެން، ފެން ހިންދުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން، މާލޭގެ 6 ސަރަހައްދެއްގައި 16 ޕަންޕު ބަހައްޓައިގެން މަސައްކަތްކުރަމުން ދާކަމަށެވެ. މި މަސައްކަތުގައި މިހާތަނަށް ވަނީ 10،000 އެއްހާ ޓަނުގެ ފެން ހިންދާފައިވާ ކަމަށް ބުންޏެވެ.
ފެން ހިންދުމުގެ މަސައްކަތުގެ އިތުރުން ވެލިބަސްތާ ޖެހުމުގެ މަސައްކަތް ފުލުހުންނާއި މާލެ ސިޓީ ކައުންސިލާއި އަމިއްލަ ފަރާތްތަކުންވެސް ދަނީ ކުރަމުންނެވެ.
ރިއެކްޝަންސް
