ޗެލްސީ ބަލިކޮށް އިޕްސްވިޗް ޓައުން އަށް ތާރީޚީ މޮޅެއް, 50 އަހަރަށްފަހު ފުރަތަމަ ފަހަރަށް ޔުނައިޓަޑް ރެލިގޭޓް ވުމާ ގާތަށް!
އިނގިރޭސި ޕްރިމިއަރ ލީގުގައި އިޕްސްވިޗް ޓައުންއިން 22 އަހަރުގެ ތެރޭގައި ފުރަތަމަ ފަހަރަށް އަމިއްލަ ދަނޑުގައި މޮޅުވެއްޖެ އެވެ. ޗެލްސީ އާއި ބައްދަލުކުރި މެޗު އިޕްސްވިޗް ޓައުން އިން ކާމިޔާބުކުރީ 2-0 ންނެވެ. އިޕްސްވިޗުން އަމިއްލަ ދަނޑުގައި އެންމެ ފަހުން މެޗެއް ކާމިޔާބު ކުރީ 2002 ވަނަ އަހަރު މިޑްލްސްބަރާ ބަލިކޮށްގެނެވެ
އަންގާރަ ދުވަހު މެންޗެސްޓަރ ޔުނައިޓަޑްވެސް ވަނީ ނިއުކާސިލްގެ އަތްދަށުވެފައެވެ. މި ބައްޔާއެކު ރެލިގޭޓް ނުވެ ބައިގަރުނު ހިފަހައްޓާލާފައިވާ ޔުނައިޓަޓް ރެލިގޭޓް ވުމުގެ ފުރުޞަތު ބޮޑުކަމަށް ކޯޗު ރުބެމް އަމޮރިމް ވަނީ ބުނެފައެވެ.
ރޭގެ މެޗުގައި އިޕްސްވިޗް ޓައުން އަށް ލީޑު ނަގައިދިނީ ލިއަމް ޑެލަޕް އެވެ. 12 ވަނަ މިނިޓްގައި ޓީމުގެ ފުރަތަމަ ގޯލް ކާމިޔާބުކުރީ ކީޕަރު ޕިލް ޖޯގެންސަން ކުރި ފައުލަކާ ގުޅިގެން ލިބުނު ޕެނަލްޓީއަކުންނެވެ.
މެޗުގެ 24 ވަނަ މިނިޓްގައި ޗެލްސީއަށް ނަތީޖާ އެއްވަރުކުރެވުނު ކަމަށް ޤަބޫލުކުރެވުނު ނަމަވެސް ކޯލް ޕާމާ ނަގައިދިން ހުރަހަކުން ޔާއޮ ފެލިކްސް ޖެހި ގޯލް ބަލައިނުގަންނަށް ވީއޭއާރުން ވަނީ ނިންމާފައެވެ. ވީއޭއާރުން ނިންމީ އެއީ އޮފްސައިޑް ގޯލެއްކަމުގައެވެ.
އިޕްސްވިޗް ޓައުންގެ ދެވަނަ ގޯލް މެޗުގެ 53 ވަނަ މިނިޓްގައި ކާމިޔާބުކުރީ އޮމާރީ ހަޗިންސަން އެވެ. ޗެލްސީގެ ކުޅުންތެރިއަކު ފަހަތަށް ދިން ބޯޅައެއް ހޯދާ, ގޯލް ޖެހުމުގައި ހަޗިންސަން އަށް އެހީތެރިވީ ވެސް ޑެލަޕްއެވެ.
މި މޮޅާއެކު އިޕްސްވިޗް ޓައުން ލީގު ތާވަލްގެ 18 ވަނައިގައި އޮތީ 19 މެޗުން 15 ޕޮއިންޓް ހޯދައިގެންނެވެ. ޖެހިޖެހިގެން ދެވަނަ ލީގު މެޗުން ބަލިވި ޗެލްސީ 35 ޕޮއިންޓާއެކު ތާވަލް ގެ ހަތަރުވަނަ މަޤާމަށް ވަނީ ވެއްޓިފައެވެ.
އަންގާރަ ދުވަހުގެ ރޭ ނިއުކާސަލް ޔުނައިޓަޑް އިން މެންޗެސްޓަރ ޔުނައިޓަޑް ބަލިކޮށްފައިވަނީވެސް 2-0 ގެ ނަތީޖާއަކުންނެވެ. ޖެހިޖެހިގެން އަމިއްލަ ދަނޑުގައި ތިން މެޗުން ބަލިވެފައިފައިވާ ޔުނައިޓް 50 އަހަރުފަހުން ރެލިގޭޓްވެދާނެ ކަމަށް ކޯޗު ރުބެން އަމޮރިމް ވަނީ ބުނެފައެވެ.
"އަހަންނަށް ހީވަނީ ފުރުޞަތު އެބައޮތްހެން ރެލިގޭޓްވުމުގެ. އަހަރެމެންގެ ސަޕޯޓަރުންނަށްވެސް މިކަން އެބަ ސާފުކޮށްދޭންޖެހޭ" ބީބީސީއަށް އަމޮރިމް ބުނެފައިވެއެވެ. އަމޮރިމް އިތުރަށްބުނީ އޭނާ އާއި ޓީމުގެ ވެސް މައްސަލަ އެބަހުރިކަމަށާއި, ކުއްލިއަކަށް ޓީމިގެ ހާލަތު ބަދަލު ނުކުރެވޭނެ ކަމުގައެވެ.
ރޭގެ މެޗުގައި ނިއުލާސަލްއިން ލީޑުނެގީ މެޗުގެ ވަރަށް ކުރީކޮޅުއެވެ. މެޗުގެ 4ވަނަ މިނިޓްގައި ނިއުކާސަލްގެ ފުރަތަމަ ގޯލް ކާމިޔާބުކުރީ އަލެކްސަންޑާ އިސާކްއެވެ. ފުރަތަމަ ހާފު ނިމުމުގެ ކުރިން ނިއުކާސަލްއިންވަނީ އެމީހުންގެ ދެވަނަ ގޯލްވެސް ކާމިޔާބުކޮށްފައެވެ. 19ވަނަ މިނިޓްގައި އެންތަނީ ގޯޑަން ތަނަވަސްކޮށްދިން ފުރުޞަތުގައި ދެވަނަ ގޯލް ކާމިޔާބުކޮށްދިނީ ޖޮއެލިންޓަންއެވެ.
މެޗުގައި ހަމަލާ އުފައްދާ ގޯލެއް ޖެހޭތޯ ޔުނައިޓަޑުން މަސައްކަތްކުރި ނަމަވެސް އަމަދު ޑިއޯލާ އަދި ކަސެމީރޯ އަށް ލިބުނު ފުރުޞަތުތައް ގޯލަކަށް ބަދަލުކުރުމުގައި ޔުނައިޓަޑް އަށް ވަނީ ނާކާމިޔާބުވެފައެވެ.
މިއީ 1979 ވަނަ އަހަރުގެ ފަހުން ޔުނައިޓަޑްގެ އަމިއްލަ ދަނޑުގައި ޖެހިޖެހިގެން ތިން ލީގު މެޗުން ބަލިވި ފުރަތަމަ ފަހަރެވެ. ރޭގެ ބައްޔާއެކު ޔުނައިޓަޑް އޮތީ 19 މެޗުން 22 ޕޮއިންޓާއެކު ލީގު ތާވަލްގެ 14 ވަނައިގައެވެ. ރެލިގޭޝަން ޒޯނާމެދު އޮތީ އެންމެ 7 ޕޮއިންޓްގެ ފަރަޤެކެވެ.
ނިއުކާސަލްއިން 19 މެޗުން 32 ދެ ޕޮއިންޓާއެކު މެންޗެސްޓަރ ސިޓީ ފަހަތަށް ޖައްސާލާ ވަނީ ތާވަލްގެ 5 ވަނަ މަޤާމަށް ކުރިއަށް ޖެހިލާފައެވެ
ރިއެކްޝަންސް
