އަލް އަރަބި އަތުންވެސް ބަލިވެ މާޒިޔާއަށް ބާރު ގެއްލިއްޖެ
އޭއެފްސީ ޗެލެންޖް ލީގުގައި މާޒިޔާ ކުޅުނު ދެވަނަ މެޗުގައި ކުވެއިތުގެ އަލް އަރަބި އަތުންވެސް ބަލިވެ މާޒިޔާއަށް ފުރުޞަތު ގެއްލިއްޖެ އެވެ.
ކުވެއިތުގައި ކުޅުނު ދެވަނަ މެޗުގައި މާޒިޔާ ބަލިވީ އެގައުމުގެ އަލް އަރަބި ސްޕޯރޓްސް ކްލަބާ ވާދަކޮށް 2-0 ނެވެ. މެޗުގެ ވަރަށް ކުރީކޮޅު ގާތް ގާތުގައި ދެ ލަނޑު ޖަހާ އަލް އަރަބި ސްޕޯރޓްސް ކްލަބުން ލީޑް ނެގިއެވެ. ފުރަތަމަ ލަނޑު ހަތްވަނަ މިނިޓްގައި ޖެހީ ޔޫސުފް މަޖީދު އެވެ. އޭނާ ލަނޑު ޖެހީ ހަމްޒާ ހަބާސް ނަގައިދިން ކޯނަރަކުން ތަނަވަސްވި ފުރުޞަތެއްގައި ބޮލުން ޖަހައެވެ. އޭގެ މިނިޓެއް ފަހުން ދެ ވަނަ ލަނޑު ޖެހީ އަލީ ހަލަފް އެވެ. އޭރިޔާ ތެރެއިން އޭނާ ބޯޅަ ގޯލަށް ފޮނުވާލީ މާޒިޔާގެ ދެ ޑިފެންޑަރުން ކައިރިން ނައްޓާލުމަށްފަހު އެވެ. މެޗުގައި މާޒިޔާއިން އެންމެ ރަނގަޅު ބޯޅައެއް ފޮނުވާލީ ހަމްޒާ މުޙައްމަދު (ހަމްޕު) އެވެ. ހަމްޒާ ސީދާ ގޯލްގެ މެދަށް ފޮނުވާލި ބޯޅަ އަލް އަރަބި ޓީމްގެ ކީޕަރު ދިފާއު ކުރިއެވެ. މެޗުގައި އިތުރު ލަނޑު ޖަހަން އަލް އަރަބި ޓީމަށްވެސް ފުރުޞަތު ލިބުނެވެ. އަދި މާޒިޔާގެ ކީޕަރު ރަނގަޅު ސޭވްތަކެއްވެސް ކުރިއެވެ.
މާޒިޔާ ހިމެނޭ ގްރޫޕް ބީގައި ތުރުކެމްނިސްތާނުގެ ޗެމްޕިއަން އަރްކަޑަގް ވަނީ ދެވަނަ މެޗުވެސް ކާމިޔާބުކޮށްފައެވެ. އެއީ 2-0 ން އަބްދޭޝް ބަލިކޮށްގެންނެވެ. އެމީހުން ވަނީ ފުރަތަމަ މެޗުގައި 2-1 ން މާޒިޔާ ބަލިކޮށްފައެވެ. އެހެންކަމުން 6 ޕޮއިންޓާއެކު އެއްވަނައިގައި އޮތީ އަރުކަޑަގް އެވެ. ޕޮއިންޓެއް ނުލިބި ފުލުގައި އޮތީ މާޒިޔާއެވެ. އަނެއް ދެޓީމްވެސް އޮތީ ތިން ޕޮއިންޓާ އެކުއެވެ.
ރިއެކްޝަންސް
