ސަރުކާރުން މާލީ ހިސާބުތައް ޢާއްމުކޮށްފި
ފާޑުކިއުން ބޮޑުވެފައި ވަނިކޮށް ސަރުކާރުން އެންމެ ފަހުން މާލީ ހިސާބުތައް ޢާއްމުކޮށްފި އެވެ. ރޭގެ ވަގުތެއްގައި ފިނޭންސް މިނިސްޓްރީން މާލީ ހިސާބުތައް ޢާއްމުކޮށްފައި ވަނީ ހަތަރު މަހެއްހާ ދުވަހަށް ފަހުއެވެ.
ދާދިފަހުން ފިނޭންސް މިނިސްޓަރު ކަމާ ހަވާލުވެވަޑައިގެންނެވި މޫސާ ޒަމީރު ވިދާޅުވީ މާލީ ހިސާބުތައް ޢާއްމު ނުކުރެވި ވަނީ ޚަރަދުތައް ރެކޯޑްނ ކުރުމުގައި ހުރި މައްސަލަތަކެއްގެ ސަބަބުން ކަމަށެވެ. އެކަން ހައްލުކޮށް އޮޑިޓް އޮފީހުގެ ރެޕޯރޓް ލިބުމުން ހިސާބުތައް ޢާއްމުކުރައްވާނެ ކަމަށް ރައީސް އޮފީހުގައި ނޫސްވެރިންނާ ބައްދަލުކުރައްވާ ޒަމީރު ވިދާޅުވިއެވެ.
ފިނޭންސް މިނިސްޓްރީން ޢާއްމުކުރި މާލީ ހިސާބުތަކަށް ބަލާއިރު މިއަހަރު މިހާތަނަށް ޚަރަދު ކޮށްފައިވަނީ 40 ބިލިއަން ރުފިޔާއެވެ. މާނައަކީ ސަޕްލިމެންޓްރީ ބަޖެޓެއް ހުށަހެޅީ މިއަހަރަށް ކަނޑައެޅި ބަޖެޓް ހުސް ނުވަނީހެވެ. ނަމަވެސް އެބަޖެޓް ޚަރަދު ކުރި ގޮތް އިނގެން ނެތްކަމަށް ބުނެ އިދިކޮޅުން ފާޑުކިޔައެވެ. މިއަހަރު ސަރުކާރުން ވަނީ ރިކަރަންޓް ޚަރަދަށް 27 ބިލިއަން ރުފިޔާ ހޭދަކޮށްފައެވެ. މިދިޔަ އަހަރުގެ މިމުއްދަތަށް ބަލާއިރު ރިކަރަންޓް ޚަރަދު ބޮޑެވެ.
މިދިޔައަހަރުގެ މިމުއްދަތަށްވުރެ ދައުލަތަށް ލިބުނު އާމްދަނީ ބޮޑު ކަމަށްވެސް މާލީ ހިސާބުތަކުން ދައްކައެވެ. މިއަހަރުގެ މިހާތަނަށް ލިބުނު އާމްދަނީ އަކީ 28 ބިލިއަން ރުފިޔާ އެވެ. މާލީ ހިސާބުތަކަކީ ކޮންމެ ހަފްތާއަކު ފިނޭންސް މިނިސްޓްރީން ޢާއްމުކުރަމުން އައި ހިސާބު ތަކެކެވެ. ނަމަވެސް މިފަހަރު އެހިސާބުތައް ޢާއްމުކޮށްފައި ވަނީ ހަތަރު މަސް ފަހުންނެވެ. އެކަމަކު ދެން ގަވާއިދުން ހިސާބުތައް ޢާއްމުކުރެވޭނެ ކަމަށް ފިނޭންސް މިނިސްޓަރ ވަނީ ވިދާޅުވެފައެވެ.
ރިއެކްޝަންސް
