ގޯއްޗާއި ފްލެޓް ދިނުމުގެ ކަންކަން ހާމަކަން ބޮޑުކޮށް ގެންދިއުމަށް ގޮވާލާ ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފި
ގޯއްޗާއި ފްލެޓް ދިނުން އަވަސްކުރުމަށް ގޮވާލާ ހުށަހެޅި ކުއްލި މައްސަލަ ބަލައިނުގަނެ ރައްޔިތުންގެ މަޖިލިހުން ބޭރުކޮށްލައިފި އެވެ. ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ހުށަހެޅުއްވި ކުއްލި މައްސަލަ ބޭރުކޮށްލީ 46 މެމްބަރުންގެ ވޯޓުންނެވެ. ކުއްލި މައްސަލަ ބަލައިގަންނަން ވޯޓް ދެއްވީ 10 މެމްބަރުންނެވެ.
މީކާއީލް ހުށަހެޅުއްވި ކުއްލި މައްސަލާގައި ފާހަގަކުރައްވާފައި ވަނީ ގުޅިފަޅުން ގޯތި ލިބޭ ފަރާތްތަކުގެ މެދުގައި ގުރުއަތު ނަގާފައި ވަނީ ދެފުށް ނުފެންނަ, ޝައްކު އުފެދޭ ގޮތަށް ކަމަށް ވާތީ ދެފުށް ފެންނަ ހާމަކަން ބޮޑު ގޮތަކަށް އެކަން ކުރިއަށް ގެންދިއުމަށެވެ. އަދި ގޯތީގެ ވެރިފަރާތަށް ގުރު ނެގުމުގެ ފުރުޞަތު ލިބޭ ގޮތަށް އެކަން ކުރިއަށް ގެންދިއުމަށްވެސް ގޮވާލާފައި ވެއެވެ. ކުރީ ސަރުކާރުން ގޯތި ދިނީ ނުހިއްކާ އޮތް ތަނަކުން ކަމަށްބުނެ, މިސަރުކާރުން ގޯތީގެ ގުރު ނެގިއިރުވެސް ނުހިއްކާ އޮތް ތަނަކުންކަން ގޯތި ދީފައިވާކަން މީކާއީލް ހުށަހެޅުއްވި ކުއްލި މައްސަލާގައިފާހަގަކޮށްފައި ވެއެވެ.
އަދި ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓް އިއުލާނުކުރުމަށްވެސް އެކި ތާރީޚުތައް ދީ, އެކަން ނުވެދާދިއުމާމެދު ކަންބޮޑުވުން ފާޅުކޮށް ލިސްޓް ޢާއްމުކުން އަވަސް ކުރުމަށް ގޮވާލާފައި ވެއެވެ. އަދި މިހާރު އަމަލުކުރަމުންދާ ގޮތުން ލިސްޓް ގަޑުބަޑު ކުރަނީ ކަމަށް ބެލުމުގެ ފުރުޞަތު ލިބޭކަން ފާހަގަކުރައްވާފައި ވެއެވެ.
ފްލެޓް ލިސްޓް އިއުލާނުކުރެވޭނެ ކަމަށް ސަރުކާރުން މިހާރު ބުނަނީ އަންނަ ނޮވެމްބަރު މަހުގެ ދެވަނަ ހަފްތާގެ ނިޔަލަށެވެ.
ރިއެކްޝަންސް
