ބިންވެރިޔާ ސްކީމްގެ މައްސަލައިގައި ހިމެނޭ 9 މީހެއްގެ ޕާސްޕޯރޓް ދޫކޮށްލައިފި
ފަޒުލްއާއި ފަޒީލްގެ ޕާސްޕޯރޓް ދުލެއް ނުކުރޭ
ބިންވެރިޔާ ހައުސިންގ ސްކީމްގެ މައްސަލައިގައި ހިމެނޭ 9 މީހެއްގެ ޕާސްޕޯރޓް ދޫކޮށްލައިފި އެވެ.
ގެދޮރުވެރިޔާ ސްކީމްގެ ދަށުން އުޞޫލުން ބޭރުން ހުޅުމާލޭގެ ބިންތަކެއް ދޫކުރި މައްސަލަ ފެންމަތިވެ, އެމައްސަލައިގެ ތަހުގީގަށް ފުލުހުން ވަނީ 15 މީހެއްގެ ޕާސްޕޯރޓް ހިފަހައްޓާފައެވެ. އެއީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި އޭރުގެ ހައުސިންގ މިނިސްޓްރީގެ ބައެއް މުވައްޒަފުންނެވެ. ހައުސިންގ މިނިސްޓްރީ މިހާރު ވަނީ އުވާލާ, އެމިނިސްޓްރީގެ މަސައްކަތްތައް ކޮންސްޓްރަކްޝަން މިނިސްޓްރީ އާއި ފިނޭންސް މިނިސްޓްރީ އަށް ބަދަލުކޮށްފައެވެ.
ފުލުހުން ބުނީ ޕާސްޕޯރޓް ދޫކޮށްލި މީހުންގެ ތެރޭގައި އެޗްޑީސީގެ ކުރީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު އާއި އޭނާގެ ބޭބެ ފަޒީލް ރަޝީދު ނުހިމެނޭ ކަމަށެވެ. ފަޒީލް އަކީ ފެން ކުންފުނީގެ ޑެޕިއުޓީ މެނޭޖިންގ ޑިރެކްޓެރެވެ. އޭނާ ހުރީ ސަސްޕެންޑް ކޮށްފައެވެ. ފަޒުލް ސަސްޕެންޑް ކޮށްފައި ވަނިކޮށް, ވަނީ މަގާމުން އިސްތިއުފާ ދެއްވާފައެވެ.
" މިފިޔަވަޅު އަޅާފައިވަނީ ޕްރޮސެކިއުޓަރ ޖެނެރަލްއާ މަޝްވަރާ ކުރުމަށްފަހު, ޕްރޮސެކިއުޓަރ ޖެނެރަލްގެ ލަފާފުޅުގެ މަތިން" މީޑިޔާއާ ފުލުހުން ހިއްސާކުރި މެސެޖްގައި ވެއެވެ,
މައްސަލައިގެން އެންމެ ބޮޑު ތުހުމަތެއް އަމާޒު ވަނީ ވެސް ފަޒުލް އާއި ފަޒީލް އަށެވެ. އެއީ ފަޒީލް އަށް ބިން ދިން މައްސަލާގައެވެ. ފަޒީލް އަކީ ބިމަށް ޝަރުތު ހަމަވާ މީހެއް ނޫން ނަމަވެސް, އޭނާ އަށް ބިން ދޫކޮށް, ވަށާފާރު ވެސް ހުރީ ރާނާފައެވެ.
އެމައްސަލަ ފެންމަތިވެ, ޕްރޮސެކިއުޓަރ ޖެނެރަލް ވަނީ އަވަސް ތަހުގީގެއް ހިންގަން ފުލުހުންނަށާއި, އޭސީސީ އަށް އަންގާފައެވެ. އޭރުވެސް ފުލުހުން ގެންދިޔައީ މައްސަލަ ތަހުގީގު ކުރަމުންނެވެ. ފުލުހުންގެ ތަހުގީގަށް މައްސަލައިގެ ތުހުމަތު ކުރެވޭ ފަރާތްތަކުގެ އިލެކްޓްރޯނިކް ސާމާނުތައް ހިފަހައްޓާފައެވެ. އަދި ފަޒުލް އާއި ފަޒީލް ދިރިއުޅޭ އެޕާރޓްމަންޓްވެސް ކޯޓް އަމުރެއްގެ ދަށުން ވަނީ ފާސްކޮށްފައެވެ.
ރިއެކްޝަންސް
