ރަޝްފޯޑަށް ޔުނައިޓަޑްގެ ސޮކޮޑުން ޖާގަ ނުލިބެނީ ފެންވަރު ދަށްވުމުން: އަމޮރިމް
މެންޗެސްޓަރ ޔުނައިޓަޑްގެ ފޯވާރޑް މާކަސް ރަޝްފޯޑް އަށް ސްކޮޑުން ޖާގަ ނުދެނީ ޔުނައިޓަޑްގެ ކުޅުންތެރިއެއްގެ ހުންނަންޖެހޭ ފެންވަރު ނެތުމުން ކަމަށް ކޯޗު ރުބެން އަމޮރިމް ބުނެފިއެވެ. އަދި އެފެންވަރަށް އާދެވެންދެން އޭނާ ހުންނާނީ މިހާރު ހުރި ގޮތަށްކަމަށްވެސް އަމޮރިމް ވަނީ ބުނެފައެވެ.
ރަޝްފޯޑް އާ ބެހޭގޮތުން އަމޮރިމް މިހާ ސާފުބަހުން ވާހަކަދެއްކިއިރު ޔުނައިޓަޑް އެންމެ ފަހުން ކުޅުނު ތިން މެޗުންވެސް ރަޝްފޯޑަށް ޖާގަ ދީފައެއް ނުވެއެވެ. އެއީ މެންޗެސްޓަރ ސިޓީ, ޓޮޓްނަމް އަދި ބޯންމައުތްއާ ދެކޮޅަށް ކުޅުނު މެޗުތަކެވެ. އަމޮރިމް އިތުރަށް ބުނެފައިވަނީ އެނާ ކުޅުންތެރިންގެ ފެންވަރު ވަޒަންކުރަނީ ފަރިތަކުރުންތަކުގައި ކުޅުންތެރިންގެ ޕާފޯމަންސަށް ބެލުމަށްފަހުގައި ކަމުގައެވެ.
ރަޝްފޯޑް ދާދި ފަހުން ދިން އިންޓާވިއުއެއްގައި ވަނީ އޭނާ ޔުނައިޓަޑް ދޫކޮށްދާން ބޭނުންވާ ކަމަށް ބުނެފައެވެ. އެކަމާ ގުޅިގެންވެސް އަމޮރިމް ވަނީ ވާހަކަ ދައްކާފައެވެ. އަދި 27 އަހަރުގެ ކުޅުންތެރިޔާ ވަކިގޮތަކަށް ނިންމަންދެން އޭނާ އެއްފަރާތެއްގައި ބަހައްޓަން އޭނާއަށްވެސް ހިތްހަމަ ޖެހޭކަމަށް އަމޮރިމް ވަނީ ބުނެފައެވެ.
"އަހަރެން އޭނާއާ ކޮންމެ ދުވަހަކުވެސް ވާހަކަ ދައްކަން. އިންޓަވިއު އާ ބެހޭގޮތުންނެއް ނޫން. އޭނާގެ ޕާފޯމަންސްއާ ގުޅޭގޮތުން. އަހަންނަށް އެއީ އެންމެ ރަނގަޅު ވަގުތުކަމަށް ގަބޫލުކުރެވުމުން ބަދަލުކުރަންޖެހޭ ކަންކަން އަހަރެން ބަދަލުކުރާނަން. އެހިސާބަށް ދިއުމާހަމައަށް އަހަންނަށް އެންމެ މުހިންމުވާނީ ޓީމަށް އެންމެ ރަނގަޅު ގޮތް" ރަޝްފޯޑް އާ ބެހޭގޮތުން ނޫސްވެރިން ކުރި ސުވާލުތަކަށް ޖަވާބުދެމުން އަންގާރަ ދުވަހު އަމޮރިމް ބުނެފައި ވެއެވެ.
ފާއިތުވި ތިން މެޗުގައި އަމޮރިމްގެ ސްކޮޑުން ރަޝްފޯޑް ފެނިފައި ނުވުމުން ނޫސްވެރިންގެ ގިނަ ސުވާލުތަކެއް އެކަމާ ގުޅޭގޮތުން ވަނީ ނޫސް ކޮންފަރެންސްގައި އަމޮރިމްއަށް ވަނީ އަމާޒުވެފައެވެ.
ރިއެކްޝަންސް
