އެޗްޑީސީން ގެއްލުނު 5 ލެޕްޓޮޕް ހޯދައިފި
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑިސީ) އިން ގެއްލުނު 5 ލެޕްޓޮޕް ހޯދައިފި އެވެ.
ފަސް ލެޕްޓޮޕް ވަގަށްނެގީ ހުޅުމާލެ ދޭކާ އެއްފަޅެއްގައި އޮންނަ ފަރުކޮޅުފުށީގައި ހުންނަ އެޗްޑީސީގެ އޮފީހުންނެވެ. ފުލުހުން ރޭ ދަންވަރު ބުނީ ލެޕްޓޮޕްތައް މިހާރު ހޯދިފައިވާ ކަމަށެވެ.
ލެޕްޓޮޕްތައް ފެނުމުގެ ކުރިން ފުލުހުން ވަނީ އެވައްކަން ކުރިކަމަށް ތުހުމަތުކުރެވޭ މީހާ މަސްތުވާތަކެތީގެ މައްސަލައެއްގައި ފުލުހުންގެ ހައްޔަރުގައި ހުރި ކަމަށް ބުނެފައެވެ. އަދި އޭނާގެ ފަރާތުން ފުލުހުންނަށް އެއްބާރުލުން ލިބޭ ކަމަށްވެސް ބުންޏެވެ.
ފުލުހުން ބުނީ "ފަސް ލެޕްޓޮޕް މިހާރު ވަނީ ރިކަވާ ކުރެވިފަ" ކަމަށެވެ.
އެޗްޑީސީގެ ލެޕްޓޮޕްތަކެއް ވަގަށް ނަގާފައި މިވަނީ އުސޫލުން ބޭރުން ބިންތަކެއް ދޫކުރި މައްސަލަ ފެންމަތިވެ, އެމައްސަލައިގެ ޖިނާއީ ތަހުގީގެއް ކުރަމުން ދަނިކޮށެވެ. އަދި އެމައްސަލައާ ގުޅިގެން އެޗްޑީސީން ބައެއް މުވައްޒަފުން ވަކިވެސް ކޮށްފައި ވަނިކޮށެވެ. ބޯޑް މެމްބަރުން ހިމެނޭ ގޮތަށް ސީނިއަރ މެނޭޖްމަންޓްގެ ބައެއް މުވައްޒަފުން ސަސްޕެންޑް ވެސް ކުރިއެވެ.
ސަސްޕެންޝަންގައި ހުންނަވަނިކޮށް އޭރުގެ މެނެޖިންގ ޑިރެކްޓަރ އިބްރާހީމް ފަޒުލް ރަޝީދު ވަނީ މަގާމުން އިސްތިއުފާވެސް ދެއްވާފައެވެ. ބަދަލުގައި އައްޔަން ކުރެއްވި އާ އެމްޑީ މައުރޫފް ޖަމީލް އިއްޔެ ވަނީ ފުލުހުންނާއެކު ބައްދަލުވެއް ކުރައްވާފައެވެ.
ރިއެކްޝަންސް
