ރެއާލްގެ މޮޅާއެކު ލީގުގެ ވާދަވެރިކަން ބޮޑުވެއްޖެ! ޖީސަސް ނަވާސް ގެ ފަހު ފެނިލުން
ސްޕެނިޝް ލަލީގާގައި ހޯމަ ދުވަހު ސެވިއްޔާއާ ބައްދަލުކުރި މެޗު 4-2 ން ރެއާލް މެޑްރިޑް ކާމިޔާބުކުރުމާއިއެކު ލީގުގެ ވާދަވެރިކަން ބޮޑުވެއްޖެއެވެ. ރެއާލުން އެއްވަނައިގައި އޮތް އެތްލެޓިކޯ މެޑްރިޑާއި އޮތް ފަރަގު އެއްޕޮއިންޓަށް ކުޑަކޮށްފައި ވާއިރު ލީގު ޑޮމިނޭޓްކުރަމުން އައި ބާސެލޯނާ ވަނީ ތާވަލްގެ ތިންވަނަ އަށް ވެއްޓިފައެވެ.
މެޗު ޑޮމިނޭޓްކޮށްގެން ކުޅުނު ރެއާލުން ފުރަތަމަ ހާފު ނިންމާލީވެސް ދެ ގޯލްގެ ލީޑެއްގައި އޮވެއެވެ. މެޗުގެ ދިހަ ވަނަ މިނިޓްގައި ރެއަލްއަށް ލީޑް ނަގައިދިނީ ކީލިއަން އެމްބާޕޭއެވެ. އޭގެ ދިހަ މިނިޓްފަހުން އެޑުއާޑޯ ކަމަވިންގާ ތަނަވަސްކޮށްދިން ފުރުޞަތެއްގައި ރެއާލްއަށް ލީޑު ފުޅާކޮށްދިނީ ފެޑްރީކޯ ވަލްވާޑޭ އެވެ. އެމްބާޕޭ އަދި ވަލްވާޑޭގެ ގޯލަކީވެސް ވަރަށް ދުރުން ފޮނުވާލި ދެ ބޯޅައެވެ.
ރެއާލްގެ ތިންވަނަ ގޯލް 34ވަނަ މިނިޓްގައި ކާމިޔާބުކޮށްދިނީ ފުރަތަމަ ގޯލް ޖެހުމުގައި އެހީތެރިވި ރޮޑްރީގޯ ގޮއެސްއެވެ. ތިންވަނަ ގޯލް ކާމިޔާބުކުރުމުގައި ބްރަހިމް ޑިއަޒް އާއި ލޫކަސް ވަޒްކޭޒް މުހިއްމު ދައުރެއް އަދާކުރިއެވެ. ނަމަވެސް ޖެހިގެން އައި މިނިޓްގައި ސެވިއްޔާއިން ގޯލެއް ކާމިޔާބުކުރުމާއިއެކު މެޗުގެ ވާދަވެރިކަން ބޮޑުވިއެވެ. ހުއަންލޫ ސަންޗޭޒް ނަގައިދިން ހުރަހެއްގައި ސެވިއްޔާގެ ފުރަތަމަ ގޯލް ކާމިޔާބުކުރީ އިސާކް ރޮމޭރޯއެވެ. ރެއާލް އަމިއްލަ ދަނޑުގައި ކުޅުނު މި މެޗުގައި ހަތަރުވަނަ ގޯލް53ވަނަ މިނިޓްގައި ބްރަހަމް ޑިއަޒް ކާޏިޔާބުކުރީ އެމްބާޕޭ ތަނަވަސްކޮށްދިން ފުރުޞަތެއްގައެވެ.
ސެވިއްޔާގެ ފަހު ގޯލް ކާމިޔާބުކުރީ މެޗުގެ 85ވަނަ މިނިޓްގައެވެ. ޑޯޑީ ލުކެބާކިއޯ އަށް ގޯލް ކާމިޔާބުކުރުމުގައި އެހީތެރިވި ޖެރާޑް ޕީކޭ އެވެ.
މެޗުގައި ސެވިއްޔާގެ ކެޕްޓަން, ޖީސަސް ނަވާޒް ވަނީ އޭނާ ފުޓުބޯޅައިން ރިޓަޔާކުރުމުގެ ކުރިން އެންމެ ފަހުގެ ފެނިލުމަށް ބަދަލު ކުޅުނަތެރިއެއްގެ ގޮތުގައި ކުޅެން ނިކުމެފައެވެ. އެއާއެކު މުޅި ދަނޑުގައި ތިބި އެންމެން ކޮޅަށް ތެދުވެ މީގެ 20 އަހަރުކުރިން ސެވިއްޔާ އާއެކު ބާނަބެއުގައި އޭނާގެ ފުރަތަމަ މެޗު ކުޅުނު ޖީސަސް ނަވާސް އަށްވަނީ އިޙްތިރާމް އަދާކޮށްފައެވެ. ސެވިއްޔާއަށް 705 މެޗު ކުޅެދިން ނަވާސް އަކީ ވޯލްޑް ކަޕް, ޔޫރޯ އަދި ޔުއެފާ ނޭޝަންސް ލީގު ކާމިޔާބުކުރި ސްޕެއިންގެ ހަމައެކަނި ކުޅުންތެރިޔާއެވެ. ނަވާސް ރަސްމީކޮށް ފުޓްބޯޅަ އާ އަލަވަދާއު ކިޔާނީ މިޑް-ސީޒަންގައެވެ.
ރިއެކްޝަންސް
