މަގާމުތަކަށް މީހުން އައްޔަންކުރަނީ ވައްކަންކޮށް ކޮރަޕްޝަން ހިންގާކަށް ނޫން: ރައީސް
މިއީ އެޗް.ޑީ.ސީގެ ބޮޑު ޚިޔާނާތް ފަޅާއެރިފަހުން ރައީސުލްޖުްމހޫޜިއްޔާ ނޫސްވެރިންނާ ވާހަކަ ދެއްކެވި ފުރަތަމަ ފަހަރު
ދައުލަތުގެ މަގާމުތަކަށް މީހުން ލައްވަނީ ވައްކަން ކުރައްވަން ނޫން ކަމަށާއި އެފަދަ ކަމެއް ކުރައްވާކަން އެނގިވަޑައިގެންފި ނަމަ އެކަން ހުއްޓުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ސަރުކާރުގައި ދައުލަތުގެ މަގާމުތަކަށް މީހުން އައްޔަން ކުރައްވަނީ ވައްކަންކޮށް ކޮރަޕްޝަން ހިންގެވުމަށް ނޫން ކަމަށާއި އެފުރުސަތު ނުދެއްވާނެ ކަމަށެވެ.
އެޗް.ޑީ.ސީގެ ބޮޑު ޚިޔާނާތް ފަޅާއެރުމަށްފަހު ނޫސްވެރިންނާ ފުރަތަމަ ފަހަރަށް ވާހަކަ ދައްކަވަމުން ރައީސުލްޖުމްހޫރިއްޔާ ވިދާޅުވީ މަގާމުތަކަށް މީހުން އައްޔަންކުރަނީ ގާނޫނާ ގަވާއިދާ އެއްގޮތަށް މަސައްކަތް ކޮށް ރައްޔިތުންނަށް ޚިދުމަތް ކުރަން ކަމަށާއި އެނޫން ގޮތަކަށް އެކަން ކުރާނަމަ އެކަން ހުއްޓުވާނެ ކަމަށާއި ނުވަތަ އެފަދަ މީހަކު އެތަނުން ދުރުކުރައްވާނެކަމަށެވެ.
ރައީސް ވިދާޅުވީ ސަރުކާރަކުން ކަންކުރަންޖެހޭނީ އެގޮތަށް ކަމަށް ދެކެވަޑައިގަންނަވާ ކަމަށެވެ.
އަދި ކުރީގެ ސަރުކާރުތަކުން ކޮށްފައިވާ ކަމަކަށް ޖަވާބުދާރީ ވާނީ އެބޭފުޅުން ކަމަށާއި މި ސަރުކާރުން މިނިސްޓްރީއެއްގައިވިޔަސް ކުންފުންޏެއްގައިވިޔަސް ކޮރަޕްޝަނަށް ޖާގައެއް ނުދެއްވާނެ ކަމަށެވެ.
ގާނުނާ ގަވާއިދާ ޚިލާފަށް ނޫފޫޒު ބޭނުން ކޮށްގެން އަމިއްލަ ފައިދާއަށް އެއްވެސް ކަމެއް ކުރުމަކަށް ޖާގަ ނުދެއްވާނެ ކަމަށް ވިދާޅުވެ ރައީސް ވަނީ ކޮރަޕްޝަނަށް ޒީރޯ ޓޮލަރެންސް ގެންގުޅުއްވާނެ ކަމަށް އެމަނިކުފާނު ގެންގުޅުއްވާ ސްޓޭންޑްގައި ހިފަހައްޓަވައިގެން ހުންނެވިކަމުގެ ޔަގީންކަން މިއަދުވެސް ރައްޔިތުންނަށް ދެއްވާފައެވެ.
ރިއެކްޝަންސް
