ދެވަނަ ހާފްގައި އިއްބެ ޖެހި ލަނޑު ތަކާއެކު އައްޑޫ ސިޓީ ކްއާޓާ ފައިނަލަށް
ދެވަނަ ހާފްގައި އިބްރާހީމް ވަހީދު ހަސަން (އިއްބެ) ޖެހި ލަނޑު ތަކާއެކު ޅ.ނައިފަރުން ބޮޑު ތަފާތަކުން ބަލިކޮށް, ނައިންޓީ ޕްލަސް ގޯލްޑްކަޕްގެ ކްއާޓާ ފައިނަލުން އައްޑޫ ސިޓީ ޖާގަ ހޯދައިފިއެވެ.
އައްޑޫ ސިޓީން ކްއާޓާ ފައިނަލަށް ދަތުރުކުރީ 7-2 ން ނައިފަރު ބަލިކޮށްގެންނެވެ. ދެ މެޗުން އައްޑޫ ސިޓީ ވަނީ 4 ޕޮއިންޓް ހޯދާފައެވެ. ގްރޫޕްގެ އެއްވަނަ ޓީމަކީވެސް އައްޑޫ ސިޓީއެވެ. ނައިފަރާ ދެކޮޅަށް ކުޅުނު މެޗުގެ ފުރަތަމަ ހާފް ނިމުނީ 2-2 ން އެއްވަރު ވެގެންނެވެ. މެޗުގައި ފުރަތަމަ ކުރި ހޯދީ ނައިފަރުންނެވެ. ނައިފަރަށް ލީޑް ނަގައިދިނީމުޙައްމަދު އިޒާން އަލީ އެވެ. އޭގެ ދިހަ މިނިޓްފަހުން އައްޑޫ ސިޓީއަށް ނަތީޖާ ހަމަހަމަ ކޮށްދިނީ ހާޒިމް ފައުޒީ އެވެ. ފުރަތަމަ ހާފްގައި އިއްބެ ލަނޑު ޖަހާ އައްޑޫ ސިޓީއަށް ކުރި ހޯދައިދީފައި ވަނިކޮށް, ހާފް ނިމުމުގެ ކުރިން ނައިފަރުން ނަތީޖާ ހަމަހަމަ ކުރީ ހުސައިން ފައިސަލްގެ ލަނޑުން ނެވެ.
އެކަމަކު ދެވަނަ ހާފްގައި ފެނުނީ މުޅިން ތަފާތު އައްޑޫ ސިޓީއެކެވެ. ދެވަނަ ހާފަށް ނިކުމެ އިއްބެ ހަތަރު ލަނޑު ޖެހިއެވެ. އޭގެ ފަހުން އިސްމާއީލް އީސާ އައްޑޫ ސިޓީގެ ހަތްވަނަ ލަނޑު ޖެހިއެވެ.
މެޗަށް ނިކުއިންއިރުވެސް ނައިފަރު ވަނީ ކްއާޓާ ޔަގީންވެފައެވެ. އެކަމަކު މެޗުން ތަފާތު ބޮޑުކޮށް ނައިފަރު މޮޅުވި ނަމަ އައްޑޫ ކަޓާ މީދޫއަސް ފުރުޞަތު ލިބުނީހެވެ. މިނަތީޖާއާއެކު ދ.މީދޫ ކެޓީއެވެ.
ރިއެކްޝަންސް
