ރެއާލް އާއި ޕީއެސްޖީން ކުރިއެރުން ހޯދިއިރު ލިވަފޫލްގެ ރެކޯޑް ކުރިއަށް
ޔުއެފާ ޗެމްޕިއަންސް ލީގުގައި އަންގާރަ ދުވަހު ރެއާލް މެޑްރިޑް އާއި ޕީއެސްޖީން ކުޅުނު މެޗުތަކުން މޮޅުވެ ތާވަލްގެ ކުރިއަށް ޖެހިލިއިރު ލިވަޕޫލްއިން ވަނީ 1-0 ން ޖިރޯނާ ބަލިކޮށްފައެވެ. މިއާއެކު ލިވަޕޫލްއިން މިފަހަރުގެ މުބާރާތުގައި ދަމަހައްޓަމުން އައި ސައްތައިން ސައްތަ މޮޅުވުމުގެ ރެކޯޑް ދަނީ ކުރިއަށެވެ. އެޓްލާންޓާގެ ދަނޑުގައި އެޓީމާ ދެކޮޅަށް ރެއާލް ކުރި ހޯދީ 3-2 ން ނެވެ. އަދި ސަލްޒްބާގްގެ ދަނޑުގައި ޕީއެސްޖީން މޮޅުވީ 3-0 ޖެ ނަތީޖާ އަކުންނެވެ.
އަންގާރަ ދުވަހު ރެއާލް އެޓްލާންޓަގެ މައްޗަށް ކުރި ހޯދި މެޗުގައި ރެއާލްގެ ފުރަތަމަ ގޯލް ކާމިޔާބުކުރި ކީލިއަން އެމްބާޕޭއަށް އަނިޔާވެ ވަނީ ކުޅުމާ ދުރަށް ގޮސްފައެވެ. އެމްބާފޭ ދަނޑުން ފޭބީ ޗެމްޕިއަންސް ލީގުގައި އޭނާ ކާމިޔާބުކޮށްދިން 50 ވަނަ ގޯލް ޖެހިތާ ވިއްސަކަށް މިނިޓް ފަހުންނެވެ. އޭނާގެ ބަދަލުގައި ކުޅެން ނިކުތީ ރޮޑްރީގޯއެވެ.
ފުރަތަމަ ހާފުގެ އިތުރު ވަގުތުގެ ދެވަނަ މިނިޓްގައި އެޓްލާންޓާއިން ނަތީޖާ އެއްވަރުކުރީ ޕެނަލްޓީއަކުންނެވެ. ރެއާލް އަށް އަލުން ލީޑު ނަގައިދިނީ 56 ވަނަ މިނިޓްގައި ވިނީޝިއުސް ޖޭއާރުއެވެ. އަދި މެޗުން ރެއާލް މޮޅުވި ގޯލް 59 ވަނަ މިނިޓްގައި ކާމިޔާބުކޮށްދިނީ ދެވަނަ ގޯލް ކާމިޔާބުކުރުމުގައިވެސް އެހީތެރިވި ޖޫޑް ބެލިންގހަމްއެވެ. އެޓާލާންޓާގެ ދެވަނަ ގޯލް 65 ވަނަ މިނިޓްގައި ކާމިޔާބުކުރީ އެޑެމޮލާ ލޫކްމަން އެވެ.
މިމޮޅާއެކު ރެއާލް ވަނީ ހަ މެޗުން 9 ޕޮއިންޓް ހޯދާ ތާވަލްގެ 18 ވަނައަށް ޖެހިލާފައެވެ. ޕީއެސްޖީން އާރު ބީ ސަޒްލްބާގް މައްޗަށް ކުރި ހޯދާ 7 ޕޮއިންޓާއެކު ލީގުގެ 24 ވަނައަށް ވަނީ ކުރިއަށް ޖެހިލާފައެވެ. އެއީ ދެވަނަ ބުރަށް ދިއުމުގެ ޕްލޭއޮފްގެ ފަހު ޖާގަ ލިބޭ ފަހު މަޤާމެވެ.
އަންގާރަ ދުވަހުގެ ރޭ ސަޒްލްބާގް އާ ދެކޮޅަށް ކުޅުނު މެޗުގައި ޕީއެސްޖީގެ ފުރަތަމަ ގޯލް މެޗުގެ 30ވަނަ މިނިޓްގައި ކާމިޔާބުކުރީ ގޮންޒަލޯ ރާމޯސް އެވެ. 72 ވަނަ މިނިޓްގައި ޕީއެސްޖީއަށް ލީޑު ފުޅާކޮށްދިނީ ނުނޯ މެންޑޭސް އެވެ. ޑެސައިއާ ޑޯއު ގޯލް ކާމިޔާބު ކޮށްދިނުމަށް އެހީތެރިވިއިރު އޭނާ ވަނީ މެޗުގައި ޕީއެސްޖީގެ ތިންވަނަ ގޯލް 85 ވަނަ މިނިޓްގައި ކާމިޔާބުކޮށްފައެވެ. އެއީ އަޝްރަފް ހަކީމީ ތަނަވަސްކޮށްދިން ފުރުޞަތެއްގައެވެ.
ލިވަޕޫލްއިން އަންގާރަ ދުވަހު ޖިރޯނާ ބަލިކުރި މެޗުގައި އެޓީމުގެ ހަމައެކަނި ގޯލް ޕެނަލްޓީއަކުން ކާމިޔާބުކޮށްދިނީ މުޙައްމަދު ޞަލާޙްއެވެ. އެއީ ދެވަނަ ހާފުގައި މެޗުގެ 63 ވަނަ މިނިޓްގައެވެ. މެޗުގައި ލިވަޕޫލްއަށް ލީޑު ފުޅާކުރާނެ ރަނގަޅު ފުރުޞަތެއް ލިބުނު ނަމަވެސް ޑާވިން ނުނޭޒް އަށް އެ ފުރުޞަތުގެ ބޭނުންހިފޭގޮތެއް ނުވިއެވެ.
މި ނަތީޖާ އާއެކު ލީގުގެ އެއްވަނަ މަޤާމް ދަމަހައްޓަމުން އަންނަ ލިވަޕޫލް އިން ތާވަލްގެ އެންމެ ކުރީގައި އޮތީ ހަ މެޗުން 18 ޕޮއިންޓާއެކުއެވެ. އަންގަރާ ދުވަހުގެރޭ އިންޓަރ މިލާން އަތުން 1-0 ން މޮޅުވި ބަޔާން ލެވަކޫސަން ތާވަލްގެ 13 ޕޮއިންޓާއެކު ދެވަނައިގައި އޮތްއިރު ހަ މެޗުން 13 ޕޮއިންޓާއެކު ތިން ވަނައިގައި އޮތީ އެސްޓާން ވިލާއެވެ.
ރިއެކްޝަންސް
