ޔުނައިޓަޑުން ދޫކޮށްލި ރަޝްފޯޑުގެ ބޮޑު ހިއްސާއަކާއެކު އެސްޓަންވިލާ އެފްއޭ ކަޕް ސެމީއަށް
އެފްއޭ ކަޕްގެ ކުއާޓަރ ފައިނަލްގައި އާދިއްތަ ދުވަހު ޕްރެސްޓެން ނޯތް އެންޑް 3-0 ން ބަލިކުރި މެޗުގައި މާކަސް ރަޝްފޯޑުގެ ދެ ގޯލާއެކު އެސްޓަންވިލާއިން ސެމީ ފައިނަލްއަށް ދަތުރުކޮށްފިއެވެ. އެޕްރީލް މަހު ފަހުކޮޅު ވެމްބްލޭގައި ކުޅޭ ސެމީ ފައިނަލްގައި އެސްޓަންވިލާ ނިކުންނާނީ ކްރިސްޓަލް ޕެލަސް އާ ދެކޮޅަށެވެ.
ދުނިޔޭގެ އެންމެ ދުވަސްވީ ޤައުމީ މުބާރާތުގެ ތަށި 68 އަހަރުގެ ތެރޭގައި ފުރަތަމަ ފަހަރަށް އުފުލާލަން ވިލާއިން ތައްޔާރުވަމުންދާއިރު ދެވަނަ ސެމީގައި ވާދަކުރާނީ މެންޗެސްޓަރ ސިޓީ އާއި ނޮޓިންގްހަމް ފޮރެސްޓެވެ.
ލޯނު އެއްބަސްވުމުގެ ދަށުން މެންޗެސްޓަރ ޔުނައިޓަޑުން ވިލާއަށް ބަދަލުވުމަށްފަހު ރަޝްފޯޑް ވަނީ ވިލާއަށް އޭނާގެ ފުރަތަމަ ގޯލް ކާމިޔާބުކޮށްދީފައެވެ. 59 ވަނަ މިނިޓްގައި ލޫކަސް ޑައިނޭ ތިރިތިރިން ދިން ޕާސް ގޯލްގެ ތެރެއަށް ފޮނުވާލައިގެން މެޗުގެ ފުރަތަމަ ގޯލް ކާމިޔާބުކުރީވެސް ރަޝްފޯޑް އެވެ. 64 ވަނަ މިނިޓްގައި ވިލާއަށް ލިބުނު ޕެނަލްޓީ ކާމިޔާބުކޮށް ލީޑު ފުޅާކޮށދިނީވެސް ރަޝްފޯޑެވެ.
ލޫކަސް ޑައިނޭ ތަނަވަސްކޮށްދިން ފުރުޞަތު ހިތްގައިމު ގޯލަކަށް ބަދަލުކޮށް ވިލާއިން ތިންވަނަ ގޯލް ކާމިޔާބުކުރީ 71 ވަނަ މިނިޓްގައި ޖޭކޮބް ރަމްސޭއެވެ.
މިއީ 15-2014 ގެ ސިޒަންގެ ފަހުން ވިލާއިން އެފްއޭ ކަޕް ސެމީގައި ވާދަކުރާ ފުރަތަމަ ސީޒަނެވެ. އެފަހަރު ސެމީގައި ލިވަޕޫލް ބަލިކޮށް ފައިނަލްގައި އާސެނަލް އަތުން ވިލާ ބަލިވީ 4-0 ންނެވެ.
ރިއެކްޝަންސް
