ގޮނޑި ގެއްލޭ މެމްބަރުން ހޮވަން އެހީވުމަށް އެމްޑީޕީގެ ގައުމީ މަޖިލިހުން އިގުރާރު ވެއްޖެ

މިދަރުގުގެ ތެރެއިން ގޮނޑި ގެއްލޭ ރައްޔިތުންގެ މަޖިލިހުގެ މެމްބަރުން ހޮވަން އެހީވުމަށް އެމްޑީޕީގެ ގައުމީ މަޖިލިހުން އިގުރާރު ވެއްޖެއެވެ. ރޭ ކާނިވާ ސަރަހައްދުގައި ކުރިއަށް ގެންދިޔަ އެމްޑީޕީފެ ގައުމީ މަޖިލިހުގެ ބައްދަލުވުމުގައި މެމްބަރުންގެ އިއްތިފާގުން އެގޮތަށް އެގަރާރު ފާސްކުރީ ރައްޔިތުންގެ މަޖިލިހުން މިފަހުން ފާސްކުރި ޤާނޫނަށް ރިއާޔަތްކޮށެވެ.

އެމްޑީޕީގެ ކޮލަމާފުށި ދާއިރާގެ ރައީސް އަދި ޤާނޫނީ ވަކީލް މަހުފޫޒް ސައީދު ހުށަހެޅުއްވި ގަރާރުގައި ބުނަނީ އެއްވެސް މެމްބަރަކު ޕާޓީން ވަކިކޮށްގެން ނުވަތަ އިސްލާހީ މަސައްކަތް ކުރުމަށް އެމްޑީޕީއާ ގުޅިގެން ގޮނޑި ގެއްލިއްޖެ ނަމަ ބައި އިލެކްޝަންގައި އެމެމްބަރަކުން ކެންޑިޑޭޓެއްގެ ގޮތުން ވާދަކުރާ ހާލަތުގައި އެކެންޑިޑޭޓަށް ތާއީދުކުރުމަށް އިގުގާރު ވާކަމަށެވެ. މުޅި ގަރާރު ބިނާކޮށްފައިވަނީ ސަރުކާރުން ހުށަހަޅުއްވައިގެން މަޖިލިހުން ފާސްކުރި ޤާނޫނާއެވެ. އެއީ ޕާޓީން މެމްބަރަކު ވަކިކޮށްފިނަމަ ނުވަތަ ޕާޓީ ބަދަލުކޮށްފިނަމަ މެމްބަރު ކަމުގެ ގޮނޑު ގެއްލޭނެ ކަމަށް ގެނައި ބަދަލެވެ.

ގަރާރުގައި ބުނެފައިވަނީ އެގެނައި ބަދަލުގެ ސަބަބުން މަޖިލިހުގައި މެމްބަރުން މިނިވަންކަމާއެކު މަސައްކަތް ކުރުމުގެ އިހުތިޔާރު ގެއްލިފައިވާ ކަމަށެވެ. އަދި އެއީ ގާނުނު އަސާސީގެ އޮނިގަނޑާވެސް ހިލާފް އިސްލާހެއް ކަމަށް ޤާނޫނީ ވަކީލް ހުށަހެޅުއްވި ގަރާރުގައި ފާހަގަކޮށްފައި ވެއެވެ. ޤާނޫނު އަސާސީ ކުރިން އޮތްގޮތަށް ރުޖޫއަ ކުރުމަށް ކުރަން ޖެހޭ މަސައްކަތްތައް އެކަމުގައި ބައިވެރިވާން ބޭނުންވާ ހުރިހާ ފަރާތްތަކާއެކު ފުޅާދާއިރާއެއްގައި މުޅި ރާއްޖޭގައި ކުރުމަށްވެސް އެގަރާރުގައި ބުނެފައިވެއެވެ.

މަހުފޫޒްގެ ގަރާރުގެ އިތުރުން ކުރީގެ ޑިފެންސް މިނިސްޓަރ މާރިޔާ ދީދީ ހުށަހެޅުއްވި ޕެޓިޝަނެއްވެސް ގައުމީ މަޖިލިހުގެ ޖަލްސާގައި ބައިވެރިވި 89 މެމްބަރުންގެ އިއްތިފާގުން ފާސްކުރިއެވެ. އެއީ ޤާނޫނު އަސާސީއަށް އެގެނައި ބަދަލު ބާތިލްކުރަން ގޮވާލާ އަމުރެއްގެ ގޮތުގައި ހުށަހެޅި ޕެޓިޝަނެކެވެ. އެޕެޓިޝަންގައި ބުނެފައިވަނީ ރައްޔިތުންގެ ރުހުން ނެތި ގެނައި ބަދަލު ބާތިލް ކުރުމަށާއި, ރައްޔިތުންގެ ބާރު ނެތިގެން ހިނގައިދާނެ އެއްވެސް ކަމެއް ނުކުރުމަށް ރައީސުލްޖުމްހޫރިއްޔާއަށް އަމުރު ކުރާ ކަމަށެވެ.

ރޭ ސޮއިކުރަންފެށި ޕެޓިޝަންގައި ސޮއިކުރުން ރާއްޖޭގެ ހުރިހާ ސަރަހައްދެއްގައި ކުރިއަށްދާނެ ކަމަށް އެމްޑީޕީން ބުންޏެވެ.