ދިވެހިރާއްޖެ މިދަނީ ވަރަށް ސާބިތުކަމާއެކު އިގްތިސާދީ ގޮތުން ކުރިއަރަމުން: މެންބަރު އިއްބެ

ދިވެހިރާއްޖޭގެ ތާރީޚަށް ބަލާލި ނަމަވެސް، ރާއްޖެ މިހާރު މިދަނީ އިގްތިސާދީ ގޮތުން ވަރަށް ފުންނާބު އުސް ދިމާލަކަށް ކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން (އިއްބެ) ވިދާޅުވެއްޖެއެވެ.

ސަންގު ޓީވީއަށް ދެއްވި ހާއްސަ ބަސްދީގަތުމެއްގައި މެންބަރު އިއްބެ ވިދާޅުވީ، މި ސަރުކާރުން ކުރަމުންދާ ބޮޑެތި މަސައްކަތްތައް ރައްޔިތުންނަށް ފެންނަމުންދާ ކަމަށެވެ. އޭގެ އެންމެ ބޮޑު އެއް މިސާލަކީ ރާއްޖޭގެ އިގްތިސާދީ ހާލަތު ބޮޑުތަނުން ރަނގަޅުވެގެން އައި މަންޒަރު ކަމަށް އިއްބެ ފާހަގަކުރެއްވިއެވެ.

އިއްބެ ވިދާޅުވީ، ރާއްޖޭގެ ރިޒާވްގައި މިހާރު ގާތްގަނޑަކަށް 1.2 ބިލިއަން ޑޮލަރު އެބަހުރި ކަމަށެވެ. އަދި ބޭނުންކުރެވޭ ރިޒާވް (ޔޫސަބަލް ރިޒާވް) ވެސް މަތިވެ، ގާތްގަނޑަކަށް 600 މިލިއަން ޑޮލަރު ހުރިކަން އޭނާ ފާހަގަކުރެއްވިއެވެ.

"އަޅުގަނޑުމެން ވެރިކަމަށް އައިއިރު އިގްތިސާދީ ހާލަތު އޮތް ދަރަޖަ ވަރަށް ދަށް. އެހެންކަމުން އޭރާއި އަޅާބަލާއިރު މިއީ ވަރަށް ބޮޑު ތަފާތެއް. މިފަދަ އިގްތިސާދީ ދަނޑިވަޅެއްގައި ލޯނުތަކާއި ހުރިހާ އެއްޗެއް ދައްކަމުންވެސް މިހާ ހިސާބަށް އާދެވުމަކީ އަޅުގަނޑުމެން މިތިބީ ވަރަށް ރަނގަޅު ހާލަތެއްގައިކަން ހާމަވާ ކަމެއް،" އިއްބެ ވިދާޅުވިއެވެ.

މިކަމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައިވަނީ، ސުކޫކު ދައްކަންޖެހުނު ކަމުގައި ވިޔަސް އެ މިންވަރަށް ފައިސާ އެބަހުރި ކަމަށެވެ. އަދި ރާއްޖޭގެ ގްރޮސް ރިޒާވް މިހާރު ހުރީ ރިޔާސީ ބަޔާނުގައި ފާހަގަކުރެއްވި މިންވަރަށްވުރެވެސް މަތީގައި ކަމަށް ރައީސް ވިދާޅުވިއެވެ. ސަރުކާރުން ނިންމާފައިވަނީ 500 މިލިއަން ޑޮލަރުގެ ސުކޫކު، 8 އޭޕްރިލް 2026 ގައި ދެއްކުމަށެވެ.

މީގެ އިތުރުން، އިންތިޚާބުތައް އެއް ދުވަހެއްގައި ބޭއްވުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް ނިންމާފައިވާ ނިންމުމަށް ރައްޔިތުންގެ ބޮޑު ތާއީދެއް އޮތްކަން ގަބޫލުކުރައްވާ ކަމަށްވެސް އިއްބެ ވިދާޅުވިއެވެ. އޭނާ ވިދާޅުވި ގޮތުގައި، ރާއްޖެ މިދަނީ ވަރަށް ސާބިތުކަމާއެކު އިގްތިސާދީ ކުރިއެރުން ހޯދަމުން ކަމަށާއި، ރައީސް ކުރައްވަމުންދާ މަސައްކަތްތަކުގައި ދެމިހުންނަވާނެ ކަމުގެ ޔަގީންކަން އެބައޮތް ކަމަށެވެ.