ރައީސް މުއިއްޒު ވެރިކަން ކުރައްވަނީ ދުވަހަކުވެސް ވެރިއަކު ވެރިކަން ނުކުރާހާ ރަނގަޅަށް: މެންބަރު އިއްބެ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަން ކުރައްވަމުން ގެންދަވަނީ ރާއްޖޭގެ ތާރީޚުގައިވެސް އެއްވެސް ވެރިއަކު ކަންތައްތައް ނުކުރައްވާހާ ފުރިހަމައަށް، ރައްޔިތުންނާ ގާތުން ކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން (އިއްބެ) ވިދާޅުވެއްޖެއެވެ.

އިއްބެ މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިލެކްޝަނާ ދިމާކޮށް، މާލެ އާއި ހުޅުމާލޭގެ ކެންޑިޑޭޓުންނަށް ތާއީދު ހޯއްދެވުމަށް ރައީސުލްޖުމްހޫރިއްޔާ ބައިވެރިވެވަޑައިގެންނެވި "ޑޯ-ޓު-ޑޯ" ހަރަކާތުގެ ތެރެއިންނެވެ. އިއްބެ ވިދާޅުވި ގޮތުގައި، ރައީސް މުއިއްޒު ގެންދަވަނީ ސީދާ ރައްޔިތުންގެ ގާތަށް ވަޑައިގެން، ރައްޔިތުންގެ ހާލަތު އަމިއްލަފުޅަށް ބައްލަވައި ރައްޔިތުންގެ އަޑު އައްސަވަމުންނެވެ.

"އަޅުގަނޑު ގަބޫލުކުރާގޮތުގައި މި ސަރުކާރަށް ރައްޔިތުންގެ ފުރިހަމަ އެއްބާރުލުމާއި ތާއީދު އެބައޮތް. އެއީ ދުވަހަކުވެސް ވެރިއަކު ވެރިކަން ނުކުރާހާ ރަނގަޅަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަން މި ކުރައްވަނީ،" އިއްބެ ވިދާޅުވިއެވެ.

މީގެ އިތުރުން، ރައީސް މުއިއްޒަކީ އަބަދުވެސް ރައްޔިތުންގެ ވެރިކަމެއް ކުރައްވާ، ރައްޔިތުންގެ އަޑު އައްސަވާނެ ވެރިއެއްކަން ފާހަގަކުރައްވަމުން އިއްބެ ވިދާޅުވީ، ރާއްޖޭގެ ބޮޑު ތާއީދެއް މިހާރުވެސް ރައީސަށް އެބައޮތް ކަމަށެވެ.

ކުރިއަށް އޮތް އިންތިޚާބުތަކަށް ކެމްޕޭން ކުރެއްވުމުގެ ގޮތުން ރައީސުލްޖުމްހޫރިއްޔާ ގެންދަވަނީ މާލެ އާއި ހުޅުމާލޭގައި ދިރިއުޅޭ ރައްޔިތުންގެ ގެތަކަށް ޒިޔާރަތްކުރައްވައި، ސަރުކާރުގެ ކެންޑިޑޭޓުންނަށް ވޯޓު ހޯއްދަވައިދެއްވުމަށް ވަރަށް ގާތުން މަސައްކަތް ކުރައްވަމުންނެވެ. މި ހަރަކާތްތަކުގައި ސަރުކާރުގެ އިސްވެރިންނާއި މަޖިލިސް މެންބަރުންވެސް ދަނީ ބައިވެރިވަމުންނެވެ.