އަހަރުގެ ފުރަތަމަ ދެ މަހު ދައުލަތުގެ އާމްދަނީ 29 އިންސައްތަ އިތުރުވެއްޖެ
މި އަހަރުގެ ފުރަތަމަ ދެ މަސްދުވަހުގެ ތެރޭގައި ދައުލަތަށް ލިބުނު އާމްދަނީ، މިދިޔަ އަހަރުގެ އެ މުއްދަތާ އަޅާބަލާއިރު ގާތްގަނޑަކަށް 29 އިންސައްތަ އިތުރުވެފައިވާކަން މިނިސްޓްރީ އޮފް ފިނޭންސުން އާންމުކުރި ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީގެ ހަފްތާގެ މާލީ ރިޕޯޓުގައިވާ ގޮތުން، ފެބްރުއަރީ މަހުގެ 26 ވަނަ ދުވަހުގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި ޖުމްލަ 7.8 ބިލިއަން ރުފިޔާ ލިބިފައިވެއެވެ. މިއީ 2025 ވަނަ އަހަރުގެ ފުރަތަމަ ދެ މަސްދުވަހު ލިބުނު 6 ބިލިއަން ރުފިޔާއާ އަޅާބަލާއިރު 29.3 އިންސައްތައިގެ ކުރިއެރުމެކެވެ. މި މުއްދަތުގެ ތެރޭގައި ދައުލަތުގެ ޖުމްލަ ހޭދަ ހުރީ 5.9 ބިލިއަން ރުފިޔާގައެވެ.
ދައުލަތަށް ލިބުނު ޖުމްލަ އާމްދަނީގެ 83 އިންސައްތައަކީ ޓެކުހުގެ ގޮތުގައި ލިބުނު ފައިސާއެވެ. ޓެކުހުގެ ބައިތަކަށް ބަލާއިރު، އެންމެ ބޮޑު ކުރިއެރުމެއް އައިސްފައިވަނީ ފަތުރުވެރިކަމުގެ ދާއިރާގެ މުދަލާއި ހިދުމަތުގެ ޓެކްސް (TGST) އިންނެވެ. އެގޮތުން TGST ގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ 39.4 އިންސައްތައިގެ އިތުރުވުމެކެވެ. މީގެ އިތުރުން މުދަލާއި ހިދުމަތުގެ ޓެކްސް (GST) ގެ ގޮތުގައި 3.2 ބިލިއަން ރުފިޔާ ލިބިފައިވެއެވެ.
ދައުލަތުގެ ޖުމްލަ ހަރަދުތައް މިދިޔަ އަހަރާ އެއްވަރެއްގައި ހުރި ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރި ހޭދަ ވަނީ 9.6 އިންސައްތަ އިތުރުވެފައެވެ. ފުރަތަމަ ދެ މަސްދުވަހުގެ ތެރޭގައި މުސާރައާއި ޕެންޝަނަށް 2.64 ބިލިއަން ރުފިޔާ ހޭދަކޮށްފައިވާއިރު، މިއީ ސަރުކާރުގެ "ޕޭ ހާމަނައިޒޭޝަން" ސިޔާސަތުގެ ދަށުން މުސާރަތަކަށް ގެނައި ބަދަލުތަކުގެ ސަބަބުން އައި ބަދަލެއް ކަމަށް ކަމާބެހޭ ފަރާތްތަކުން ބުނެއެވެ.
ހަރަދުތަކަށްވުރެ އާމްދަނީ ލިބުނު މިންވަރު އިތުރުވުމާއެކު ދައުލަތުގެ މާލީ ދުޅަހެޔޮކަން ވަނީ ރަނގަޅުވެފައެވެ. މި މުއްދަތުގައި ދައުލަތުގެ ބަޖެޓުން 1.9 ބިލިއަން ރުފިޔާ އިތުރުވެފައި (surplus) ވާއިރު، މިދިޔަ އަހަރުގެ މި މުއްދަތުގައި އިތުރުވެފައިވަނީ އެންމެ 98.2 މިލިއަން ރުފިޔާއެވެ. އަދި ސޮވެރިން ޑިވެލޮޕްމަންޓް ފަންޑަށް ޖަމާކުރި ފައިސާވެސް ވަނީ 287.1 މިލިއަން ރުފިޔާއަށް އަރާފައެވެ.
ފިނޭންސް މިނިސްޓްރީން ބުނި ގޮތުގައި، މިއީ މި އަހަރު ފެށުނު ފަހުން އާންމުކުރި ފުރަތަމަ މާލީ ރިޕޯޓެވެ. މި ރިޕޯޓު އާންމުކުރުން ލަސްވީ ދައުލަތުގެ އެކައުންޓިން ނިޒާމަށް ގެނައި ބަދަލުތަކަކާ ގުޅިގެން ކަމަށް އެ މިނިސްޓްރީން މައުލޫމާތު ދެއެވެ. މި މުއްދަތުގައި ރާއްޖެއަށް ވަން ބޭރު ފައިސާގެ ޖުމްލަ އަދަދު ހުރީ 222.8 މިލިއަން އެމެރިކާ ޑޮލަރުގައެވެ.
ރިއެކްޝަންސް
