އިންތިޚާބުތައް އޮބްޒާވްކޮށް މޮނިޓަރ ކުރުމުގެ ފުރުސަތު އިތުރުކޮށްފި

އަންނަ އޭޕްރީލް މަހު ބޭއްވުމަށް ހަމަޖެހިފައިވާ ތިން ވޯޓެއް މޮނިޓަރކޮށް އޮބްޒާވްކުރުމަށް ޝައުގުވެރިވާ ފަރާތްތަކަށް އިތުރު ފުރުސަތެއް ދިނުމަށް އިލެކްޝަންސް ކޮމިޝަނުން ނިންމައިފިއެވެ.

މި އޭޕްރީލް މަހުގެ 4 ވަނަ ދުވަހު ބޭއްވުމަށް ތައްޔާރުވަމުންދާ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން ރައްޔިތުންގެ ޚިޔާލު ހޯދުމުގެ އާންމު ވޯޓު އޮބްޒާވްކޮށް މޮނިޓަރ ކުރަން ބޭނުންވާ ފަރާތްތަކަށް އެ ފުރުސަތު މިހާރު ވަނީ ހުޅުވާލާފައެވެ.

އިލެކްޝަންސް ކޮމިޝަނުން މައުލޫމާތު ދޭ ގޮތުގައި، މީގެ ކުރިން މިދިޔަ މަހުގެ 9 އިން 28 އަށް މި ފުރުސަތު ހުޅުވާލާފައިވީ ނަމަވެސް، ވީހާވެސް ގިނަ ފަރާތްތަކަށް ބައިވެރިވުމުގެ ފުރުސަތު ދިނުމުގެ ގޮތުން މާދަމާ މެންދުރުފަހު 15:00 އާ ހަމައަށް ވަނީ މުއްދަތު އިތުރުކޮށްފައެވެ.

މި އިންތިޚާބުތަކުގައި އޮބްޒާވަރުންނާއި މޮނިޓަރުންގެ ގޮތުގައި ހަރަކާތްތެރިވާން ބޭނުންވާ ފަރާތްތަކުން ފޯމު ހުށަހަޅަންޖެހޭނީ އެ ކޮމިޝަންގެ ރަސްމީ ޕޯޓަލް (my.elections.gov.mv) މެދުވެރިކޮށެވެ. އިންތިޚާބުގެ ކަންކަން ދެފުށް ފެންނަ ގޮތެއްގައި ކުރިއަށްދާކަން ކަށަވަރުކުރުމަށްޓަކައި އޮބްޒާވަރުންނާއި މޮނިޓަރުންގެ ދައުރަކީ ނުހަނު ބޮޑު ދައުރެކެވެ.