ގަލޮޅު ދެކުނުގެ "ދޮރުން ދޮރަށް" ހަރަކާތުން ރައީސްއަށް ހޫނު މަރުޙަބާއެއް
ކުރިއަށް އޮތް ލޯކަލް ކައުންސިލު އިންތިހާބުތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް ވާދަކުރާ ޕީއެންސީގެ ކެންޑިޑޭޓުންނަށް ތާއީދު ހޯދުމަށް މިއަދު ގަލޮޅު ދެކުނު ދާއިރާގައި ކުރިއަށްގެންދިޔަ "ދޮރުން ދޮރަށް" ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގެންފިއެވެ.
މިއަދު އެ ދާއިރާގައި ކުރިއަށްދިޔަ މި ހަރަކާތަށް ރައީސުލްޖުމްހޫރިއްޔާ ވަޑައިގަތުމުން، އެ ސަރަހައްދުގެ ގިނަ އަދަދެއްގެ ރައްޔިތުން ވަނީ އެމަނިކުފާނަށް ވަރަށް ހޫނު މަރުހަބާއެއް ދަންނަވާފައެވެ.
މި ހަރަކާތުގެ ތެރެއިން ރައީސް ޑރ. މުޢިއްޒު ވަނީ ގަލޮޅު ދެކުނު ދާއިރާގެ ވަރަށް ގިނަ ގޭގެއަށް ވަޑައިގެން، އެ ގޭގޭގައި ދިރިއުޅޭ އާއިލާތަކާ ބައްދަލުކުރައްވާފައެވެ. މި ބައްދަލުކުރެއްވުންތަކުގައި އާންމު ރައްޔިތުންގެ ޚިޔާލާއި މަޝްވަރާ ހޯއްދަވައި، ރައްޔިތުންގެ ހުރި ކަންބޮޑުވުންތަކާއި ޝަކުވާތައް އެމަނިކުފާނު ވަނީ އޮޅުންފިލުއްވާފައެވެ.
ރައީސުލްޖުމްހޫރިއްޔާގެ މި ޒިޔާރަތުގައި އެމަނިކުފާނުގެ އަރިހުގައި ޕީއެންސީގެ އިސްވެރިންނާއި، ދާއިރާގެ އިސް ހަރަކާތްތެރިން ބައިވެރިވެވަޑައިގެންނެވިއެވެ. ޕީއެންސީން އަންނަނީ ކުރިއަށް އޮތް އިންތިހާބުތަކަށް އަމާޒުކޮށް މާލޭގެ އެކި ދާއިރާތަކުގައި ވަރަށް ފުޅާދާއިރާއެއްގައި ކެމްޕޭން ހަރަކާތްތައް ހިންގަމުންނެވެ. މިގޮތުން ރައީސުލްޖުމްހޫރިއްޔާ އަމަލީގޮތުން މިފަދަ ހަރަކާތްތަކުގައި ބައިވެރިވެވަޑައިގަތުމަކީ ޕާޓީގެ މެންބަރުންނާއި ސަޕޯޓަރުންނަށް ލިބިގެންދާ ވަރަށް ބޮޑު ހިތްވަރެކެވެ.
ރިއެކްޝަންސް
