ކައިވެނިކޮށްގެން އުޅޭ މީހާގެ ބޯހިޔާވަހިކަމެއް އޮތަސް ގޯއްޗަށް ކުރިމަތިލެވޭ ގޮތް ހަދައިފި
ސަރުކާރުގެ ބޯހިޔާވަހިކަމުގެ ސިޔާސަތު "ބޯހިޔާވަހިކަން އެންމެންނަށް" ގެ ދަށުން، ފިރިމީހާ ނުވަތަ އަނބިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، ގޯއްޗަށް ކުރިމަތިލުމުގެ ފުރުސަތު ލިބޭ ގޮތަށް "ގޯތި-ގެދޮރު" ގެ ނަމުގައި އައު ޕްރޮގްރާމެއް ސަރުކާރުން އިޢުލާންކޮށްފިއެވެ.
މިދިޔަ ޖަނަވަރީ މަހުގެ 18 ވަނަ ދުވަހު ފްލެޓާއި ގޯއްޗަށް އެދި ހުށަހެޅުމުގެ ފުރުޞަތު ހުޅުވާލިއިރު، އޭރު ކަނޑައަޅާފައިވާ އުސޫލުގެ ސަބަބުން ގިނަ ބައެއްގެ ކަންބޮޑުވުން ވަނީ އަމާޒުވެފައެވެ. އެއީ މީގެ ކުރީގެ ސްކީމްތަކެކޭވެސް އެއްފަދައިން، ކައިވެނިކޮށްގެން އުޅޭ އަނެއް ފަރާތުގެ ނަމުގައި ބޯހިޔާވަހިކަމެއް އޮވެއްޖެނަމަ، ގޯއްޗަށް ކުރިމަތިލުމުގެ ޝަރުތު ހަމަނުވާ ގޮތަށް އޮތުމުންނެވެ.
މިކަމާ ގުޅޭގޮތުން އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް، ބޯހިޔާވަހިކަމުގެ ސްކީމަށް ކުރިމަތިލާން ހުޅުވާލިއިރު 20،000 އަށް ވުރެ ގިނަ ފަރާތްތަކުން ކުރިމަތިލާނެ ކަމަށް ބެލެވުނު ކަމަށެވެ. ނަމަވެސް، މިހާރު ފެންނަމުންދާ ނަތީޖާއަށް ބަލާއިރު ގޯއްޗަށް އޮތް ޑިމާންޑު ކުރިން އުންމީދު ކުރި ވަރަށް ވުރެ ދަށްވެފައިވާ ކަމަށް ވަޒީރު ފާހަގަކުރެއްވިއެވެ.
އެހެންކަމުން، ގޯތި ހޯދުމަށް އާންމުންނަށް އިތުރު ފުރުސަތުތަކެއް ފަހިކޮށްދިނުމުގެ މަގުސަދުގައި، "ގޯތި-ގެދޮރު" ޕްރޮގްރާމްގެ ދަށުން އުސޫލުތަކަށް ބަދަލު ގެނެސް، ދެމަފިރިންކުރެ އެކަކުގެ ނަމުގައި ބޯހިޔާވަހިކަމެއް އޮތް ނަމަވެސް އަނެއް ފަރާތަށް ގޯއްޗަށް ކުރިމަތިލެވޭނެ އިންތިޒާމު މިހާރު ވަނީ ހަމަޖައްސާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދެނީ ހުރިހާ ރައްޔިތުންނަށްވެސް ހަމަހަމަކަމާއެކު ބޯހިޔާވަހިކަން ފޯރުކޮށްދިނުމަށެވެ. މި އައު ބަދަލާއެކު، ބޯހިޔާވަހިކަމުގެ ދަތިކަން ކުރިމަތިވެފައިވާ ގިނަ އާއިލާތަކަކަށް ބޮޑު ތަސައްލީއެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.
ރިއެކްޝަންސް
