ގްރޫޕް ސްޓޭޖް ފޭސް ދޭއްގައި ފުވައްމުލަކު ފުރަތަމަ މެޗު އެއްވަރު
ނައިންޓީ ޕްލަސް ގޯލްޑް ކަޕްގެ ގްރޫޕް ސްޓޭޖް ފޭސް އެކެއްގައި ކުޅުނު ހަތަރު މެޗުންވެސް މޮޅުވި, ފުވައްމުލައް ސިޓީ ފޭސް ދޭއްގައި ކުޅުނު ފުރަތަމަ މެޗު އެއްވަރުވެއްޖެ އެވެ.
ފޭސް އެކެއްގައި ގްރޫޕް އޭގެ އެއްވަނަ ހޯދައިގެން ފޭސް ދޭކަށް ދަތުރުކުރި ފުވައްމުލައް ސިޓީ އެއްވަރުވީ ތ.ތިމަރަފުށްޓާ ވާދަކޮށް 1-1 ނެވެ. މެޗު ފަށައިގެން 10 ވަނަ މިނިޓްގައި ލީޑް ނެގީ ތިމަރަފުށިންނެވެ. ލީޑް ނަގައިދިނީ އަލީ އިލްމާން އަހުމަދު މޫސާ އެވެ. ފުރަތަމަ ހާފްގައި ފުވައްމުލައް ސިޓީއަށް ނަތީޖާ ހަމަހަމަ ކޮށްދިނީ ކޯފީ އެވެ. އޭނާ އަކީ މުބާރާތުގައި މިހާތަނަށް ލަނޑު ލިސްޓްގެ އެއްވަނަ އެވެ. މިއަދު މެޗުގައި ޖެހި ލަނޑަކީ މުބާރާތުގައި އޭނާގެ 8 ވަނަ ލަނޑެވެ.
ފޭސް ދޭއްގައި މިދެޓީމްގެ އިތުރުން މިގްރޫޕްގައި ހިމެނެނީ ކ. ގުރައިދޫ އެވެ. މިގްރޫޕްގެ ދެވަނަ މެޗުގައި ގުރައިދޫ އާއި ތިމަރަފުށި ވާދަކުރާނީ ބުދަ ދުވަހު ހަވީރު އެވެ. މުބާރާތުގައި މިރޭ ވާދަކުރާނީ އޭދަފުށްޓާއި މާފުށްޓެވެ. މިދެޓީމާއެކު ގްރޫޕް އެފްގައި ހިމެނެނީ ދިއްދޫ އެވެ.
ފޭސް ދޭކުން ކޮންމެ ގްރޫޕެއްގެ އެއްވަނަ އަދި ދެވަނަ ދަތުރުކުރާނީ ކްއާޓާ ފައިނަލަށެވެ.
ރިއެކްޝަންސް
