މަޖިލިސް ޗުއްޓީއަށް ދިއުމުގެ ކުރިން ބޭރުފައިސާއާ ބެހޭ ބިލް ފާސްކުރަނީ
ބޭރު ފައިސާއާ ބެހޭ ބިލް މަޖިލިހަށް ހުށަހެޅީ މިއަދު
މިދައުރުގައި މަޖިލިސް ޗުއްޓީއަށް ދިއުމުގެ ކުރިން ބޭރުފައިސާއާ ބެހޭ ބިލް ފާސްކުރައްވާނެ ކަމުގެ އިޝާރާތެއް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފި އެވެ. މިއަދު ރައްޔިތުންގެ މަޖިލިހަށް ހުށަހެޅި ބިލް ދައުރު ނިމުމުގެ ކުރިން ފާސްކުރައްވާނެ ކަމުގެ އިޝާރާތެއް ރައީސުލްޖުމްހޫރިއްޔާ ދެއްވީ މިއަދު ކ.ހުރާގައި އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވަނީ ރައްޔިތުންގެ މަޖިލީސް، މި ދައުރުގެ ޗުއްޓީއަށް ދިއުމުގެ ކުރިން އެ ބިލު ފާސްކުރައްވާނޭކަމުގެ އުންމީދު ފާޅުކުރައްވާފައެވެ. ވިދާޅުވީ އެ ބިލު ފާސްވުމަކީ، ރައްޔިތުންގެ ފުދުންތެރިކަން އިތުރުކޮށްދީ މުއްސަނދިކަން ގެނެސްދޭނޭ ކަމެއްކަމަށެވެ.
މަޖިލިހުގެ ހިނގަމުންދާ ދައުރު ނޮވެމްބަރު މަހުގެ ނިޔަލަށް ހަމަވި ނަމަވެސް, ދައުރު ހަމަވުމުގެ ކުރިން މަޖިލިހުން ވަނީ މިޑިސެމްބަރު މަހުގެ 15 ގެ ނިޔަލަސް ދައުރު ދަންމާލަން ފާސްކޮށްފައެވެ. އެއީ ނިންމަން ޖެހޭ މުހިއްމު މަސައްކަތްތަކެއް ހުރުމުން ރިޔާސަތުން މަޖިލިހުގެ ރައީސް އަބްދުއްރަހީމް އަބްދުالله ހުށަހަޅުއްވައިގެންނެވެ.
ރައީސުލްޖުމްހޫރިއްޔާ މިއަދު ވިދާޅުވީ އެމްއެމްއޭއިން އެކުލަވާލައްވާ މަޖިލިހަށް ހުށަހެޅުއްވި ބިލަކީ ރައްޔިތުންގެ ޙައްޤުގައި ހުށަހެޅުއްވި ބިލެއް ކަމަށެވެ. އެއީ އެބިލަކީ ރާއްޖޭގެ އިޤްތިޞާދަށް ވަންނަ ފައިސާގެ ތެރެއިން ބައިކުޅަ ބައެއް ރާއްޖޭގެ ބޭންކުން މާރުކުރަން ޖެހޭގޮތަށް ހިމަނުއްވާފައިވާ ބިލެއްކަން ރައީސް ފާހަގަކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ ވަޢުދުވެވަޑައިގެންފައިވާ ގޮތަށް ޑޮލަރުގެ ދަތިކަން ނައްތާލުމުގެ މަސައްކަތްތައް ކުރިއަށްދަވާނެ ކަމަށެވެ. އެމަނިކުފާނު ވިދާޅުވީ ޑޮލަރުގެ ތާށިކަމަކީ ވާރުތަވެފައިވާ އިޤްތިޞާދީ މައްސަލައެއް ކަމަށެވެ.
ރައީސް ވިދާޅުވީ ބޭރުފައިސާއާ ބެހޭ ބިލް ހުށަހަޅުއްވާފައިވަނީ، އެމަނިކުފާނު ކުރިންވެސް ވިދާޅުވިގޮތަށް، ބަދަލެއް ނުގެނެސް ކަމަށެވެ. ބިލްގައި ވަނީ ރިސޯރޓްތަކަށް އަންނަ ކޮންމެ ޓޫރިސްޓަކަށް 500 ޑޮލަރު ރާއްޖޭގެ ބޭންކްތަކަށް މާރުކުރުން ނުވަތަ މަހެއްގެ މައްޗަށް ލިބޭ އާމްދަނީގެ %20 މާރުކުރަން ޖެހޭ ގޮތަށެވެ. އެއީ އޭ ކެޓަގަރީއަށް ކަނޑައަޅާފައިވާ މިންވަރެވެ. ރިސޯރޓްތައް ހިމެނެނީ އޭ ކެޓަގަރީގައެވެ. ބިލްގައިވާ ގޮތުން ގެސްޓްހައުސްތަކާއި ހޮޓާތައް ހިމެނެނީ ބީ ކެޓަގަރީގައެވެ. ބީ ކެޓަގަރީގައި ހިމެނޭ ތަންތަނުން މާރުކުރަން ޖެހެނީ އަންނަ ފަތުރުވެރިންގެ ތެރެއިން ބޮލަކަށް 25 ޑޮލަރެވެ.
ރިއެކްޝަންސް
