ތައިލެންޑްގައި ހުންނަވާ ސަފީރަކަށް އައްޔަން ކުރެއްވުމަށް ފުއާދަށް ރުހުން ދީފި
ރާއްޖެއިން ތައިލެންޑަށް ކަނޑައަޅުއްވާ ސަފީރު ކަމުގެ މަގާމަށް އައްޔަން ކުރެއްވުމަށް އިލެކްޝަން ކޮމިޝަންގެ ކުރީގެ ރައީސް ފުއާދު ތައުފީގަށް ރައްޔިތުންގެ މަޖިލިހުން މިއަދު ރުހުން ދީފިއެވެ.
ހާރިޖީ ގުޅުންތަކާބެހޭ ކޮމިޓީން ފުއާދުގެ ނަން ދިރާސާކޮށް, މަޖިލިހުގެ ތަޅުމަށް ހުށަހެޅުމުން ފުއާދަށް ރުހުން ދިނުމަށް ފާސްކުރީ ވޯޓްގައި ބައިވެރިވެވަޑައިގެންނެވި 58 މެމްބަރުން އަޣްލަބިއްޔަތުންނެވެ. އިލެކްޝަން ކޮމިޝަންގައި ފުއާދުގެ ދެ ދައުރު ހަމަވީ މިދިޔަ އޮކްޓޯބަރު މަހުގެ 23 ވަނަ ދުވަހުއެވެ. އޭގެ އެއް ދުވަސް ފަހުން އެމަހުގެ 25 ވަނަ ދުވަހު ރައީސުލްޖުމްހޫރިއްޔާ ވަނީ ފުއާދުގެ ނަން މަޖިލިހަށް ފޮނުއްވާފައެވެ.
އިލެކްޝަން ކޮމިޝަންގެ މެމްބަރު ކަމުގެ ދައުރު ހަމަވުމުގެ ކުރިން ފުއާދު ވަނީ ދެން ފެނިވަޑައިގަންނަވާނީ ޚާރިޖީ ދާއިރާއިން ކަމަށް ވިދާޅުވެފައެވެ.
ފުއާދު ޚާރިޖީ ދާއިރާއާ ގުޅިވަޑައިގަތީ އިންތިޤާލީ މަރުހަލާ ނުހިމަނާ އެކޮމިޝަންގައި ދެދައުރު ފުރިހަމަ ކުރެއްވުމަށްފަހުއެވެ. ގިނަ އަހަރުތައް ޚިދުމަތް ކުރެއްވީ ކޮމިޝަންގެ ރައީސްގެ ގޮތުގައެވެ. އިލެކްޝަން ކޮމިޝަންގެ ޤާނޫނު ބުނާގޮތުން އެކޮމިޝަންގެ މެމްބަރުކަން ކުރެއްވެނީ ދެ ދައުރެވެ.
ރިއެކްޝަންސް
