ބޭންކް ތަކާއި އެސްޓީއޯގެ ސްކީމްތަކުން މަސްވެރިންނަށްވެސް ފުރުޞަތު!
ބޭންކް ތަކާއި އެސްޓީއޯގެ އިނާޔަތުގެ ސްކީމްތަކުން މަސްވެރިންނަށްވެސް ފުރުޞަތު މަސްވެރިންނަށްވެސް ފަހިކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފި އެވެ. އއ.އަތޮޅާއި, މާލެ އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ގާފަރު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުފައި ރައީސުލްޖުމްހޫރިއްޔާ އެކަން ފާހަގަ ކުރެއްވީ މަސްވެރިންނަށް ސަރުކާރުން ހަމަޖައްސަވައިދެއްވާ ލުއި ގޮތްތަކުގެ މައުލޫމާތު ހިއްސާ ކުރައްވަމުންނެވެ.
އެހެނިހެން ދާއިރާތަކުގައި މަސައްކަތްކުރާ މުވައްޒަފުންނަށް އޮންނަ އިނާޔަތްތައް މަސްވެރިންނަށްވެސް ފަހިވުމަކީ މަސްވެރިން އެދި ތިބި ކަމެއްކަން ފާހަގަކުރައްވާ ރައީސުލްޖުމްހޫރިއްޔާ ދެއްވީ އަދުގެ ސަރުކާރުން އެކުލަވާލެއްވި މަސްވެރިންގެ ދަފުތަރަށް ޤާނޫނީ ޙައިޘިއްޔަތު ދެވިގެން ދާނެ ކަމުގެ ފެހި ސިގުނަލެވެ. ރައީސް ޑރ.މުއިއްޒު ވިދާޅުވީ މި ހަފުތާގެ ބުރާސްފަތި ދުވަހު، މަސްވެރިންގެ ދަފުތަރާ ބެހޭ ޤަވާއިދު ގެޒެޓް ކުރައްވާނެ ކަމަށެވެ. އެހާ ހިސާބުން، އެހެން ދާއިރާތަކުގެ މަސައްކަތްތެރިންނަށް ބީ.އެމް.އެލް، އެމް.އައި.ބީ އަދި އެސް.ޓީ.އޯއިން ދޭ އިނާޔަތުގެ ސްކީމްތަކުގައި ބައިވެރިވުމުގެ ފުރުޞަތު، ދަފުތަރުވެފައިވާ މަސްވެރިންނަށްވެސް ހުޅުވިގެންދާނެ ކަމަށް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މަސްވެރިކަމުގެ ސިނާޢަތް ސިންދަފާތުކޮށް ކުރިއެރުވުމުގެ މަސައްކަތްތައް ކުރިއަށް ދަނީ އިސްތިރާޖީ ވިސްނުމުގެ ތެރެއިންކަމަށެވެ. ވީހާވެސް ލާމަރުކަޒީ އުސޫލަކުން ކަންކަން ކުރިއަށް ގެންދިއުމަށްޓަކައި، އައިސްޕްލާންޓްތައް ހިންގުމުގެ ކޮންޓްރޯލް، މަސްވެރިން އެދޭނަމަ ކައުންސިލްތަކާ ޙަވާލު ކުރައްވަން ތައްޔާރަށް ހުންނެވިކަން ގާފަރުގައިވެސް ރައީސް ތަކުރާރުކުރެއްވިއެވެ. މީގެއިތުރުން، މަސްވެރިން ބާނާ މަހުގެ ކޯލްޑް ސްޓޯރޭޖު ކެޕޭސިޓީ އިތުރު ކުރުމުގެ މަސައްކަތް މިހާރުވެސް ފެށިފައި ވާ ކަމަށާ، އެމަނިކުފާނު ވަޢުދުވެވަޑައިގެންފައިވާ ގޮތަށް އެކަންކަން ކުރިއަށް ދާނެ ކަމަށް ވިދާޅުވިއެވެ. އަދި މަސް ބަންދުކުރުމުގެ މަސައްކަތްވެސް މި ބީދައިން ހިނގާނެ ކަމަށް އެ މަނިކުފާނު ވިދާޅުވިއެވެ.
މަސްވެރިކަމުގެ ސިނާޢަތް މި ރާއްޖޭގައި އިންތިހާއަށް ފުޅާވެ، އިޤްތިޞާދީ ޒޯނުގެ ބޭނުން އެންމެ ފުރިހަމަ ގޮތުގައި ހިފާ، ޤައުމީ އުފެއްދުންތެރިކަމުގެ ނިސްބަތުން އެންމެ ބޮޑު ހިއްސާއެއް އޮތް ސިނާޢަތަކީވެސް މަސްވެރިކަމުގެ ސިނާޢަތް ކަމަށް ވުމަކީ ކުރައްވާ އުންމީދެއް ކަމުގައި ރައީސުލްޖުމްހޫރިއްޔާ ވިދާޅިއެވެ.
މަސްވެރިންނަށް ރައީސުލުޖްހޫރިއްޔާ އުފާވެރި ޚަބަރުތަކެއް ދެއްވިއިރު މާދަމާ އަކީ މިއަހަރުގެ މަސްވެރިންގެ ދުވަހެވެ.
ރިއެކްޝަންސް
