މަސްވެރިންގެ އަގު ވަޒަން ކުރުމަކީ ގައުމީ ވާޖިބެއް- ރައީސުލްޖުމްހޫރިއްޔާ
މިއަދަކީ މިއަހަރުގެ މަސްވެރިންގެ ދުވަސް
މަސްވެރިންގެ އަގު ވަޒަން ކުރުމަކީ ގައުމީ ވާޖިބެއް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ މަސްވެރިންގެ ދުވަހުގެ މުނާސަބަތުގައި މަސްވެރިންނަށް ފޮނުއްވި ތަހުނިޔާގެ މެސެޖްގައެވެ.
ސޯޝަލް މީޑިޔާގެ ވަސީލަތްތަކުގައި އެމަނިކުފާނު ހިއްސާކުރެއްވި ތަހުނިޔާގެ މެސެޖްގައި ވިދާޅުވީ އަތްވާއި, ވާރޭގައި, ދުވާލާއި ރޭގަނޑު, ބިޔަކަނޑުތަކުގައި, ދިވެހި މަސްވެރިން ކުރާ ހިންމަތުގެ އަގު އިޙުތިރާމާއެކު ވަޒަން ކުރުމަކީ ޤައުމީ ވާޖިބެއް ކަމަށެވެ.
މަސްވެރިންގެ އަގު ވަޒަންކުރުމުގެ މުހިއްމުކަން ރައީސުލްޖުމްހޫރިއްޔާ ފާހަގަކުރައްވާފައި މިވަނީ މަސްވެރިންނަށް އުފާވެރި ޚަބަރުތަކެއް ދެއްވާ, ލުއި ގޮތްތަކެއްވެސް ހަމަޖައްސައިދެއްވުމަށްފަހުއެވެ. ފާއިތުވި ސަރުކާރާ ހަމައިން މަސްވެރިންނަށް ނުދީ ހުރި ފައިސާ އެއްކޮށް ދައްކާ ޚަލާސްކޮށް, މިއަދުން ފެށިގެން މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދެއްވާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ. މިއީ ރައީސުލްޖުމްހޫރިއްޔާގެ ރިޔާސީ ވައުދެއްވެސް މެއެވެ.
https://x.com/MMuizzu/status/1866319415580758352
މީގެއިތުރުން މަސްވެރިންނަށް ކުރިމަތިވެފައިވާ ތެލުގެ ދަތިކަމަށްވެސް ވަނީ ޙައްލު ހޯއްދަވައި ދެއްވާފައެވެ. އެގޮތުން، މިއަދުން ފަށައިގެން، 4 ރަށެއްގައި ހުންނަ އެސް.ޓީ.އޯ ނުވަތަ އެފް.އެސް.އެމް ސައިޓްތަކުން "އެސްޓީއޯ ރޭޓް"ގައި މަސްވެރިންނަށް ތެޔޮ ލިބޭނެކަމުގެ ޔަޤީންކަން ވަނީ ދެއްވާފައެވެ. އެއީ ކ. ހިންމަފުށި، ގއ. ކޫއްޑޫ، ޅ.ފެލިވަރު އަދި ސ. ހުޅުމީދޫއެވެ. އަދި ގއ. ކޫއްޑޫ، އަދި ޅ.ފެލިވަރު ސަރަޙައްދުގައި ހަރަކާތްތެރިވާ މިފްކޯގެ ބޯޓުފަހަރުންވެސް "އެސްޓީއޯ ރޭޓް"ގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސެވުމަށް އެސް.ޓީ.އޯއިން މަސައްކަތް ކުރައްވަމުން ގެންދަވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މީގެއިތުރުން މަސްވެރިންގެ ދަފްތަރަށް ޤާނޫނީ ހައިސިއްޔަތު ހޯދައިދީ ބޭންކް އޮފް މޯލްޑިވްސްއާއި މޯލްޑިވްސް އިސްލާމިކް ބޭންކް އަދި އެސްޓީއޯއިން ދޭ އިނާޔަތުގެ ސްކީމްތަކުގައިވެސް މަސްވެރިންނަށް ބައިވެރިވެވޭނެ އިންތިޒާމް ހަމަޖައްސަވާނެ ކަމަސް ރައީސް ވަނީ ވިދާޅުވެފައެވެ. އައިސްޕްލާންޓްތައް ހިންގުމުގެ ކޮންޓްރޯލް، މަސްވެރިން އެދޭނަމަ ކައުންސިލްތަކާ ޙަވާލު ކުރައްވަން ތައްޔާރަށް ހުންނެވިކަންވެސް ރައީސުލްޖުމްހޫރިއްޔާ ވަނީ ހާމަ ކުރައްވާފައެވެ.
މަސްވެރިން ބާނާ މަހުގެ ކޯލްޑް ސްޓޯރޭޖު ކެޕޭސިޓީ އިތުރު ކުރުމުގެ މަސައްކަތް މިހާރުވެސް ފެށިފައި ވާ ކަމަށާ، އެމަނިކުފާނު ވަޢުދުވެވަޑައިގެންފައިވާ ގޮތަށް އެކަންކަން ކުރިއަށް ދާނެ ކަމަށްވެސް ރައީސް ވަނީ ވިދާޅުވެފައެވެ. މަސް ބަންދުކުރުމުގެ މަސައްކަތްވެސް މި ބީދައިން ހިނގާނެ ކަމަށް އެ މަނިކުފާނު ވިދާޅުވިއެވެ.
ރިއެކްޝަންސް
