ޗެލްސީ މޮޅު, އާސެނަލް އަދި ލެސްޓަރ ސިޓީއަށްވެސް ޕޮއިންޓެއް!
އިނގިރޭސި ޕްރިމިއާ ލީގުގައި އާދިއްތަ ދުވަހު އާސެނަލް އާއި ފުލަމް ބައްދަލު ކުރި މެޗު 1-1 ން އެއްވަރުވެ, ލެސްޓަރ ސިޓީން ފަހަތުން އަރާ ބްރައިޓަން އަތުން ޕޮއިންޓެއް ހޯދިއިރު, ވާދަވެރި މެޗަކަށްފަހު ޗެލްސީން 4-3 ން ޓޮޓްނަމްގެ މައްޗަށް ކުރިހޯދައިފި އެވެ.
ކްރެވަން ކޮޓޭޖްގައި ކުޅުނު މެޗުގައި ލީޑުނެގީ ފުލަމް އިންނެވެ. މެޗުގެ 11 ވަނަ މިނިޓްގައި ފުލަމްގެ ގޯލް ކާމިޔާބުކުރީ ރައުލް ހިމެނޭޒް އެވެ. ކެނީ ޓޭޓް ތަނަވަސްކޮށްދިން ފުރުޞަތުގައި ހިމެނޭޒްގެ ކަނާތު ފައިން ފޮނުވާލި ބާރު ބޯޅަ ދިފާއުކުރުމުގައި ގޯލްކީޕަރު ޑޭވިޑް ރާޔާއަށް ކުރެވޭނެ ހަމަ އެއްކަމެއްވެސް ނެތެވެ.
އާސެނަލް އަށް ނަތީޖާ އެއްވަރުކޮށްދިނީ މެޗުގެ 52 ވަނަ މިނިޓްގައި ވިލިއަމް ސަލީބާ އެވެ. އެއީ ކައި ހަވާޓްޒް ދިން ޕާހެއްގައެވެ. 88 ވަނަ މިނިޓްގައި މެޗުގެ ނަތީޖާ އާސެނަލް ކޮޅަށް އަނބުރާލެވުނު ކަމަށް ޤަބޫލު ކުރެވުނު ނަމަވެސް ބުކާޔޯ ސަކާ ޖެހި ގޯލް އޮފްސައިޑް ކަމަށް ވީޑިއޯ އެސިސްޓަންޓް ރެފްރީ ވަނީ ނިންމާފައެވެ.
މި ނަތީޖާއާއެކު އެންމެފަހުން ކުޅުނު ދިހަ މެޗުގެ ތެރެއިން އެންމެ މެޗަކުން ބަލިވި ފުލަމް 23 ޕޮއިންޓާއެކު އޮތީ ތާވަލްގެ 10 ވަނަ މަޤާމްގައެވެ. ލިވަޕޫލްގެ ފަހަތުން ތާވަލްގެ 3 ވަނައިގައި އާސެނަލް އޮތީ 29 ޕޮއިންޓާއެކުއެވެ.
ލެސްޓަރ ސިޓީ އާއި ބްރައިޓަން ބައްދަލު ކުރި މެޗުގައި ބްރައިޓަން އިން ދެ ގޯލް ކާމިޔާބުކުކޮށްފައި ވަނިކޮށް ލެސްޓަރ އިން ވަނީ ފަހަތުން އަރާ ނަތީޖާ ހަމަހަމަކޮށްފައެވެ. މިއާއެކު އާ ކޯޗް ރޫޑް ވެން ނިސްޓެލްރޫއި އާއެކު ލެސްޓަރ ސިޓީއަށް އަލުން އިތުބާރު ލިބެންވަނީ ފަށަފައެވެ.
ފުރަތަމަ ހާފު ނިމުންއިރުވެސް 0-2 ގެ ނަތީޖާއަކުން ކުރީގައި އޮތީ ބްރައިޓަން އެވެ. މެޗުގެ އޮއިވަރު 86 ވަނަ މިނިޓްގައި ބަދަލުކޮށްލީ ކެޕްޓަން ޖޭމީ ވާޑީ އޭނާގެ ސްޓައިލްގައި ބްރައިޓަންގެ ގޯލް ފޫއަޅުވާލުމާ އެކުއެވެ. ނަތީޖާ އެއްވަރު ކުރުމަށް ޖެހި ގޯލް ކާމިޔާބުކުރުމުގައިވެސް އެހީތެރިވި ވާޑީ މި ސީޒަންގައި މިހާތަނަށް ވަނީ ހަ ގޯލް ކާމިޔާބުކޮށްފައެއެވެ.
ލެސްޓަރ ސިޓީއަށް މެޗުން މޮޅުވުމުގެ އުއްމީދު އެއްކޮށްހެން ގެއްލިފައި ވަނިކޮށް ޓީމަށް ޕޮއިންޓެއް ކަށަވަރުކޮށްދިނީ ބަދަލު ކުޅުންތެރިއެއްގެ ގޮތުގައި ނިކުއިން ބޮބީ ޑި ކޯޑޮވާ-ރީޑް އެވެ. މިއީ ލީގުގައި އޭނާގެ ފުތަމަ ގޯލް ވެސް މެއެވެ. ބޮބީގެ ގޯލް ލެސްޓަރ ސިޓީއަށް ކާމިޔާބުކޮށްދިނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ފުރަތަމަ މިނިޓްގައެވެ.
ޗެލްސީ އާއި ޓޮޓްނަމް ހޮޓްސްޕަރ ބައްދަލުކުރި މެޗުގެ 9 ވަނަ މިނިޓްގައި ޑޮމިނިކް ސޮލާންކޭ އަދި 11 ވަނަ މިނިޓްގައި ޑެހަން ކުލުސެވްސްކީ ކާމިޔާބުކޮށްދިން ގޯލާއެކު ލީޑުނެގީ ޓޮޓްނަމްއިންނެވެ. ނަމަވެސް 17 ވަނަ މިނިޓްގައި މާކް ކުކުރެޔާ ތަނަވަސްކޮށްދިން ދިން ފުރުޞަތުގައި ޗެލްސީން އެމީހުންގެ ފުރަތަމަ ގޯލް ޖޭޑަން ސަންޗޯ ކާމިޔާބު ކުރިއެވެ.
ޗެލްސީއަށް ނަތީޖާ އެއްވަރުކޮށްދިނީ 61 ވަނަ މިނިޓްގައި ކޯލް ޕާމާ ކާމިޔާބުކޮށްދިން ޕެނަލްޓީންނެވެ. މެޗުގައި ޗެލްސީއަށް ލިބުނު ދެވަނަ ޕެނަލްޓީވެސް 84 ވަނަ މިނިޓްގައި ކާމިޔާބުކޮށްދިނީ ކޯލް ޕާމާ އެވެ. މެޗުން ޗެލްސީ މޮޅުވި ގޯލް 73 ވަނަ މިނިޓްގައި ޖެހީ އެންޒޯ ފެނާންޑޭޒްއެވެ.
މެޗުގެ އިތުރު ވަގުތުގެ ހަވަނަ މިނިޓްގައި ޓޮޓްނަމްއިން ގޯލެއް ކާމިޔާބުކޮށް ނަތީޖާގެ ފަރަގު ވަނީ ކުޑަކޮށްފައެވެ. ޓޮޓްނަމްގެ ތިންވަނަ ގޯލް ހަމޭސް މެޑިސަން ތަނަވަސްކޮށްދިން ފުރުޞަތުގައި ކާމިޔާބުކޮށްދިނީ ސޮން ހިއުންގ މިން އެވެ.
ޗެލްސީގެ މޮޅާއެކު ތާވަލްގެ އެއްވަނައިގައި އޮތް ލިވަޕޫލާ ޕޮއިންޓްގެ ފަރަގު ކުޑަވެފައި ވީނަމަވެސް ލިވަޕޫލް 35 ޕޮއިންޓާއެކު އެއްވަނައިގައި އޮތީ އެއް މެޗު މަދުން ކުޅެގެންނެވެ. ޗެލްސީ ދެވަނައިގައި އޮތީ 31 ޕޮއިންޓާއެކުއެވެ. 20 ޕޮއިންޓާއެކު ޓޮޓްނަމް އޮތީ ތާވަލްގެ 11 ވަނައިގައެވެ.
އާދިއްތަ ދުވަހު ބާންމައުތް އާއި އިޕްސްވިޗް ޓައުން ބައްދަލުކުރި މެޗު 2-1 ން ފަހަތުންއަރާ ފަހުވަގުތު ބާންމައުތުން ކާމިޔާބުކުރުމާއެކު އިޕްސްވިޗް ޓައުން ވަނީ ހިތްދަތިގޮތަކަށް ބަލިވެފައެވެ. ނަތީޖާ އާއެކު ބާންމައުތުން 24 ޕޮއިންޓާއެކު ތާވަލްގެ އަށްވަނަ އަށް ކުރިއަށް ޖެހިލިއިރު, 15 މެޗުން އިޕްސްވިޗްޓައުން އަށް ލިބުނު 9 ޕޮއިންޓާއެކު އޮތީ ތާވަލްގެ 18 ވަނައިގައެވެ.
ރިއެކްޝަންސް
