ޤާނޫނު އަސާސީއަށް ގެނައި ބަދަލުތަކުގެ ސަބަބުން ރައްޔިތުންގެ ބާރުވެރިކަން އިތުރުކުރެވިއްޖެ- ރައީސުލްޖުމްހޫރިއްޔާ
ރައްޔިތުންގެ މަޖިލިހުން ޤާނޫނު އަޞާސީއަށް ގެނައި ބަދަލުތައް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދިފާއުކުރައްވައިފި އެވެ. ސަރުކާރުން ހިންގާ ޕާޓީ, ޕީއެންސީގެ ސުޕަރ މެޖޯރިޓީން ޤާނޫނު އަސާސީއަށް ގެނައި ބަދަލުތައް ދިފާއުކުރައްވާ ރައީސުލްޖުމްހޫރިއްޔާ ވާހަކަދެއްކެވީ އއ.އަތޮޅާއި މާލެ އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މަތިވެރިއަށް ވަޑައިގެން, އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ ޤާނޫނު އަސާސީއަށް ގެނައި ބަދަލުތަކުގެ ސަބަބުން ރައްޔިތުންގެ ބާރުވެރިކަން އިތުރުކުރެވިފައިވާކަމަށެވެ. ސިޔާސީ ތަޢައްޞަބުތަކުން އެއްކިބާވެވަޑައިގެން ވިސްނާވަޑައިގެންފި ކޮންމެ ރައްޔިތަކަށްވެސް އެކަން ފަހުމުވެވަޑައިގަންނަވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނު ވިދާޅުވީ ޤާނޫނު އަސާސީގެ މަޤްޞަދަކީ، ދައުލަތުގެ ސިޔާދަތީ ބާރާއި އެ ބާރު ހިނގާ ސަރަޙައްދު އިޢުލާންކޮށް ކަނޑައެޅުމާއި، ރައްޔިތުންގެ ބާރު ކަނޑައެޅުމާއި، ރައްޔިތުންގެ ޙައްޤުތަކާއި ޒިންމާތައް ކަނޑައެޅުމާއި، ދައުލަތުގެ ޤާނޫނީ ވެރިކަން ހިންގުމުގެ ނިޒާމާއި ތަރުތީބާއި އިންތިޒާމުތައް ކަނޑައެޅުން ކަމަށެވެ. ޤާނޫނު އަސާސީއަށް ބަދަލުގެނެސްފައިވަނީ، ރައްޔިތުންގެ ދިފާޢުގައި ކަމަށް ރައީސް ވިދާޅުވިއެވެ.
ޤާނޫނު އަސާސީއަށް ގެނައި އިސްލާޙުތަކުގެ ސަބަބުން ރާއްޖޭގެ ޚާއްޞަ އިޤްތިޞާދީ ސަރަޙައްދުގެ އެންމެ އަކަ އިންޗިއަކަށްވެސް ބަދަލެއް ގެނެވޭނީ، ރައްޔިތުންގެ މަޖިލީހުގެ އަޣުލަބިއްޔަތުގެ ހަތަރުބައިކުޅަ ތިންބައިގެ ވޯޓުގެ އިތުރުން، 143،332 ރައްޔިތުންގެ ރުހުމާވެސް އެކުގައިކަމަށް އެމަނިކުފާނު ވިދާޅުވިއެވެ.
ޤާނޫނު އަސާސީގެ 251 ވަނަ މާއްދާއަށް ގެނައި ބަދަލާއެކު، ދިވެހިރާއްޖޭގައި އަސްކަރީ އެންމެ ބޫޓު ޖޯޑެއް ހަރަކާތްތެރިވުމަށްވެސް، ރައްޔިތުންގެ މަޖިލީހުގެ އަޣުލަބިއްޔަތު ހޯދަންޖެހޭނެކަން އެމަނިކުފާނު ފާހަގަކުރެއްވިއެވެ. އަދި، އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި، ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ، އަސްކަރީ ބޭނުމަކަށް، ދިވެހިރާއްޖޭގެ ސަރަޙައްދުގައި ބޭރުގެ ސިފައިން އެއްވެސް ސިފައެއްގައި ޢަމަލީގޮތުން ޙަރަކާތްތެރިވުމަށް ހުއްދަ ދިނުންވެސް ވަނީ މަނާކޮށްފައެވެ.
ޤާނޫނު އަސާސީއަށް ގެނައި ބަދަލުތަކުގެ ތެރެއިން އެންމެ ގިނަބަޔަކު ކަންބޮޑުވުން ފާޅުކުރަމުން އައި އިސްލާހަކީ ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފިނަމަ ރައްޔިތުންގެ މަޖިލިހުގެ މެމްބަރު ކަމުގެ ގޮނޑި ގެއްލޭ އިސްލާހެވެ. އެކަމާ ގުޅޭގޮތުން ރައީސުލްޖުމްހޫރިއްޔާ ވިދާޅުވީ ރައްޔިތުންގެ މަޖިލީހުގެ މެންބަރަކަށް ވުމުގެ ޝަރުޠުތަކަށް ގެނައި ބަދަލުންވެސް ހިމާޔަތްކޮށްދެނީ ރައްޔިތުންގެ ޙައްޤުތައްކަމަށެވެ. މެމްބަރުން އިންތިޚާބުގައި ވާދަކުރަނީ ވަކި ފިކުރެއް ނުވަތަ ޕާޓީއެއް ތަމްސީލުކުރާ މީހެއްގެ ގޮތުންކަމަށާއި، އެހެންކަމުން، އިންތިޚާބުވާ މެންބަރާ ދާއިރާގެ ރައްޔިތުންނާ ދެމެދު ވަނީ އަހުދެއްކަން އެމަނިކުފާނު ފާހަގަކުރެއްވިއެވެ. އެ ޢަހުދުގައި މެންބަރު އެއްބަސް ވަނީ ޤާނޫނު އަސާސީގައި ބުނާ މަސްއޫލިއްޔަތު އަދާކުރުމަށްކަމަށާއި، ޤާނޫނު އަސާސީއަށް ގެނައި އިޞްލާޙުގެ ސަބަބުން މެންބަރުން ވީ އަޙުދު ހިމާޔަތްކުރެވިގެންދާނެކަމަށް ވިދާޅުވިއެވެ.
ޤާނޫނު އަސާސީއަށް އިޞްލާޙެއް ގެނައުމުގެ ކުރިން ރައްޔިތުންގެ ވޯޓުން ފާސްކުރަންޖެހޭ ޙާލަތްތަކަށް ރިޢާޔަތްކުރައްވަމުން، ފެންނަ ނުފެންނަ ވޯޓާމެދު ގޮތް ނިންމުމަށް، މަދު މީސްކޮޅެއްގެ މުށުތެރޭގައި އޮތް ބާރު، ޤާނޫނު އަސާސީއަށް ގެނައި އިޞްލާޙާއެކު ރައްޔިތުންގެ އަތްމައްޗަށް ދޫކޮށްލެވިފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.
" ސިޔާސީ ތަޢައްސުބުން އެއްކިބާވެވަޑައިގެން، ވިސްނާވަޑައިގެންފި ކޮންމެ ރައްޔިތަކަށްވެސް ކޮންމެ ބޭފުޅަކަށްވެސް ވަރަށް ފަސޭހައިން ފަހުމުވެވަޑައިގަންނަވާނެ ޤާނޫނުއަސާސީ މިހާރުކަން މިއޮތީ ކުރިއަށްވުރެ ރަނގަޅަށް ރައްޔިތުންގެ ބާރުވެރިކަން ޔަގީންކުރެވިފައި. ރައްޔިތުންގެ ޙައްގުތައް ރައްޔިތުންގެ އަތްމައްޗަށް ރައްޔިތުން ބޭނުންވާގޮތަށް ކޮންޓްރޯލް ލިބިފައި" ރައީސް ވިދާޅުވިއެވެ.
މީގެ އިތުރުން، ރައީސުލްޖުމްހޫރިއްޔާގެ މަސްއޫލިއްޔަތަށް ގެނައި ބަދަލަކީވެސް، ދިގު ރާސްތާގެ އަދި ކުރު ރާސްތާގެވެސް ތަރައްޤީގެ ޕްލޭންތައް ހެދުމުގެ މަސްއޫލިއްޔަތު ރައީސުލްޖުމްހޫރިއްޔާއަށް މަތިކުރެވިފައި ނުވާތީ، އެކަމަށް ގެނައި އިޞްލާޙެއްކަމަށް ވިދާޅުވިއެވެ.
ޤާނޫނު އަސާސީއަށް ގެނައި ބަދަލުތައް ރައީސުލްޖުމްހޫރިއްޔާ ތަފްސީލްކޮށްދެއްވާފައި މިވަނީ ޤާނޫނު އަސާސީގެ ދިފާއުގައި އެމްޑީޕީ އިސްވެއޮވެ މިމަހުގެ 10 ވަނަ ދުވަހު ބޮޑު އެއްވުމަކަށް ތައްޔާރުވަމުން ދަނިކޮށެވެ.
ރިއެކްޝަންސް
