ކައުންސިލްތަކުން ބޭނުންނަމަ އައިސްޕްލާންޓްތައް ހިންގަން ހަވާލުކުރާނީ ކައުންސިލްތަކާ- ރައީސް
ކައުންސިލްތަކުން ބޭނުންނަމަ އައިސްޕްލާންޓްތައް ހިންގަން ހަވާލުކުރަން ބޭނުންފުޅުވަނީ ކައުންސިލްތަކާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އއ.ރަސްދޫއަށް މިއަދު ވަޑައިގެން އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ އިޤްތިޞާދު ފުޅާކުރުމުގައި އެންމެ މުހިއްމު އެއް ދާއިރާއަކީ މަސްވެރިކަމުގެ ދާއިރާ ކަމަށާއި, މަސްވެރިކަމަށް ވަރަށްބޮޑު އިސްކަމެއް ދެއްވާ ކަމަށެވެ.
މަސްވެރިކަމުގައި އައިސްގެ މުހިއްމުކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ އައިސްޕްލާންޓްތައް ރާއްޖޭގެ އެކި ކަންކޮޅުތަކުގައި ޤާއިމްކުރުމަކީ އަދި އިތުރުކުރުމަކީ ސަރުކާރުގެ މެނިފެސްޓޯގައި ހިމަނާފައި އޮތްކަމެއް ކަމަށެވެ. އެގޮތަށް މަސައްކަތް ފެށިފައިވާ ކަމަށާއި, އެކި ގައުމުތަކުގެ ފަންޑާއި ސަރުކާރުގެ ބަޖެޓްގެ ތެރެއިން އެކި ރަށްރަށުގައި އައިސްޕްލާންޓްތައް ގާއިމްކޮށް, ކެޕޭސިޓީ އިތުރުކުރުމުގެ މަސައްކަތް ކުރައްވާނެ ކަމަށް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ސަރުކާރުން ބޭނުންވަނީ ޢާއްމު މަސްވެރިންނާއި, ކެޔޮޅުންނާއި, އޮޑިވެރިންނަށް, އެމީހުންގެ އޮޑީގައި އަމިއްލައަށް އައިސް އުފައްދައިގެން މަސް ރައްކާތެރިކަމާއެކީ ގެންގުޅެވޭނެ ކެޕޭސިޓީ ގާއިމް ކޮށްދޭން ކަމަށެވެ. އެކަމަށް މިހާރު ލޯނު ދޭން ފަށާފައިވާކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ ވަރަށްގިނަ މަސްވެރިން އެކަމުގެ ފައިދާ މިހާރުވެސް އެބަހޯއްދަވާ ކަމަށެވެ.
އައިސްޕްލާންޓްތައް ހިންގަން ކައުންސިލްތަކާ ހަވަލުކުރަން ބޭނުންފުޅުވާކަން ފާހަގަކުރައްވާ ވިދާޅުވީ އެރަށެއްގެ ހާލަތުގައި އެކަން ނިންމާނީ އެރަށަކުން ކަމަށެވެ.
" އަޅުގަނޑުމެން ބޭނުންވަނީ ވީހާވެސް ރައްޔިތުންނާ ގާތުން, ވީހާވެސް މަސްވެރިންނާ ގާތުން މަސްވެރިކަމުގެ ސިނާއަތް ފުޅާކުރަން." ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ބޭނުންފުޅުވަނީ ސަރުކާރުން ހުރިހާކަމެއް ނުގެންގުޅެ, ސަރުކާރުން ހުރިހާކަމެއްގެ ކޮންޓްރޯލް ނުގެންގުޅެ, ޢާއްމު މަސްވެރިންނަށް, ވިޔަފާރިވެރިންނަށް, އެފުރުޞަތުދޭން ކަމަށެވެ. ސަރުކާރުގަ މިއޮންނަ ކޮންޓްރޯލާއި ބާރު, މަސްވެރިންގެ އަތްމައްޗަށް ދޫކޮށްލަން ބޭނުންފުޅުވާ ކަމަށް ވިދާޅުވިއެވެ.
ދޯނިތަކުގައި އައިސްޕްލާންޓް ގާއިމްކުރުމުގެ ފުރުޞަތު ދޭން ނިންމާ, ލުއި ލޯނު ދެނީ އަމިއްލައަށް ކެޕޭސިޓީ ގާއިމް ކުރުމުގެ ފުރުޞަތު ހޯދައިދޭން ކަމަށް އެމަނިކުފާން ވިދާޅުވިއެވެ. އެކަން އަންނަ އަހަރު ވަރަށް ބާރަށް ފުޅާވެގެންދާނެ ކަމަށްވެސް ރައީސް ވިދާޅުވިއެވެ.
ރިއެކްޝަންސް
