އިސްލާމީ ކެލިގްރަފީގެ ހުނަރު ދައްކާލި ދަރިވަރަށް މިނިސްޓްރީން އެހީވަނީ
އިސްލާމީ ކެލިގްރަފީގެ ހުނަރު ދައްކާލި ދަރިވަރަށް ފުރުޞަތުތައް ވަހިކޮށްދީ އެހީތެރިވާން މިނިސްޓްރީން ނިންމައިފިއެވެ. ކެލިގްރަފީ ދާއިރާއިން އާދަޔާ ޚިލާފް ފަންނުވެރިކަމެއް ދައްކާލީ ޖަމާލުއްދީން ސްކޫލްގެ ދަރިވަރު ހުސައިން ނާއިޝް އެވެ.
އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސައީދު ވަނީ މިއަދު ޞާއިޝްގެ މައިންބަފައިންނާއެކު ނާއިޝްއާ ބައްދަލުކޮށްފައެވެ. މިނިސްޓްރީގައި ބޭއްވި ބައްދަލުކޮށްލުމަށްފަހު މިނިސްޓަރ ޝަހީމް ވިދާޅުވީ ނާއިޝް އެދުނު ގޮތަށް އެދާއިރާއިން ކުރިއަށް ދިއުމަށް ބޭނުންވާ އިތުރު ހުނަރު ދަސްކޮށދިނުމަށް މިނިސްޓްރީން އެހީވާނެ ކަމަށެވެ. ނާއިޝް އަކީ ކީރިތި ޤުރުއާން ލިޔުމާއި, އިސްލާލިމް ކެލިގްރަފީގެ ދާއިރާއިން އާދަޔާޚިލާފް ހުނަރެއް ލިބިފައިވާ ދަރިވަރެކެވެ.
މިނިސްޓަރ ޝަހީމް ވިދާޅުވީ ނާއިޝް ސްކޫލް ނިމުމުން، ޤުރުއާން މަރުކަޒު ތެރޭގައި އެ ހުނަރު އެހެން ކުދިންނަށް ދަސްކޮށްދިނުމަށް އޭނާއާ މަސައްކަތްތަކެއް ޙަވާލު ކުރާނެ ކަމަށެވެ. އަދި ރާއްޖޭގައި މި އަންނަ އަހަރު ހުޅުވާ އައްޑޫ އިސްލާމިކް ސެންޓަރާއި ހިތަދޫ އިސްލާމިކް ސެންޓަރާއި ފުވައްމުލައް ސިޓީގެ ޤުރުއާން މަރުކަޒުގައި ނާއިޝްގެ އިސްލާމިކް ކެލިގްރަފީގެ ފަންނުވެރި ލިޔުންތައް ބަހައްޓާނެ ކަމަށްވެސް ވަޒީރު ވިދާޅުވިއެވެ.
https://x.com/Mohamedshaheem1/status/1865697102715924625
މީގެއިތުރުން ނާއިޝްއަށް އެހީވުމަށް އިސްލާމިކް ކެލިގްރަފީ ހެދުމަށް ބޭނުންވާ އެންމެހައި ޒަމާނީ ވަސީލަތްތައް ހޯދައިދެއްވާނެ ކަމަށް ވިދާޅުވިއެވެ. މި ދާއިރާއިން އިތުރު ހުނަރު ނާއިޝް އަށް ދަސްކޮށްދިނުމަށް ދާއިރާގެ ފަންނުވެރިޔަކު ހަމަޖައްސައިދޭސް މިނިސްޓަރ ވަނީ ނިންމަވާފައެވެ.
" އިސްލާމީ ދާއިރާތަކުން ކުރިއަށް ދާން ޝައުޤު ހުރި މިފަދަ ހުރިހައި ކުދިންނަށް މި ފުރުޞަތު އޮންނާނެ. " މިނިސްޓަރ ވިދާޅުވިއެވެ.
އަޑުއިވުމާއި ވާހަކަދެއްކުމުން މަހުރޫމްވެފައިވާ ނާއިޝްގެ ހުނަރު ފާހަގަވީ އޭނާ ކިޔަވާ ޖަމާލުއްދީން ސްކޫލް ފާރުތަކުގައި ލިޔެފައިވާ ކެލިގްރަފީންނެވެ.
ރިއެކްޝަންސް
