ފުވައްމުލައް ސިޓީ މާދަމާ ކުޅޭ މެޗަށް މެންބަރު އިއްބެ 50 ސަޕޯޓަރަކަށް ޓިކެޓު ދެނީ
އިއްބެގެ ޕޭޖަށް މެސެޖެއް ފޮނުވައިގެން ނަން ނޯޓު ކުރެވޭނެ
ނައިންޓީ ޕްލަސް ގޯލްޑްކަޕްގައި މާދަމާ ހަވީރު ފުވައްމުލައް ސިޓީ ކުޅޭ މެޗަށް ވަންނަން ބޭނުންވާ 50 ސަޕޯޓަރަކަށް ފުވައްމުލަކު ދެކުނު ދާއިރާގެ މަޖިލިސް މެންބަރު އިބްރާހީމް ހުސައިން އިއްބެ ޓިކެޓު ދެއްވާނެ ކަމަށް ވިދާޅުވެއްޖެއެވެ.
ދެކުނު ދާއިރާގެ މަޖިލިސް މެންބަރުގެ ރަސްމީ ޕޭޖުގައި ކޮށްފައިވާ ޕޯސްޓެއްގައި މެންބަރު އިބްރާހީމް ހުސައިން ވިދާޅުވީ މާދަމާ ކުޅޭ މެޗަށް ވަންނަން ބޭނުންވާ ސަޕޯޓަރުންގެ ތެރެއިން 50 މީހަކަށް ޓިކެޓު ދެއްވާނެ ކަމަށެވެ.
އިއްބެ ވިދާޅުވީ 50 ޓިކެޓު ދިނުމަށް ހަމަޖެހިފައިވަނީ އޭނާގެ ފޭސްބުކް ޕޭޖުގައި ނަންނޯޓު ކުރައްވާ ބޭފުޅުންގެ ތެރެއިން އެންމެ ފުރަތަމަ ނަން ފޮނުވާ 50 ފަރާތަކަށް ކަމަށެވެ.
ނައިންޓީ ޕްލަސް ގޯލްޑްކަޕްގައި މާދަމާ ހަވީރު ފުވައްމުލައް ސިޓީ ކުޅުމަށް ހަމަޖެހިފައިވަނީ ކޮޅުމަޑުލު ތިމަރަފުށްޓާއެވެ. މި މުބާރާތުގައި މިހާތަނަށް އެންމެ ރަނގަޅު ކުޅުމެއް ދައްކަމުން އަންނަ ޓީމަކީ ފުވައްމުލައް ސިޓީގެ ޓީމެވެ. އެޓީމު ދެވަނަ ބުރަށް ދަތުރު ކޮށްފައިވަނީ ސައްތައިސައްތައިގެ ރެކޯޑަކާއެކު ކުޅުނު ހުރިހާ މެޗެއްވެސް ކާމިޔާބު ކޮށްފައެވެ.
ފުވައްމުލައް ސިޓީ ކުޅޭ މެޗުތަކަކީ މިހާރުވެސް އެރަށަށް ނިސްބަތްވާ ގިނަ އަދަދެއްގެ ސަޕޯޓަރުން ވަންނަ މެޗުތަކެކެވެ.
މެންބަރު އިއްބެ ވިދާޅުވީ ފުވައްމުލަކު ޓީމަށް ސަޕޯޓުކުރުމަށް ވަންނަ ފަރާތްތަކަށް ޓިކެޓު ދިނުމަށް ނިންމެވީ ވާދަވެރި މެޗެއް ކުޅެމުންދާއިރު މިހާރަށްވުރެ ބޮޑަށް ސަޕޯޓަރުން އިތުރުކޮށް ޓީމަށް އިތުރު ހިތްވަރެއް ދިނުމުގެ ގޮތުން ކަމަށެވެ.
ރިއެކްޝަންސް
