އަނެއްކާވެސް އެމްބާޕޭ އަތުން ޕެނަލްޓީ ނާކާމިޔާބުވެ, ރެއާލް ބަލިވެއްޖެ
އަނެއްކާވެސް ފޯވާޑް އެމްބާޕޭ އަތުން ޕެނަލްޓީ ނާކާމިޔާބުވެ, ރެއާލް މެޑްރިޑް ބަލިވެއްޖެއެވެ.
މިދިޔަ ހަފްތާގައި ޗެމްޕިއަންސް ލީގުގައި ލިވަޕޫލް އަތުން ބަލިވި މެޗުގައިވެސް ޕެނަލްޓީއެއް ނާކާމިޔާބުވި އެމްބާޕޭ އަތުން ލަލީގާގައި ޕެނަލްޓީ ނާކާމިޔާބުވީ އެތްލެޓިކް ކްލަބް އަތުން ބަލިވި މެޗުގައެވެ. 2-1 ން އެތްލެޓިކް ކްލަބް އަތުން ބަލިވި މެޗުގައި އެމްޕާޕޭ އަތުން ޕެނަލްޓީ ނާކާމިޔާބުވީ 1-0 ން ރެއާލްގައި ފަހަތުގައި ވަނިކޮށެވެ. ޑިފެންޑަރ ރުޑިގާ އަށް ކުރި ފައުލަކަށް ދިން ޕެނަލްޓީ އެމްބާޕޭ ފޮނުވާލުމުން ކީޕަރު މަތަކުރީއެވެ.
އެމްބާޕޭ އަތުން ޕެނަލްޓީ ނާކާމިޔާބުވެފައި ވަނިކޮށް, ޖޫޑް ބެލިންގހަމް ލަނޑު ޖަހާ ނަތީޖާ ހަމަހަމަ ކޮށްދިނެވެ. އެކަމަކު އޭގެ ހަ މިނިޓްފަހުން އެތްލެޓިކް ކްލަބުން ދެވަނަ ފަހަރަށް ލަނޑު ޖަހާ އަލުން ލީޑް ހޯދާ, ރެއާލް ބަލިކުރިއެވެ. ރެއާލް ބަލިކުރަން ލަނޑު ޖަހައިދިނީ ގޯކާ ގުރުޒެޓާ އެވެ.
މެޗުގައި ފުރަތަމަ ލަނޑު ޖަހާ އެތްލެޓިކް ކްލަބަށް ލީޑް ނަގައިދިނީ އެލެކްސް ބެރެންގުއާ އެވެ. މެޗަށްފަހު ރެއާލް މެޑްރިޑްގެ ކޯޗު ކާލޯ އެންޗެލޮޓީ ބުނީ އެމްބާޕޭ ހުރީ އޭނާގެ އެންމެ ރަނގަޅު ފޯމްގައި ނޫން ކަމަށެވެ. އެންޗެލޮޓީ ބުނީ އެމްބާޕޭއަށް ފުރުޞަތު ދޭންޖެހޭ ކަމަށެވެ. މެޗަށް ނިކުއިންއިރު މެޗުގެ އަދަދު ހަމަކޮށް ލީގު ތާވަލްގެ އެއްވަނައަށް ޖެހިލަން ރެއާލް އަށް ފުރުޞަތު އޮތެވެ. އެކަމަކު މިހަފްތާގައި ބާސެލޯނާވެސް މޮޅުވުމުން އެފުރުޞަތު މިވަގުތަށް ރެއާލް އަށް ނެތެވެ.
މިވަގުތު ލީގު ޓޭބަލަށް ބަލާއިރު އެއްވަނައިގަ އޮތް ބާސެލޯނާއާ ރެއާލްއާ ދެމެދު 4 ޕޮއިންޓްގެ ފަރަގެއް އެބައޮތެވެ. އެކަމަކު ބާސެލޯނާ ވަނީ ރެއާލްއަށްވުރެ އިތުރަށް މެޗެއް ކުޅެފައެވެ.
އެތްލެޓިކް ކްލަބް އޮތީ ލީގު ތާވަލްގެ 4 ވަނައިގައެވެ. ތިންވަނައިގައި އޮތީ އެތްލެޓިކޯ މެޑްރިޑެވެ.
ރިއެކްޝަންސް
