ބީ.އެމް.އެލްގެ ޑެޕިއުޓީ ސީ.އީ.އޯ އަކަށް ސަހާ
ބޭންކް އޮފް މޯލްޑިވްސްގެ ޑެޕިއުޓީ ސީ.އީ.އޯ އަކަށް ސަހާ ވަހީދު ހަމަޖައްސަވައިފިއެވެ.
ސީ.އީ.އޯގެ މަގާމުގެ އިތުރުން އެކުންފުނީގެ ސީ.އޯ.އޯގެ މަގާމަށްވެސް ސަހާ ވަނީ އައްޔަނު ކުރައްވާފައެވެ.
ބޭންކިންގ ދާއިރާގައި 18 އަހަރަށް ވުރެ ގިނަ ދުވަހުގެ ތަޖުރިބާ ލިބިވަޑައިގެން ހުންނެވި ސަހާ އަކީ ބޭންކް އޮފް މޯލްޑިވްސްގެ އިސް ގިނަ މަގާމުތަކެއް އަދާކޮށްފައިވާ ބޭފުޅެކެވެ.
ލަންޑަން ސްކޫލް އޮފް އިކޮނޮމިކްސް އެންޑް ޕޮލިޓިކަލް ސައިންސް އިން އިކޮނޮމިކްސް އެންޑް އިކޮނޮމިކް ހިސްޓްރީގެ ދާއިރާއިން ބެޗްލަ އޮފް ސައިންސް ޑިގްރީ ހާސިލް ކުރައްވައިފާ ސަހާ ވަނީ ކޮމާޝަލް ލޯގެ ދާއިރާއިން މާސްޓަ އޮފް ލޯސް (އެލްއެލްއެމް) ވެސް ފުރިހަމަ ކުރައްވައިފައެވެ. މީގެ އިތުރުންވެސް ސަހާ ވަނީ އޭޝިއަން އިންސްޓިޓިއުޓް އޮފް ޗާޓަޑް ބޭންކާސް އިން ޗާޓަޑް ބޭންކަ ޕްރޮފެޝަނަލް ކޮލިފިކޭޝަން ވެސް ހާސިލުކުރައްވައިފައެވެ.
ބޭންކް އޮފް މޯލްޑިވްސް އިން މިއަދު އިއުލާން ކުރެއްވި އާ އެކްޒެކްޓިވް ކޮމެޓީގައި ތިއްބަވަނީ އަދުލީ އަހުމަދު ދީދީ، ޗީފް ޓެކްނޮލޮޖީ އޮފިސަރު (ސީޓީއޯ)، މޫސާ ނިމާލް، ޗީފް ބިޒްނަސް އޮފިސަރު (ސީބީއޯ)، ރަޝްފާ ޖައުފަރު، ޗީފް ކްރެޑިޓް އޮފިސަރު (ސީސީއޯ)، އައިޝަތު ޒަމްރާ ޒާހިރު، ޗީފް މާކެޓިން އޮފިސަރު (ސީއެމްއޯ)، ހަސަން ކަލާމް، ޗީފް އިސްލާމިކް ބޭންކިން އޮފިސަރު (ސީއައިބީއޯ) އެވެ.
ބީ.އެމް.އެލް އިން ވިދާޅުވީ ކުންފުނީގެ އިސްމަގާމުތަކަށް ދިވެހިން އައްޔަން ކުރެވުމަކީ ތައުލީމީ ގާބިލު ދިވެހިން ބިނާ ކުރުމަށް ދޭ އަހައްމިއްޔަތުކަން ކަމަށާއި އެއިން ކޮންމެ ބޭފުޅަކީވެސް އެބޭފުޅެއްގެ ދާއިރާއިން ނަމޫނާ އަދި ތަޖުރިބާކާރު ބޭފުޅެއްކަން ސާބިތުކޮށްދީފައިވާ ބޭފުޅެއް ކަމަށެވެ.
ރިއެކްޝަންސް
