މިނިސްޓަރ ޑރ. ރަމީލާ އިސްތިއުފާ ދެއްވައިފި

މިނިސްޓަރ އޮފް މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ އާއިޝަތު ރަމީލާ އިސްތިއުފާ ދެއްވައިފިއެވެ.

އެކަމަނާ އިސްތިއުފާ ދެއްވާފައިވަނީ ސިއްޙީ ހާލުކޮޅު ހުރިގޮތުން ކަމަށް ރައީސުލްޖުމްހޫރިއްޔާގެ އޮފީހުން މައުލޫމާތު ދެއްވިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ ވަޒީރު ކަމުން އިސްތިއުފާ ދެއްވުމަށް ޑރ. އާއިޝަތު ރަމީލާ ހުށަހެޅުއްވުމާ ގުޅިގެން ރައީސުލްޖުމްހޫރިއްޔާ ވަނީ އެކަމަނާގެ އިސްތިއުފާ ގަބޫލުފުޅު ކުރައްވައި އެކަމަނާ ކޮށްދެއްވި އިޚްލާސްތެރި މަސައްކަތަށް ޝުކުރު އަދާކުރައްވާފައެވެ.

ޑރ. އާއިޝަތު ރަމީލާއަށް ޝުކުރު އަދާކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިޒު ނެރުއްވި ބަޔާނުގައި ވިދާޅުވީ ވަޒީރެއްގެ ހައިސިއްޔަތުން "ދިވެހިރާއްޖޭގެ ޤާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، އަޅުގަނޑަށް ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި އަޅުގަނޑު ވަރަށް އިޚްލާޞްތެރިކަމާއެކު ޝުކުރުއަދާކުރަމެވެ."

ރައީސުލްޖުމްހޫރިއްޔާ ވިދާޅުވީ ޑރ. އާއިޝަތު ރަމީލާ ފަދަ ހީވާގި އަމާނާތްތެރި ޤާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށާއި ކުރިއަށް އޮތްތާނގައިވެސް އެކަމަނާގެ ޚިދުމަތް ދިވެހި ޤައުމަށް ލިބޭނެކަން ޔަޤީންކުރައްވާ ކަމަށެވެ.

ރައީސުލްޖުމްހޫރިއްޔާ ވަނީ ޑރ. ޢާއިޝަތު ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި މާތްﷲ ގެ ތަނަވަސް ރަޙުމަތްފުޅުން އެކަމަނާއަށް އަވަސް އަދި ދާއިމީ ޝިފާއެއް މިންވަރު ކުރެއްވުމަށާއި އަދަށްވުރެ އުފާވެރި ފާގަތި މުސްތަޤުބަލެއް މިންވަރުކުރެއްވުން އެދި ދުޢާކުރައްވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި އަލަށް އުފެއްދެވި އެގްރިކަލްޗަރ އެންޑް އެނިމަލް ވެލްފެއަރގެ މިނިސްޓަރުގެ މަގާމާ ޑރ. އާއިޝަތު ހަވާލުވެވަޑައިގެން އެދާއިރާއިން އެކަމަނާ ވަނީ ގިނަ މަސައްކަތްތަކެއް ކުރައްވާފައެވެ. އަދި ގޮންޖެހުންތާކާއެކުވެސް ސަރުކާރުގެ ފުރަތަމަ 52 ހަފްތާތެރޭގައި ބޮޑެތި ކުރިއެރުންތަކެއް ހޯދެއްވި ވަޒީރެއްގެ ގޮތުގައި ޑރ. އާއިޝަތު ރަމީލާ ވަނީ ފާހަގަ ކުރެވިފައެވެ.

އެކަމަނާ ވަޒީރުކަމާ ހަވާލުވެގެން މަދުދުވަސްކޮޅެއްގެ ތެރޭގައި ކެންސަރުގެ އާލާސްކަންފުޅަކަށް ފަރުވާ ހޯއްދަވަން ވަނީ ފައްޓަވާފައެވެ.