އަނިޔާވެރިކަމާއި, ނުރައްކާތެރި ބަސްތައް ބޭނުންކުރުމަކީ ޙިޔާލުފާޅުކުރުމުގެ މިނިވަންކަމެއް ނޫން- ފޮރިންގ މިނިސްޓަރ
އަނިޔާވެރިކަމާއި, ނުރައްކާތެރި ބަސްތައް ބޭނުންކުރުމަކީ ޙިޔާލުފާޅުކުރުމުގެ މިނިވަންކަމެއް ނޫން ކަމަށް ފޮރިންގ މިނިސްޓަރ ޑރ.އަބްދުالله ހަލީލް ވިދާޅުވެއްޖެ އެވެ. ފޮރިންގ މިނިސްޓަރ މިފަދަ ޓްވީޓެއް މިކުރެއްވީ އެމްޑީޕީގެ އެކްޓިވިސްޓް ހުސައިން ޝާފިއު (ތުއްތު) ކުރި ޓްވީޓަކާ ގުޅިގެން މިއަދު ފުލުސް އޮފީހަށް ހާޒިރުކުރުމުން, އެކަމާ ދެކޮޅަށް އެޕާޓީގެ އިސްފަރާތްތައް ތެދުވި ދަނޑިވަޅެއްގައެވެ.
ޑރ.ހަލީލްގެ ޓްވީޓްގައި ވަކި ކަމެއް ފާހަގަނުކުރެއްވި ނަމަވެސް ޓްވީޓްގައި ވިދާޅުވި ބަސް އަމާޒުކޮށްފައިވަނީ އެމްޑީޕީއަށެވެ. މިނިސްޓަރ ހަލީލް ވިދާޅުވީ އަނިޔާވެރިކަމުގެ ބިރުވެރި އަދި ނުރައްކާތެރި ބަސްތައް ބުނުމަކީ ޚިޔާލުފާޅުކުރުމާއި މިނިވަންކަމުގެ އިމުގެ ތެރޭގައި ކުރާކަމެއް ކަމަށް ދެކޭ ސިޔާސީ ޕާޓީއެއްގެ ސީރިއަސް މައްސަލަތަކެއް އުޅޭނެ ކަމަށެވެ.
" އަމުދުން ވެރިކަމަށް ފައިނަގާ ބަޔަކު މިކަން ދިފާޢުކުރާނަމަ، އެބައެއްގެ ވެރިކަމުގައި ރައްޔިތުން ވައްޓާލާނެ ބިރުވެރި ޙާލަތު ސިފަކުރެވޭނެ." ވަޒީރު ވިދާޅުވިއެވެ.
އެމްޑީޕީގެ އެކްޓިވިސްޓް ޝާފިއު މިއަދު ފުލުސް އޮފީހަށް ހާޒިރުކުރުމުން އޭނާ ދިން ބަޔާނުގައި ބުނެފައިވަނީ ޓްވީޓްގައި ނިސްބަތްކޮށްފައި ވަނީ ވަކި މީހަކަށް ނޫން ކަމަށެވެ. އަދި ހަޑިހުތުރު ބަސް ބޭނުންކޮށް އިންޒާރުވެސް ދީފައި ނުވާނެ ކަމަށެވެ. ކައްޒާބަކީ ވަކި މީހެއްކަމަށް ނިސްބަތްކުރީ ފުލުހުން ކަމަށް އޭނާ ދިން ކަމަށް ބުނެ ސޯޝަލް މީޑިޔާގައި ހިއްސާކުރި ބަޔާނުގައި ބުނެފައިވެއެވެ.
ނަމަވެސް ފުލުހުން އޭނާއަށް ކުރި ތުހުމަތުތަކުގެ ތެރޭގައި އަނިޔާއެއް ދީފާނެ ކަމުގެ ބިރު ދެއްކުމުގެ ކުށާއި, މީހަކު މަރުވެދާނެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމެއްގެ ބިރެއް ކުރިމަތި ކުރުމުގެ ކުށް އަދި ހަޑިހުތުރު އެއްޗެއް ހިމެނޭ ވަސީލަތެއް ޝާއުއުކުރުމާއި ޢާއްމުކޮށް ހުޅުވާލައިގެން ދެއްކުމާއި އެފަދަ އެއްޗެސް ފޯރުކޮށްދިނުމުގެ ކުށުގެ ތުހުމަތު ހިމެނެއެވެ.
ޝާފިއު ފުލުސް އޮފީހަށް ހާޒިރުވި ވަގުތު އެމްޑިޕީގެ ލީޑަރޝިޕްގެ ބައެއް ބޭފުޅުންނާއި, މެމްބަރުން އެސަރަހައްދަށް އެއްވެ އަޑު އުފުލިއެވެ.
ރިއެކްޝަންސް
