ސޯޝަލް މީޑިޔާގައި ކުރާ ޕޯސްޓަކަށް ފުލުހަށް ހާޒިރު ކުރުމަކީ ޑިމޮކްސަރީގައި ފަހަތަށް އަޅާ ފިޔަވަޅެއް- ޞާލިހު

ސޯޝަލް މީޑިޔާގައި ކުރާ ޕޯސްޓަކަށް ފުލުހަށް ހާޒިރު ކުރުމަކީ ހިޔާލުފާޅުކުރުމުގެ މިނިވަންކަމާއި ޑިމޮކްސަރީގައި ފަހަތަށް އަޅާ ފިޔަވަޅެއް ކަމަށް ކުރީގެ ރައީސް އިބްރާހީމް މުޙައްމަދު ޞާލިހު ވިދާޅުވެއްޖެއެވެ. މިފަދައިން ވިދާޅުވެ ކުރީގެ ރައީސް ޞާލިހު މިރޭ ޕޯސްޓެއް ކުރައްވާފައި މިވަނި އެމްޑީޕީގެ އެކްޓިވިސްޓް ހުސައިން ޝާފިއު (ތުއްތު) ކުރި ޓްވީޓެއްގައި ލިޔެފައިވާ ލިޔުމަކާ ގުޅިގެން މާދަމާ ފުލުހަށް ހާޒިރުވާން އަންގާފައު ވަނިކޮށެވެ. އަދި އެކަމާ ގުޅިގެން އެމްޑީޕީގެ ލީސަރޝިޕްގެ ބޭފުޅުންނާއި އެކްޓިވިސްޓުންގެ ފާޑުކިއުންވެސް ސަރުކާރަށާއި, ފުލުހުންގެ އިދާރާއަށް އަމާޒުވެފައި ވަނިކޮށެވެ.

ޞާލިހުގެ ތްވީޓްގައި ވަކި ކަމެއް ސީދާ ފާހަގަކުރައްވާފައި ނެތް ނަމަވެސް މިއީ ޝާފިއު ފުލުސް އޮފީހަށް ހާޒިރު ކުރާތީ ކުރެއްވި ޕޯސްޓެއްކަން ސާފް ވެއެވެ. މީގެއިތުރުން ޞާލިހު ވިދާޅުވީ ކައުންސިލްތަކަށް އިންޒާރުގެ ސިޓީ ފޮނުވުމަކީ ވެސް ދިވެހި ރައްޔިތުންގެ ބުރަ މަސައްކަތުން ހޯދި ހިޔާލުފާޅު ކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށެވެ. މިފަހުން ރައީސްއަށް ފާޑުކީ ގައްދޫ ކައުންސިލް ރައީސްގެ މައްސަލަ ބަލަން ލޯކަލް ގަވަރމަންޓް އޮތޯރިޓީން އަންގާފައި ވުމުން ބެލެވެނީ މިއީ އެކަމާ ގުޅިގެން ވިދާޅުވި ވާހަކައެއް ކަމަށެވެ. އޭނާގެ މައްސަލަ ބަލަން އެންގީ ރައީސުލްޖުމްހޫރިއްޔާ އަށާއި, ސަރުކާރުގެ އިސްބޭފުޅުންގެ އަބުރަށް އުނިކަން އަންނަފަދަ ގޮތަކަށް ވާހަކަ ދެއްކި ކަމަށް ބުނެއެވެ.

ކުރީގެ ރައީސް ވިދާޅުވީ ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައި އަދަބު ދިނުމުގެ ބިރުވެރި މާޒީ އަލުން އިއާދަކުރަން ސަރުކާރުން މަސައްކަތްކުރުމަކީ ކަންބޮޑުވާކަމެއް ކަމަށެވެ.