ޝާފިއު ފުލުހަށް ހާޒިރުކުރަނީ ޓްވީޓްކޮށްގެނެއް ނޫން- މިނިސްޓަރ އިހުސާން
މިސަރުކާރުން އެއްވެސްބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ
އެމްޑީޕީގެ އެކްޓިވިސްޓް ހުސައިން ޝާފިއު (ތުއްތު) ފުލުހަށް ހާޒިރު ކުރަނީ ޓްވީޓްކޮށްގެން ނޫން ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
މިމަހުގެ 8 ވަނަ ދުވަހު ޝާފިއުގެ ޓްވީޓަރ ހެންޑްލްއިން ކުރި ޓްވީޓަކާ ގުޅިގެން އޭނާ ފުލުހަށް ހާޒިރު ވުމަށް ފުލުހުން ފޮނުވި ޗިޓާ ގުޅިގެން އިދިކޮޅު ފަރާތްތަކުން ފާޑިކިޔަމުން ދަނިކޮށް, ވަޒީރު އިހުސާން އެކަމާ ގުޅޭގޮތުން ވާހަކަދެއްކެވީ އެމްޑީޕީގެ ޗެއަރޕަސަން ފައްޔާޒް އިސްމާއީލް ކުރެއްވި ޕޯސްޓަކަށް ރައްދު ދެއްވަމުންނެވެ.
ޝާފިއު ފުލުހަށް ހާޒިރުކުރާތީ ފައްޔާޒު ކުރެއްވި ޕޯސްޓެއްގައި ވިދާޅުވީ ޓްވީޓު ކުރާތީ ފުލުސް އޮފީހަށް ހާޒިރުވާން ޝާފިއު (ތުއްތު) އަށް އަންގައިފި ކަމަށާއި, ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށެވެ. ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށް ފައްޔާޒު ވިދާޅުވިއެވެ. ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަމަށާއި, ހިޔާލާއި ފިކުރުގައި ތަޅެއް ނޭޅުވޭނެ ކަމަށް މިދިޔަ ސަރުކާތުގެ އިކޮނޮމިކް މިނިސްޓަރ ވިދާޅުވިއެވެ. ޝާފިއު ފުލުހަސް ހާޒިރުވާން ފޮނުވި ޗިޓްގެ ފޮޜޯއަކާއެކު ފައްޔާޒު ވިދާޅުވީ މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ ކަމަށެވެ.
އެޓްވީޓަށް ރައްދުދެއްވަމުން މިނިސްޓަރ އިހުސާން ވިދާޅުވީ މި ޕޯސްޓުގައި (ޝާފިއު ކުރި ޓްވީޓް) ލިޔެފައި އޮތް “މަށަށް ކަލޭ މަގެއްމަތިން ނުފެއްނާތި!” މި ޖުމްލައިން ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް އޮތުމުން އެކަމުގެ ތަފްސީލު ހޯދާ މއެކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއް ކަމަށެވެ.
" މާދަމާ މީހަކު މިފަދަ އިބާރާތެއް މަނިކުފާނަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ޙިޔާލުފާޅުކުރީކަމަށް ބަލާ އަޅާނުލާ ތިބެންވީތޯ؟ އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ހިޔާލު އިތުރަށް ސާފުކޮށްދިނީކަމަށް ބަލާ އަޅާނުލާ ތިބެންވީތޯ؟ މިއީތޯ މަނިކުފާނުގެ ޒަޢާމަތެއްގައި މިގައުމުގައި ކަންކަން އޮންނާނެގޮތަކީ؟ " މިނިސްޓަރ އިހުސާން ފައްޔާޒާ ސުވާލުކުރެއްވިއެވެ.
މިނިސްޓަރ އިހުސާން ވިދާޅުވީ ޔަގީނުންވެސް މިސަރުކާރުގަ އެއްވެސްބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ ކަމަށެވެ. ހަމައެއާއެކު ރާއްޖޭގެ ޤާނޫނުތަކާއި ޤަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފައި ކަމަށް ވިދާޅުވިއެވެ. ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޢައިރު ޒިންމާދާރު ކަމެއް ކަމަށްވެސް ވަޒީރު ވިދާޅުވިއެވެ.
ޝާފިއު ފުލުހަށް ހާޒިރުވުމަށް އަންގާފައިވަނީ މާދަމާ މެންދުރު 1:30 އަށެވެ. ޗިޓްގައިވާ ގޮތުން ފުލުހަށް ހާޒިރު ކުރަނި ކުށުގެ ތުހުމަތުގައެވެ.
ރިއެކްޝަންސް
