ރައީސުލްޖުމްހޫރިއްޔާއާ ގުޅޭ ގޮތުން ދޮގު ޚަބަރު ފެތުރުމަށްފަހު މާފަށް މައާފަށް އެދިއްޖެ
އަދަދު ނޫހުން ބުނީ ދޮގު ހެދުނީ މައުލޫމާތުގެ ކުށަކުން ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅޭ ގޮތުން ދޮގު ޚަބަރެއް ފެތުރުމަށްފަހު އަދަދު ނޫހުން މައާފަށް އެދިއްޖެއެވެ.
އދ. އާންމު މަޖިލީހުގެ 79 ވަނަ ސެޝަންގައި ބައިވެރިވެޑައިގަތުމަށް ރައީސުލްޖުމްހޫރިއްޔާ އެމެރިކާއަށް ކުރެއްވި ރަސްމީ ދަތުރުފުޅު ކުރެއްވީ ފަސްޓް ކްލާހުގައި ކަމަށް ބުނެ އަދަދު ނޫހުން ވަނީ ޚަބަރު ފަތުރާފައެވެ. އެހެން ނަމަވެސް އެނޫހުން ވަނީ ފަހުން އެއީ މައުލޫމާތުގެ ކުށެއް ކަމަށް ބުނެ އެ ޚަބަރު ނޫހުން ނަގައި އެކަމަށް މާފަށް އެދިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާ ގުޅޭ ގޮތުން ވަރަށް ފާޑު ކިޔަމުން އަންނަ އަދަދު ނޫހުން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ ދޮގު ޚަބަރެއް ފެތުރުނީ މައުލޫމާތުގެ ކުށަކުން ކަމަށެވެ.
ރައީސުލްޖުމްހޫރިއްޔާ އދ ގެ އާންމު މަޖިލީހުގެ 79 ސެޝަންގައި ބައިވެރިވެވަޑައިގަތުމަށް ދަތުރު ކުރެއްވީ ބިޒްނަސް ކްލާހުގައި މިދިޔަ ސެޕްޓެމްބަރު މަހުގެ 20 އިން 29 އަށެވެ.
މި ދަތުރުފުޅުގައި ރައީސުލްޖުމްހޫރިއްޔާ ވަނީ އދ ގެ އާންމު މަޖިލީހުގައި ތަގްރީރު ކުރައްވާފައެވެ.
ރައީސުލްޖުމްހޫރިއްޔާގެ މިދަތުރުފުޅުގައިވަނީ އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެ ވަޑައިގެންނެވި އެކި ވަފުދުތަކުގެ އިސްވެރިންނާ ބައްދަލު ކުރައްވާ، ދޭދޭ މަޝްވަރާތައްވެސް ކުރިއަށް ގެންދަވާފައެވެ. އަދި ނިއުޔޯކްގައި ދިރިއުޅެމުންދާ ދިވެހިންނާވެސް އެމަނިކުފާނު ވަނީ ބައްދަލު ކުރައްވާފައެވެ.
މީގެ އިތުރުން ރައީސުލްޖުމްހޫރިއްޔާ ވަނީ ޕްރިންސްޓަން ޔުނިވަރސިޓީގެ ޕްރިންސްޓަން ސްކޫލް އޮފް ޕަބްލިކް އެންޑް އިންޓަރނޭޝަނަލް އެފެއަރޒްގައި ތަޤުރީރު ކުރައްވާފައެވެ. އަދި އެމަނިކުފާނު ވަނީ، ނިއުޔޯކްގައި ހުންނަ ގޫގްލްގެ އޮފީހަށްވެސް ޒިޔާރަތް ކުރައްވާފައެވެ.
ރިއެކްޝަންސް
