އެލައިޑް އާއި ސޮލަރެލްއިން ކޭޝްލަސް ހެލްތު އިންޝޫރެންސްގެ ޚިދުމަތް މެދުކަނޑާލައިފި
ދިވެހިރާއްޖޭގައި ހެލްތް އިންޝުއަރެންސްގެ ޚިދުމަތް ދިނުމުގައި އެންމެ ގިނަ ދުވަސްވީ އެލައިޑް އިން ކޭޝްލަސް ހެލްތު އިންޝޫރެންސްގެ ޚިދުމަތް މަދުކަނޑާލައިފިއެވެ. އާސަންދަ ޚިދުމަތް ދިނުމުގައި އަމިއްލަ އިންޝޫރެންސް އޮންނަ މީހުންނަށް އެ އިންޝޫރެންސަށް އިސްކަން ދިނުމަށް ސަރުކާރުން ނިންމާފައިވާ މި ދަނޑިވަޅުގައި އެލައިޑް އަދި ސޮލަރެލް އިންވެސް ވަނީ އެކުންފުނިންދޭ ކޭޝްލަސް ޚިދްމަތް ހުއްޓާލިކަން ކަސްޓަމަރުން އަދި ސިއްޙީ ޚިދުމަތް ދޭ ފަރާތްތަކަށް އަންގާފައެވެ.
އެލައިޑް އާއި ސޮލަރެލްގެ މި ނިންމުމާ ގުޅިގެން, މީގެ ފަހުން ކަސްޓަމަރުން ޖެހޭނީ އަމިއްލައަށް ޑޮކްޓަރަށް ދެއްކުމަށްފަހު, އެފައިސާ އަނބުރާ ހޯދުމަށް ޚިދްމަތް ލިބިގަންނަ އިންޝޫރެންސް ކުންފުނީގައި އެދޭށެވެ. އެލައިޑް އަދި ސޮލަރެލް އިންދޭ ކޭޝްލަސް ޚިދުމަތް ހުއްޓާލުމާ ގުޅިގެން ދިގުމުއްދަތަށް ސިއްހީ ފަރުވާ ހޯދާ ފަރާތްތަކަށް އަމިއްލަ ޖީބުން ބޮޑެތި ޚަރަދުތަކެއް ކުރަންޖެހޭނެއެވެ. އެކަމުގެ ކަންބޮޑުވުންތައް އެ ދެ ކުންފުނީގެ ޚިދުމަތް ހޯދާ ކަސްޓަމަރުން އަންނަނީ ފާޅުކުރަމުންނެވެ. ސަބަބަކީ ދިގުމުއްދަތަށް ބޭސްކުރާ, އަދި ބޮޑެތި ބަލިތަކުގެ މީހުން އެއްފަހަރާ ބޮޑު އަދަދެއް ޖީބުން ޚަރަދު ކުރަންޖެހި, އެފައިސާ އަނބުރާ ލިބެނީ ޚިދްމަތް ހޯދުމަށްފަހު ރިސީޓްތަކާއި އެކު ފުރިހަމަކުރަންޖެހޭ ލިޔެކިޔުންތައް އިންޝޫރެންސް ކުންފުންޏަށް ހުށަހަޅައިގެން ކަމުގައި ވާތީއެވެ.
އާސަންދައިން މިހާރު އަމަލުކުރަމުންދާގޮތުން އަމިއްލަ އިންޝޫރެންސް އެއް އޮތްނަމަ, އެމީހަކަށް އާސަންދައިގެ ޚިދުމަތް ލިބޭނީ އަމިއްލަ އިންޝޫރެންސްގެ ލިމިޓް ހަމަވުމުންނެވެ. ނަމަވެސް އާސަންދައިން އެގޮތަށް ނިންމާފައިވަނީ ހަމައެކަނި އެނދުމަތިނުކޮށްދެވޭ ފަރުވާތަކަށެވެ. އެނދުމަތިކޮށްގެން ފަރުވާދޭނަމަ ކުރިއެކޭވެސް އެއްގޮތަށް އާސަންދަ ލިބޭނެކަމަށް އެކުންފުނިން ވަނީ ބުނެފައެވެ. ފްރައިވެޓް އިންޝޫރެންސްގެ ތެރޭގައި މޯލްޑިވްސް ޕޮލިސް ސަރވިސް އަދި މޯލްޑިވްސް ޑިފެންސް ފޯސްއިން ހިންގާ ސްކީމްތައް ނުހިމެނޭކަމަށްވެސް އާސަންދައިން ބުންޏެވެ.
ރިއެކްޝަންސް
