ބުޅާ ތަކަށް 'އޮޅުހިޔާ' ހުޅުވައިފި
އޮޅުހިޔާ ހުޅުއްވައިދެއްވީ ރައީސުލްޖުމްހޫރިއްޔާ
މާލޭގެ މަގުތަކުގައި އުޅޭ ބުޅާތަކަށް ރައްކާތެރި ތަނެއްގެ ގޮތުގައި ބުޅާތައް ގެންގުޅެން 'އޮޅުހިޔާ' ހުޅުވައިފި އެވެ. ކެތް ޝެލްޓަރގެ ގޮތުގައި ހުޅުމާލެ ގައި ތަރައްޤީކުރި ތަން މިއަދު ހުޅުވީ 'އޮޅުހިޔާ' ގެ ނަމުގައެވެ.
މިއީ މަގުމަތީގައި އުޅޭ އަދި މަގުތަކަށް ދޫކޮށްލާފައިވާ ބުޅާ ތަކަށް ރައްކާތެރި, ދުޅަހެޔޮ އަދި ލޯތްބާއެކު އަޅާލާ މާހައުލެއް ފޯރުކޮށްދޭން މަސައްކަތްކުރާ ތަނެއް ކަމަށް މާލެ ސިޓީ ކައުންސިލުން ބުންޏެވެ. މީގެއިތުރުން ޒިންމާދާރު ގޮތުގައި ބުޅާ ގެންގުޅުން ކުރިއެރުވުމާއި މުޖުތަމައުގައި ބޭނުންނުވާ ބުޅާތަކުގެ އަދަދު މަދުކުރުމަށްވެސް މަސައްކަތް ކުރާނެ ކަމަށް ސިޓީކައުންސިލުން މިއަދު ބުންޏެވެ.
އޮޅުހިޔަލުން ބުޅާތަކަށް ވަގުތީ ހިޔާވަހިކަމާއި, ބޭހާއި, ބޭސްފަރުވާގެ ޚިދުމަތް ދެއެވެ. މިއީ ބުޅަލަށް ޚާއްޞަކޮށް ހުޅުމާލޭގައި ގާއިމްކުރި ފެސިލިޓީއެކެވެ. އޮޅުހިޔާ ތައްޔާރުކޮށްފައި ވަނީ އެތަނަށް ޒިޔާރަތް ކުރެވޭ ގޮތަށެވެ.
ޒަމާނީ ފެންވަރަށް ތަރައްޤީކޮށްފައިވާ އޮޅުހިޔާ ހުޅުއްވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެވެ. މިއީ އެމަނިކުފާނުގެ ރިޔާސީ ވައުދެއްވެސް މެއެވެ. މިއީ އެމަނިކުފާނުގެ ހަފްތާ 14ގެ ވައުދުގެ ތެރޭގައިވެސް ހިމަނުއްވާފައިވާ ވައުދެކެވެ. އަދި މާލެ ސިޓީ ކައުންސިލްގެ މޭޔަރަކަށް ހުންނެވިއިރުވެސް އެމަނިކުފާނު ކުރައްވަން ބެނުންފުޅުވި ކަމެވެ. މިހާރުގެ މޭޔަރު އާދަމް އާޒިމްވެސް މޭޔަރުކަމަށް އިންތިޚަބުވީ ކެޓް ޝެލްޓަރ އެޅުމުގެ ވައުދާ އެކުއެވެ. އެކަމަށް ސަރުކާރުން ފުރިހަމަ އެއްބާރުލުން ދެއްވުމާއެކު ސިޓީކައުންސިލުން އެތަން ނިންމީ އަވަސް މުއްދަތެއްގެ ތެރޭގައެވެ.
އޮޅުހިޔާ ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވިދާޅުވީ މި މަޝްރޫޢުއަކީ އެމަނިކުފާނު މާލޭ ސިޓީގެ މޭޔަރުކަމުގައި ހުންނެވި ދުވަސްވަރުން ފެށިގެން ހިންގެވުމަށް މަސައްކަތްޕުޅު ކުރެއްވި މަޝްރޫޢެއް ކަމަށެވެ. އެހެންނަމަވެސް އޭރުގެ ސަރުކާރުން އެއްބާރުލުން ނުދެއްވުމުން އެމަޝްރޫޢު ކުރިއަށް ނުގެންދެވުނީކަމަށް ވިދާޅުވިއެވެ.
ރައީސުލްޖުމްހޫރިއްޔާ ވަނީ އޮޅު ހިޔާ މަޝްރޫޢު ހަޤީޤަތަކަށް ހެދުމަށް މި ސަރުކާރުން ކުރެއްވި މަސައްކަތްޕުޅުތަކުގެ މައްޗަށް އަލިއަޅުއްވާލައްވާފައެވެ. އެގޮތުން މި މަސައްކަތަށް ޚާއްޞަ ސަމާލުކަމެއް ދެއްވުމަށާއި ރާއްޖޭގައި މިފަދަ ދިރޭތަކެތި ރައްކާތެރިގޮތެއްގައި ބެލެހެއްޓުމަށް ރާއްޖޭގައި ފުރަތަމަ ފަހަރަށް މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ނަމުގައި މިނިސްޓްރީއެއް ޤާއިމުކުރެއްވުން އެމަނިކުފާނު ފާހަގަކުރެއްވިއެވެ. އަދި މި ފެސިލިޓީ ޤާއިމުކުރުމަށް ބިން ހަމަޖައްސަވައި ހުރިހާ ވަޞީލަތްތަކެއް މަގުފަހިކޮށްދެއްވައި މި މަޝްރޫޢު ކުރިއަށްގެންދިއުމަށް މާލެ ސިޓީ ކައުންސިލާ ހަވާލުކުރެއްވި ކަމަށް ވިދާޅުވިއެވެ.
މި ސަރުކާރުން ލާމަރުކަޒީ ނިޒާމުގެ ތެރެއިން ކަންތައްތައް ކުރެއްވުމަށް އިސްކަންދެއްވާކަން ފާހަގަކުރައްވާ ވިދާޅުވީ ކައުންސިލްތަކާ ބައްދަލުކުރައްވައި އެކައުންސިލްތަކުން ބޭނުންވާ ކަންކަން ފަހިކޮށްދެއްވުމަށް މަސައްކަތްކުރައްވާނެކަމަށެވެ.
" ލާމަރުކަޒީ ނިޒާމުގެ ތެރެއިން ރައްޔިތުންނާ ގާތުން މަސައްކަތް ކުރުމުގައި އެންމެ ބޮޑަށް އެންމެ އިސްކަމެއް ދީގެން އަޅުގަނޑުމެން މަސައްކަތްކުރަމުންދާކަން އެއީ ފެންނަން އޮތް ހަޤީޤަތް،" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ރައްޔިތުންނާ ގުޅިގެން ރައްޔިތުން ބޭނުންވާކަންކަން ފަހިކޮށްދެއްވުމަށް މި ސަރުކާރުން ފުރިހަމައަށް މަސައްކަތްކުރައްވާނެ ކަމަށެވެ.
ރިއެކްޝަންސް
