ނިސްތެލްރޫއީ ލެސްޓަރ ސިޓީގެ ކޯޗުކަމާ ހަވާލުވެއްޖެ
މެންޗެސްޓަރ ޔުނައިޓެޑްގެ ކުރީގެ ފޯވާޑް ރުޑް ވެން ނިސްތެލްރޫއީ އިނގިރޭސި ޕްރިމިއަރ ލިގުގެ ލެސްޓަރ ސިޓީގެ ކޯޗުކަމާ ހަވާލުވެއްޖެ އެވެ.
ނެދަލެންޑްސްގެ ކުރީގެ ފޯވާޑް ލެސްޓަރ ސިޓީއާ ހަވާލުވީ މެންޗެސްޓަރ ޔުނައިޓެޑް ދޫކޮށްލިތާ ހަފްތާއެއްވެސް ނުވަނީހެވެ. އެރިކް ޓެން ހާގްގެ އެސްޓެންޓަކަށް ޔުނައިޓެޑްގެ ކޯޗިންގ ޓީމާ ގުޅި, ޓެން ހާގު ވަކިކުރުމުން ހަތަރު މެޗުގައި ވަގުތީ ކޯޗުގެ ޒިންމާ އުފުލުމަށްފަހު ނިސްތެލްރޫއީ ޔުނައިޓެޑާ ވަކިވީ އާ ކޯޗު އަމޯރިމް ހަވާލުވުމުންނެވެ. ޔުނައިޓެޑްގެ ކޯޗު ކަމާ ޕޯޗްގަލްގެ އަމޯރިމް ހަވާލުވީ އޭނާގެ ކޯޗިންގ ޓީމާ އެކުއެވެ.
ޓެން ހާގުއާއެކު ޔުނައިޓެޑްގެ ނަތީޖާތައް ދަށްވިޔަސް ވަގުތީ ކޯޗުގެ ގޮތުގައި ނިސްތެލްރޫއީގެ އިރުޝާދުގެ ދަށުން ޔުނައިޓެޑް ބައްޔެއް ނުވެއެވެ. އެހަތަރު މެޗުގެ ތެރެއިން ދެ މެޗުގައި މޮޅުވީ ލެސްޓަރ ސިޓީ އަތުންނެވެ.
48 އަހަރުގެ ނިސްތެލްރޫއީ ލެސްޓަރ ސިޓީއާއެކު ހެދި އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ނިޔަލަށެވެ. އެޓީމްގެ ކޯޗުގެ މަގާމް ހުސްވީ އިނގިރޭސި ކޯޗު ސްޓީވް ކޫޕަރ ވަކިކުރުމުންނެވެ. އެއީ ނަތީޖާތަށް ގޯސްވުމުންނެވެ. ނިސްތެލްރޫއީ ހަވާލުވިއިރު ލެސްޓަރ ސިޓީ އޮތީ ރެލިގޭޝަނަށްވުރެ އެންމެ ދަރަޖައެއް މަތީޖައެވެ.
ޕްރިމިއަރ ލީގުގައި މިރޭ ބްރެންޓްފޯޑާ ދެކޮޅަށް ކުޅޭ މެޗުގައި ލެސްޓަރ ސިޓީއަށް އިރުޝާދުދޭނީ ވަގުތީ ކޯޗު ބެން ޑޯސަން އެވެ. އެކަމަކު މެޗު ބަލަން އާ ކޯޗު ނިސްތެލްރޫއީ ސްޓޭޑިއަމްއަށް ދާނެއެވެ. އޭނާ ޓީމަށް އިރުޝާދުދޭ ފުރަތަމަ މެޗަކަށް ވާނީ އަންގާރަ ދުވަހު ވެސްޓް ހޭމްއާ ދެކޮޅަށް ކުޅޭ މެޗެވެ.
ރިއެކްޝަންސް
