ޤާނޫނު އަސާސީގެ ދިފާއުގައި އެމްޑީޕީން އަނެއްކާވެސް ނިކުންނަނީ
ޤާނޫނު އަސާސީގެ ދިފާއުގައި އެމްޑީޕީން އަނެއްކާވެސް އެއްވުމަކަށް ތައްޔާރުވާން ފަށައިފިއެވެ. އެއްވުން ބާއްވަން އެޕާޓީން ކަނޑައަޅާފައިވަނީ މިފެށޭ ޑިސެމްބަރު މަހުގެ 10 ވަނަ ދުވަހުގެ ރެއެވެ.
އެއްވުން އިދިކޮޅު ޕާޓީން ބާއްވަނީ 'ޤާނޫނު އަސާސީގެ ދިފާއުގައި ދިވެހިން' ޝިޢާރުގެ ދަށުންނެވެ. އެމްޑީޕީން ބުނީ އެއްވުން އޮންނާނީ ކާނިވާ ސަރަހައްދުގައި ކަމަށެވެ. އެހަރަކާތަށް ތައްޔާރުވުމުގެ ކަންކަން ފައްޓަވައިދެއްވީ ކުރީގެ ރައީސް އިބްރާހީމް މުޙައްމަދު ޞާލިހުއެވެ. އެމްޑީޕީ ހަރުގޭގައި އެ އެއްވުމަށް ތައްޔާރުވުމުގެ ކަންކަން ދަނީ ކުރަމުންނެވެ.
އެމްޑީޕީން ބުނީ ޤާނޫނު އަސާސީގެ ދިފާއުގައި ނިކުންނަނީ މިސަރުކާރުން ޤާނޫނު އަސާސީއަށް އަމަލު ނުކޮށް, ޤާނޫނު އަސާސީ އަށް ބަދަލުރައް ގެންނަމުން ދާތީ ކަމަށެވެ. ރައްޔިތުންގެ މަޖިލިހުގެ ސުޕަރ މެޖޯރިޓީ އޮތް ސަރުކާރު ހިންގާ ޕާޓީ ޕީއެންސީން ވަނީ މިދިޔަ ހަފްތާގައި އެއް ދުވަހުގެ ތެރޭގައި ޤާނޫނު އަސާސީއަށް އިސްލާހު ހުށަހަޅާ, ކޮމިޓީ މަރުހަލާ ނިންމާ ތަޅުމުން ފާސްކޮށްފައެވެ. އަދި ހަމަ އެދުވަހު ރައީސުލްޖުމްހޫރިއްޔާ އިއިސްލާހު ތަސްދީޤު ކުރައްވާ ޤާނޫނު އަސާސީއަށް ބަދަލު ގެންނެވިއެވެ. އެއީ ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފިނަމަ ރައްޔިތުންގެ މަޖިލިހުގެ މެމްބަރު ކަމުގެ ގޮނޑި ގެއްލޭ ގޮތަށް ގެނައި އިސްލާހެކެވެ. އެމައްސަލަ ކުރީގެ މެމްބަރު އަލީ ހުސައިން ސްޕްރީމް ކޯޓަށް ހުށަހެޅުމުން, އެމްޑީޕީއާއި ދ ޑިމޮކްރެޓްސް އިން ވަނީ އެމައްސަލައަށް ތަދަޚުލުވެސް ވެފައެވެ.
އެމްޑީޕީން އެއްވުން ބާއްވާ ދުވަހަކީ ރާއްޖޭގެ މަސްވެރިންގެ ދުވަސްވެސް މެއެވެ. އެއްވުން ބާއްވަނީ މަސްވެރިންގެ ދުވަސް ފާހަގަކުރުމާވެސް އެކުއެވެ. އެމްޑީޕީން ބުނަނީ މަސްވެރިންނަށް ވީ ވައުދުތަކާވެސް މިސަރުކާރުން ހިލާފްވެ, އޮޅުވާލާފައިވާ ކަމަށެވެ.
ނަމަވެސް ޕީއެންސީން ބުނީ އެމްޑީޕީން މަގުމައްޗަށް ނިކުންނަނީ ހަމަނުޖެހުން ހިންގާ ގައުމުގެ މަސްލަހަތު ނަގާލަން ކަމަށެވެ. ޕީއެންސީގެ ނައިބުރައީސް ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވީ އެމްޑީޕީން އުޅެނީ ޤާނޫނު އަސާސީއޭ ކިޔައިގެން ޤައުމު ހަލަބޮލި ކުރަން ކަމަށެވެ. ކުރިން އުޅުނު ގޮތައް އަލިފާން ބޯޅަ އުކައި،މިރުސް ފެން ފުލުހުންގެ މޫނަށް ޖަހައި،ދައުލަތުގެ އިމާރާތްތަކުގަ ހުޅުޖެހި ޒަމާން އިޔާދަ ކުރަން އުޅުނަސް އެކަން ދެން ނުވާނެ ކަމަށް ވިދާޅުވިއެވެ.
" ޤާނޫނު އަސާސީ އާއި ހިލާފު ކަމެއް ކޮށްފި ނަމަ ދާނީ ކޯޓަށް. މަގުމަތީގަ ތިބޭފުޅުން ކޯޓު ހަދައިގެން އުޅުނު ޒަމާން މާޒީވެއްޖެ. ޤައުމަށް ބިލިއަން ޑޮލަރުގެ މަޝްރޫޢުތައް އަންނަން ފެށިވަގުތު މަގުމަތި ހަލަބޮލިކޮށް އެފުރުޞަތުން ދިވެހީން މަހުރޫމު ކުރިގޮތައް ދެން އެކަމެއް ނުވާނެ." ޝުޖާއު ކުރެއްވި ޕޯސްޓްގައި ވިދާޅުވިއެވެ.
ރިއެކްޝަންސް
