އެންސްޕާ ހިންގާ އިމާރާތެއް ހޯދުމާ ގުޅޭ ތުހުމަތުތައް އެ އެޖެންސީން ދޮގުކޮށްފި
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގުމަށް އިމާރާތެއް ކުއްޔަށް ހިފުމުގައި ކޮރަޕްޝަން އެކުލެވޭ ކަމަށް ބުނެ އިއްޔެ ކުރަމުންދިޔަ ތުހުމަތުތައް ދޮގުކޮށްފިއެވެ. ތުހުމަތުތައް ދޮގުކޮށް އެޖެންސީން ޢާއްމުކުރި ބަޔާނެއްގައި ބުނީ އެ އެޖެންސީ ހިންގަން އިމާރާތެއް ހޯދުމުގެ މުއާމަލާތަކީ ކަނޑައެޅިފައިވާ ޤަވާއިދާ އުޞޫލުގެ ތެރެއިން މާލީ ޒުވާރާއާއި އެ އެޖެންސީއާ ދެމެދު ކުރެވިފައިވާ މުއާމަލާތެއް ކަމަށެވެ. އެއީ އެއެޖެންސީއާ އެހެން އެއްވެސް ފަރާތަކާ ދެމެދު ކޮށްފައިވާ މުއާމަލާތެއް ނޫންކަމަށް ބަޔާނުގައި ބުނެފައިވެއެވެ.
" އެއީ ޢާއްމު މައުލޫމާތުގެ ގޮތުގައި ހާމަކަން ބޮޑުގޮތެއްގައި މާލީ ވުޒާރާގެ މަންސަތަކުގައި ފެންނަންހުރި މަޢުލޫމާތުތަކެކެވެ" ބަޔާނުގައި ވެއެވެ.
އެންސްޕާއިން ގިނަ އަދަދެއްގެ މުވައްޒަފުން ނަގަން އިއުލާނުކޮށްފައިވަނީ އެމުވައްޒަފުން ބޭނުންކޮށްގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް ނިސްބަތްވެވަޑައިގަންނަވާ ޓީވީ ޗެނަލްއެއްގައި މަސައްކަތް ކުރުމަށް ކަމަށް ކުރާ ތުހުމަތު ތަކަށްވެސް ބަޔާނުގައި ޖަވާބު ދީފައިވެއެވެ. ބަޔާނުގައި ބުނެފައިވަނީ މުވައްޒަފުން ހޯދުމާއި މުވައްޒަފުންގެ ޒިންމާ ހަވާލުކުރުމަކީ އެކަމަށް ކަނޑައެޅިފައިވާ އުޞޫލުގެ ތެރެއިން ކުރަމުންދާ ކަމެއް ކަމަށެވެ.
ރައްޔިތުންގެ އިޖުތިމާއީ ރައްކާތެރިކަމާ ގުޅުންހުރި އެމުއަސްސަސާއާ ގުޅޭގޮތުންނާއި, އެމުއައްސަސާގެ މުވައްޒަފުންގެ ނަޒާހަތްތެރިކަމާމެދު ރައްޔިތުންގެ މެދުގައި ކަންބޮޑުވުމާއި ޝައްކު އުފެދޭގޮތަށް މައުލޫމާތު ފަތުރަމުންދާ ދިއުން ކުށްވެރިކޮށް, އެފަދަ ފަރާތްތަކާމެދު ފިޔަވަޅު އެޅުމަށް ކަމާބެހޭ މުއައްސަސާތަކަށް ހުށަހަޅުއްވާނެ ކަމަށްވެސް ބަޔާނުގައި ބުނެފައި ވެއެވެ.
އެންސްޕާއިން މިފަދަ ބަޔާނެއް ނެރެފައި މިވަނީ އެއެޖެންސީ ހިންގަން ދެފަންގިފިލާގެ އިމާރާތެއް ކުއްށަށް ނެގީ މާރޗް މަހު ރަޖިސްޓްރީ ކުރި މޯލްޑިވްސް މީޑިޔާ ހައެސްއާ މެދު ވީއެއްބަސްވުމެއްގެ ދަށުން އެކުންފުނިން ކަމަށް ތުހުމަތު ކުރަމުން ދަނިކޮށެވެ. އެފަދަ ލިޔުމަކާއެކު ތުހުމަތު ކޮށްފައިވަނީ މީޑިޔާ ހައުސްއިން ކުއްޔަށް ނެގި ހަތަރު ފަންގި ފިލާގެ ތެރެއިން ދެ ފަންގިފިލާ އެންސްޕާއަށް ވަރަށް ބޮޑު އަގުގައި ކުއްޔަށްދީ, އަނެއް ދެ ފަންގިފިލާގައި އެކުންފުނީގެ ޓީވީ ސްޓޭޝަން ހިންގާ ކަމަށެވެ. އަދި ހަތަރު ފަންގިފިލާގެ ކުލި އެންސްޕާއިން މީޑިޔާ ހައުސްއިން ކުއްޔަށް ނެގި ދެ ފަންގިފިލާއިން ލިބޭ ފައިސާއިން ދައްކާ ކަމަށެވެ.
އެންސްޕާއިން ވަނީ އެ އެޖެންސީއަށް ކުރާ ތުހުމަތުތައް ތަހުގީގުކޮށްދިނުމަށް އޭސީސީގައި އެދިފައެވެ. އެސިޓީވެސް އެންސްޕާއިން ވަނީ ޢާއްމުކޮށްފައެވެ.
ރިއެކްޝަންސް
