މަޖިލިހުގެ މިއަހަރުގެ ތިންވަނަ ދައުރު ނިމޭނީ އަންނަ މަހުގެ 15 ވަނަ ދުވަހު
ރައްޔިތުންގެ މަޖިލިހުގެ މިއަހަރުގެ ތިންވަނަ ދައުރު ދަންމާލަން ފާސްކޮށްފިއެވެ. މިމަހުގެ ނިޔަލަށް ނިމެން އޮތް ތިންވަނަ ދައުރު ދަންމާލީ މުހިއްމު މަސައްކަތްތަކެއް ނުނިމި ހުރުމުންނެވެ.
މަޖިލިހުގެ މިއަހަރުގެ ތިންވަނަ ދައުރު ދަންމާލަން ހުށަހެޅުއްވީ ރިޔާސަތުން މަޖިލިހުގެ ރައީސް އަބްދުއްރަހީމް އަބްދުالله އެވެ. އެހުށަހެޅުން ފާސްވީ 68 މެމްބަރުންގެ ވޯޓުންނެވެ. ދައުރު ދަންމާލަން ނުފެންނަ ކަމަށް ވޯޓް ދެއްވީ 11 މެމްބަރުންނެވެ.
ކޮންމެ އަހަރެއްގައިވެސް ރައްޔިތުންގެ މަޖިލިސް ބެހިގެންވަނީ ތިން ދައުރަކަށެވެ. ފުރަތަމަ ދައުރަކީ ޖެނުއަރީން މެއި 15 ގެ ނިޔަލަށެވެ. ދެވަނަ ދައުރަކީ ޖޫން އިން އޮގަސްޓް 15 އަށެވެ. ތިންވަނަ ދައުރު ހިނގާނީ އޮކްޓޯބަރުން ނޮވެމްބަރުގެ ނިޔަލަށެވެ. ކޮންމެ ދައުރަކަށްފަހު މަޖިލިހުގެ މެމްބަރުންނަށް ޗުއްޓީއެއް ލިބެއެވެ.
މިއަދު މަޖިލިހުގެ ދައުރު ދަންމާލަން ފާސްކުރުމުގެ އިތުރުން, އާބަން ސަރަހައްދުތައް ކަނޑައަޅާ ބިލްވެސް ވަނީ ފާސްކޮށްފައެވެ. މިއީ ރާއްޖޭގެ އެކި ސަރަހައްދުތަކުގައި އާބަން ސެންޓަރުތަކެއް ތަރައްޤީ ކުރަން ހިމަނާފައިވާ ބިލެކެވެ. އެބިލް ފާސްކުރީ އެބިލުން ލޯކަލް ކައުންސިލްތަކުގެ ބާރު ވަރަށްބޮޑަށް ހަނިވެގެންދާނެ ކަމުގެ ކަންބޮޑުވުން އިދިކޮޅު މެމްބަރުންނާއި ކައުންސިލްތަކުންވެސް ކުރަމުން ދަނިކޮށެވެ. މިބިލްގައިވާ ގޮތުން އާބަން އޮތޯރިޓީއެއް އުފައްދަން ޖެހޭނެއެވެ. އެއޮތޯރިޓީއަށް ބޮޑަތި ބާރުތަކެއް ލިބިދެއެވެ.
ބިލް ފާސްކުރިއިރު ސަރުކާރުން ވަނީ އާބަން ސެންޓަރުތަކުގެ ގޮތުގައި ތަރައްޤީކުރާނެ ރަށްތައް ކަނޑައަޅާ އިއުލާނުވެސް ކޮށްފައެވެ. އެރަށްތަކަކީ ރ.އުނގޫފާރު, ޅަ.ނައިފަރު, ބ.އޭދަފުށި, ފ.ނިލަންދޫ, އދ.މަހިބަދޫ, ދ.ކުޑަހުވަދޫ އަދި ލ.ފޮނަދޫ އެވެ.
ރިއެކްޝަންސް
