އަހަރަކަށްފަހު އިޒްރާއިލް-ހިޒްބުالله ގެ ހަމަލާތައް ހުއްޓާލުމަށް އެއްބަސްވެއްޖެ
ލުބުނާނުގެ ހިޒްބުالله އާއި އިޒްރާއިލް އާ ދެމެދު ކުރިއަށްދާ ހަމަލާތައް ހުއްޓާލުމަށް ދެފަރާތުން އެއްބަސްވެއްޖެއެވެ. ދެ ގައުމުގެ ބޯޑަރު ހުރަސްކޮށް ދޭންފެށި ހަމަލާތަކަށް 14 މަސްދުވަސް ފަހުން ދާއިމީކޮށް ހަމާލާތައް ހުއްޓާލާގޮތަށް ފަރުމާކޮށްފައިވާ އެއްބަސްވުން ޤާއިމްކުރެވިފައިވާކަމަށް އެމެރިކާގެ ރައީސް, ޖޯއި ބައިޑެން ވަނީ ވިދާޅުވެފައެވެ. ހަމަލާތަކުގައި މިހާތަކަށް ލުބުނާނުގެ 3,500 އަށްވުރެ ގިނަ މީހުން މަރުވެ 15,000 ށް ވުރެ ގިނަ މީހުން ޒަޙަމަވެފައިވެއެވެ. ހަމަލާތަކުގައި އިޒްރާއިލްގެ އަސްކަރިއްޔާއަށް ވެސް ވަނީ ބޮޑެތި ގެއްލުންތަކެއްލިބި ސިފައިގެންގެ ބައެއް މީހުން މަރުފައެވެ.
ހަމަލާތައް ހުއްޓާލުމަށް އެއްބަސްވެފައިވަނީ ބުދަދުވަހު ޖީއެމްޓީ ގަޑިން 02:00 ގައެވެ. ނަމަވެސް މި އެއްބަސްވުމާ އެއްގޮތަށް އިޒްރާއިލްގެ އަސްކަރިއްޔާ އާއި ހިޒްބުالله އާ ދެމެދު ދާއިމީ ގޮތުން ހަމަލާތައް ހުއްޓާލެވޭނެ ކަމާމެދު ކޮންބޮޑުވުންތަކެއް ހުރިކަމަށް މަޞްރަޙް ދިރާސާ ކުރާ ފަރާތްތަކުން ދެކެއެއެވެ.
"ލުބުނާން-އިޒްރާއިލް ބޯޑަރު ސަރަޙައްދުގައި ދެމުންދާ ހަމަލާތައް ހުއްޓާލާނެ. މިއެއްބަސްވުން އެކުލަވާލެވިފައިވަނީ ދެފަރާތުގެ މެދުގައި ދާއިމީކޮށް ހަމަލާތައް ހުއްޓާލާ, ނުތަނަވަސްކަން ފިލުވާލެވޭ ގޮތަށް. ދެ ޤައުމުގެ އާންމުންގެ ތެރެއިން ގެދޮރު ދޫކޮށް ރައްކާތެރި ހިސާބުތަކަށް ގޮސްފައިވާ މީހުން އެނބުރި އެމީހުންގެ ގެދޮރަށް ރައްކާތެރިކަމާއެކު ވަރަށް އަވަހަށް އާދެވޭނެ. ސްކޫލްތައް ހުޅުވި, ވިޔަފާރިތަކާއި, ދަނޑުތަކުގައި މަސައްކަތްފެށި އެމީހުންގެ ދިރިއުޅުން ވަރަށް އަވަހަށް އާބާދުވެގެންދާނެ" އެއްބަސްވުން އިއުލާންކުރަމުން ބުދަ ދުވަހު ޖޯއި ބައިޑެން ވިދާޅުވިއެވެ.
ހަމަލާތައް ހުއްޓާލުމާބެހޭ މަޝްވަރާތަކުގައި ހިޒްބުالله އިން ސީދާ ގޮތެއްގައި ބައިވެރިވެފައެއް ނުވެއެވެ. އެ ޖަމާއަތުގެ ފަރާތުން މަޝްވަރާތަކުގައު ބައިވެރިވި ލުބުނާންގެ ޤާނޫން ހަދާ މަޖިލީހުގެ ރައީސް ނާބިޙް ބެރީ މި އެއްބަސްވުމާ ގުޅޭގޮތުން އަދި ވަކި އެއްޗެއް ވިދާޅެއް ނުވެއެވެ. ނަމަވެސް ލުބުނާނުގެ މިނިސްޓަރ ނަޖީބް މިކާތީ ވަނީ އެއްބަސްވުން ޤާއިމްކުރެވުމުން އެކަމަށް މަރުޙަބާ ވިދާޅުވެފައެވެ.
ރިއެކްޝަންސް
