ފުވައްމުލައް ކުރިއަށް, އަލިފުށްޓަށް އިތުބާރު
ފުވައްމުލައް ސިޓީ ދެވަނަ މެޗު ކާމިޔާބުކުރީ 7-3 ން ދިއްދޫ ބަލިކޮށްގެންނެވެ. މިއީ ދިއްދޫގެ ފުރަތަމަ މެޗު އަދި ފުވައްމުލަކުގެ ދެވަނަ މެޗެވެ. މެޗުގައި ފުވައްމުލައް ޓީމަށް ކުޅޭ ބިދޭސީ ފޯވާޑް ކޯފީ ހެޓްރިކް ހެދިއެވެ.
ފުވައްމުލައް ސިޓީއަށް ފުރަތަމަ ހާފްގައި ފުރަތަމަ ދެ ގޯލް ކާމިޔާބުކޮށްދިނީ އަލީ ޝަމާލް އަބްދުالله އެވެ. 33 ވަނަ މިނިޓްގައި ދިއްދޫގެ ފުރަތަމަ ލަނޑު ޖެހީ އާދަމް އާޒިމް އެވެ. ފަރަގު ކުޑަކޮށްފައި ވަނިކޮށް ފުރަތަމަ ހާފް ނިމެން ދަނިކޮށް ކޯފީ އޭނާގެ ފުރަތަމަ ލަނޑު ޖަހާ ފުވައްމުލަކު ސިޓީއަށް އިތުބާރު ހޯދައިދިނެވެ. އެކަމަކު ފުރަތަމަ ހާފްގެ އިތުރު ވަގުތުގައި ދިއްދޫގެ ހުސެއިން ޝިފާހު ލަނޑެއް ޖަހާ އަލުން ފަރަގު ކުޑަކުރިއެވެ.
ދެވެނަ ހާފްގައި ފުރަތަމަ ދެ ލަނޑު ޖަހާ ކޯފީ ހެޓްރިކެއް ހެދިއެވެ. އެއާއެކު ސޮބާހު މުހައްމަދުގެ އިރުޝާދުގެ ދަށުން ކުޅޭ ފުވައްމުލަކަށް މޮޅު ޔަގީންވިއެވެ. އޭގެފަހުން ޕެނަލްޓީއަކުން ދިއްދޫ ޓީމްގެ ހުސެއިން ޝިފާހު އެޓީމަށް ތިންވަނަ ލަނޑެއް ޖަހައިދިން ނަމަވެސް. މެޗުގެ އިތުރު ވަގުތުގައި ހުސައިން ޝަރީފް މުޙައްމަދު ލަނޑު ޖަހާ ޔަގީންކަމާއެކު ފުވައްމުލަކުން މެޗު ކާމިޔާބުކުރިއެވެ.
ފަސް ޓީމް ހިމެނޭ ގްރޫޕްގައި ފުވައްމުލައް ސިޓީ އޮތީ ދެ މެޗުންވެސް މޮޅުހެ ހަ ޕޮއިންޓާއެކެ އެއްވަނައިގައެވެ. ދެވަނައިގަ އޮތީ ފުރަތަމަ މެޗު ކާމިޔާބުކުރި ދ.މީދޫއެވެ.
މުބާރާތަށް އެންމެ ފުރަތަމަ ޕްރެކްޓިސް ފެށި އަލިފުށިން ވަނީ ފުރަތަމަ މެޗުގައި 5-1 ން ކެންދޫ ބަލިކޮށް އިތުބާރާއެކު މުބާރާތް ފަށާފައެވެ. މެޗުގައި ގައުމީ ޓީމްގެ މިޑްފީލްޑަރ ހުސައިން ނިހާން (ނިހާޓް) ދެ ލަނޑު ޖެހިއެވެ. ފުރަތަމަ ލަނޑު އޭނާ ޖެހީ މެޗު ފަށައިގެން ތިންވަނަ މިނިޓްގައެވެ. ނިހާޓްގެ އިތުރުން އާދަމް އިމްރާންވެސް ދެ ލަނޑު ޖެހިއެވެ. އަނެއް ލަނޑު ޖެހީ އަހުމަދު ހުސާން އެވެ. ކެންދޫ ޓީމްގެ ހަމައެކަނި ލަނޑު ޖެހީ އިތުރު ވަގުތުގެ 18 ވަނަ މިނިޓްގައި ރަޝާދު އަބްދުލް މަތީންއެވެ.
ނިހާޓް އަލިފުށި ޓީމަށް ކުޅެނީ ރަށުން ބޭރު ކުޅުންތެރިއެއްގެ ގޮތުގައެވެ. އަލިފުށީގެ ކެޕްޓަނަކީ ގައުމީ ޓީމްގެ ކުރީގެ ޑިފެންޑަރ މުޙައްމަދު ރަޝީދު (ހޮކޭ) އެވެ.
ރިއެކްޝަންސް
